കുംഭമേളകളെക്കുറിച്ച്‌ കേട്ടിട്ടുണ്ടങ്കിലും വായിച്ചിട്ടുണ്ടങ്കിലും ഇതിനു മുമ്പ്‌ ഒരിക്കലും കുംഭമേളയില്‍ പങ്കെടുത്തിരുന്നില്ല. ഇത്തവണത്തെ കുംഭമേള 144 വര്‍ഷത്തില്‍ ഒരിക്കല്‍ മാത്രം നടക്കുന്ന മഹാ കുംഭമേളയാണന്നും അതിനായി വിപുലമായ ഒരുക്കങ്ങള്‍ ഉത്തര്‍പ്രദേശ്‌ സര്‍ക്കാര്‍ നടത്തിയിട്ടുണ്ടന്നും കേട്ടെങ്കിലും പ്രയാഗരാജിലേക്ക്‌ പോകുന്നതിനെക്കുറിച്ചോ സ്‌നാനം ചെയ്യുന്നതിനെക്കുറിച്ചോ ചിന്തിച്ചതേയില്ലായിരുന്നു. ഭൗതിക സാഹചര്യങ്ങളൊന്നും കുംഭമേളയ്‌ക്ക്‌ പോകുന്നതിന്‌ അനുയോജ്യവുമായിരുന്നില്ല. നമ്മുടെ ജീവിത കാലത്ത്‌ ഇനി മഹാ കുംഭമേള സാധ്യമല്ലാത്തിനാല്‍ ഒന്നുപോയാലോ എന്ന ചിന്ത സുഹൃത്തുക്കളുടെ ഇടയില്‍ നിന്നും ഉയര്‍ന്നു വന്നെങ്കിലും പോകാന്‍ മാനസികമായി തയ്യാറായിരുന്നില്ല.
സാധാരണ പൂര്‍ണ്ണ കുംഭമേളകള്‍ നടക്കുന്നത്‌ 12 വര്‍ഷത്തിലൊരിക്കലാണ്‌ നടക്കുന്നത്‌ 12 പൂര്‍ണ്ണ കുംഭമേളകള്‍ പൂര്‍ത്തിയാകുമ്പോഴാണ്‌ മഹാ കുംഭമേള നടക്കുന്നത്‌. 6 വര്‍ഷത്തിലൊരിക്കല്‍ നടക്കുന്നതിനെ അര്‍ദ്ധകുംഭമേള എന്നു പറയും. ഗുരു അഥവാ വ്യാഴം ഒരുവട്ടം സൂര്യനെ പ്രദിക്ഷണം ചെയ്യാന്‍ എടുക്കുന്ന സമയമാണ്‌ 12 വര്‍ഷം. അതിനെയാണ്‌ ഒരു വ്യാഴവട്ടം എന്നു പറയുന്നത്‌.
2025 ജനുവരി 14 മുതല്‍ ഫെബ്രുവരി 26 മകരസംക്രാന്തി മുതല്‍ ശിവരാത്രി വരെയാണ്‌ മഹാ കുംഭമേള പ്രയാഗ്‌ രാജില്‍ നടന്നത്‌ ഇക്കുറി 45 ദിവസങ്ങളിലായി 66 കോടി ആളുകള്‍ ത്രിവേണി സംഗമത്തില്‍ പുണ്യ സ്‌നാനം നടത്തിയെന്നാണ്‌ കണക്കുകള്‍ പറയുന്നത്‌. 40 ചതുരശ്ര കിലോമീറ്റര്‍ വിസ്‌തൃതിയില്‍ 4000 ഹെക്‌ടര്‍ സ്ഥലത്ത്‌ താത്‌കാലിക നഗരം സൃഷ്‌ടിച്ചാണ്‌ കുംഭമേള ഒരുക്കിയത്‌ സ്‌നാനഘട്ടുകളുടെ ആകം നീളം 12 കിലോമീറ്റര്‍ ആയിരുന്നു. 25 സെക്‌ടറുകളിലായി 1,50,000 കൂടാരങ്ങള്‍ ആളുകള്‍ താമസിക്കുന്നതിനായി ഒരുക്കിയിരുന്നു.
