കൂത്തുപറമ്പ്‌ രക്തസാക്ഷികളോടും അവരുടെ കുടുംബങ്ങളോടും സിപി എം കാട്ടുന്ന വഞ്ചന തുടര്‍ന്നു കൊണ്ടേയിരിക്കുന്നു. മൂന്ന് പതിറ്റാണ്ടിലേറെയായി ഈ വഞ്ചനയും അവഹേളനവും തുടര്‍ന്നു വരികയാണ്‌. വെറും ഭൗതിക നേട്ടങ്ങള്‍ മാത്രം ലാക്കാക്കി സി.പി.എം. നേതൃത്വം എം. വി. രാഘവനെ വിശുദ്ധനാക്കി പ്രഖ്യാപിച്ചു കഴിഞ്ഞു. രാഘവന്റെ അവസാന നാളുകളില്‍ മസ്‌തിഷ്‌ക മരണം സംഭവിച്ച്‌ പ്രജ്ഞയറ്റു കിടക്കുന്ന അവസരത്തില്‍ സി.എം.പി.യുടെ ഒരു വിഭാഗത്തെ അടര്‍ത്തിയെടുത്ത്‌ കൂടെ നിര്‍ത്തിയതു എന്ത്‌ ആദര്‍ശത്തിന്റെ അടിസ്ഥാനത്തിലാണന്ന്‌ പാര്‍ട്ടി അണികള്‍ ചിന്തിക്കണം. ഒരു ആദര്‍ശത്തിന്റെ പേരിലുമല്ല മറിച്ച്‌ രാഘവന്റേയും കുടുംബത്തിന്റേയും ഉടമസ്ഥതയിലും നിയന്ത്രണത്തിലും ഉള്ള ചില സൊസൈറ്റികളുടേയും സ്ഥാപനങ്ങളുടേയും നിയന്ത്രണവും ഉടമസ്ഥതയും സ്വന്തമാക്കാന്‍ വേണ്ടി മാത്രമുള്ള അടവുകളാകാം സി.പി.എം. പയറ്റുന്നത്‌. എന്നിരുന്നാലും സി.പി.എം. ന്റെ ആഹ്വാനം ഉള്‍ക്കൊണ്ടു രാഘവന്റെ ധാര്‍ഷ്‌ട്യത്തിനു നേരെ വിരിമാറുകാട്ടി പിടഞ്ഞുവീണ രക്തസാക്ഷികളുടേയും ജീവശ്ചവങ്ങളായി ഇന്നും ജീവിക്കുന്നവരുടേയും അവരുടെയല്ലാം കുടുബാംഗങ്ങളുടേയും മുഖത്ത്‌ കരിവാരി തേക്കുന്നതിനും മാത്രമെ ഇപ്പോഴത്തെ സി.പി.എം. ന്റെ പ്രവര്‍ത്തികള്‍ വഴിവയ്‌ക്കുകയുള്ളൂ.
പരസ്യമായി പ്രതികരിച്ചാല്‍ ഉണ്ടാകുന്ന ഭവിഷുത്തുകളേയും, നേരിടാന്‍ പോകുന്ന സി.പി.എം. ഊരുവിലക്കുകളേയും ഭയന്ന്‌ കൂത്തുപറമ്പില്‍ വെടിയേറ്റ്‌ മരിച്ച സഖാക്കളുടെ ബന്ധുക്കളും പരിക്കേറ്റ മറ്റ്‌ നിരവധി സഖാക്കളും രാഘവനോട്‌ സി.പി.എം കാണിക്കുന്ന പ്രേമത്തേയും സ്വാശ്രയ കോളേജ്‌ വിഷയത്തില്‍ സിപിഎമ്മിന്റെ കാപട്യത്തോടും ഒരുപക്ഷെ ക്ഷമിച്ചേക്കാം……!? പക്ഷെ പാപ്പിനിശ്ശേരിയിലെ വിഷ ചികിത്സാ കേന്ദ്രത്തില്‍ വെന്തുമരിച്ച പാമ്പുകളും, നിരവധിയായ മിണ്ടാ പ്രാണികളും, നടുറോഡിലൂടെ ഇഴയേണ്ടി വന്ന മുതലകളും ഇവരുടെ കാപട്യങ്ങളോടും വഞ്ചനയോടും ക്ഷമിക്കുമെന്ന്‌ കരുതാന്‍ ഇടയില്ല, കാരണം അവര്‍ ഒരു തെറ്റും ചെയ്‌തിരുന്നില്ലല്ലേ?.
വിദ്യാഭ്യാസ രംഗത്തെ സവകാര്യ വത്‌കരണത്തിനും സ്വാശ്രയ വിദ്യാഭ്യാസ സ്ഥാപനങ്ങള്‍ ആരംഭിക്കാനുള്ള നീക്കത്തിന്‌ എതിരേയും അവര്‍ നടത്തിയ സമരത്തിന്റെ