ഈ ആകര്‍ഷണങ്ങളാണ്‌ മഹാകുംഭമേളയിലേക്ക്‌ ഞങ്ങളെ ആകര്‍ഷിച്ചത്‌.
ആദ്യം വാഹനം ഹയര്‍ ചെയ്‌തു പോകുന്നതിനെക്കുറിച്ചും ട്രൈനില്‍ പോകുന്നതിനും എല്ലാം ശ്രമം നടത്തിയെങ്കിലും അതൊന്നും വിജയിച്ചില്ല. പിന്നീട്‌ വിമാന മാര്‍ഗ്ഗം പോകാമെന്നു കരുതിയെങ്കിലും കെച്ചി -പ്രയാഗ്‌ രാജ്‌ ടിക്കറ്റ്‌ ചാര്‍ജ്ജ്‌ സബിക്കാവുന്നതിലും കൂടുതലായിരുന്നു. അങ്ങിനെ കുംഭമേള യാത്ര ഉപേക്ഷിച്ചതായിരുന്നു. പക്ഷെ ഫെബ്രുവരി പകുതി ആകാറയപ്പോഴേക്കും വീണ്ടും ചര്‍ച്ചകള്‍ പുരോഗമിക്കുകയും പോകാന്‍ തീരുമാനിക്കകയും ആയിരുന്നു. ഞങ്ങള്‍ 12 പേര്‍ അടങ്ങുന്ന സംഘം കൊച്ചിയില്‍ നിന്നും ഡല്‍ഹി വരെ വിമാന മാര്‍ഗ്ഗവും ഡല്‍ഹിയില്‍ നിന്നും വാടകക്ക്‌ എടുത്ത്‌ ട്രാവലറില്‍ പ്രയാഗ്‌ രാജിലേക്കും യാത്ര തിരിച്ചു. തിരിച്ച്‌ അതേ മാര്‍ഗ്ഗത്തില്‍ ഡല്‍ഹിയില്‍ തിരിച്ചെത്തി വിമാന മാര്‍ഗ്ഗം മടങ്ങുകയും ചെയ്‌തു. പ്രയാഗ്‌ രാജിനൊപ്പം കാശിയിലും അയോദ്ധ്യയിലും മഥുരയിലും, ഡല്‍ഹയിലും കറങ്ങുകയും ചെയ്‌തു.
അനുഭവ തീഷ്‌ണമായ ഒരു യാത്രയായിരുന്നു പ്രയാഗ്‌ രാജിലേക്കുള്ളത്‌ ഏകദേഷം 15 കിലോമീറ്റര്‍ അകലെ വച്ച്‌ ഞങ്ങളുടെ വാഹനം തടഞ്ഞു. പിന്നീട്‌ മെയിന്‍ റോഡുകള്‍ ഉപേക്ഷിച്ച്‌ ഉത്തര്‍ പ്രദേശിന്റെ ഗ്രാമ വഴിയിലൂടെ ഗുഡ്‌സ്‌ ഓട്ടോറിക്ഷയിലും ടാക്‌സി ടൂവീലറുകളിലും മറ്റുമായി സഞ്ചരിച്ചാണ്‌ സന്ധ്യയോടെ ത്രിവേണി സംഗമ ഭൂമിയില്‍ എത്തിയത്‌. അര്‍ദ്ധ രാത്രിയോടെയാണ്‌ ത്രിവേണി സ്‌നാന പുണ്യം നേടാനായത്‌. പ്രധാന അമൃത സ്‌നാനങ്ങളില്‍ ഒന്നായ മാഘ പൂര്‍ണ്ണിമയുടെ പിറ്റേന്നാണ്‌ ഞങ്ങള്‍ സ്‌നാനം നടത്തിയത്‌.
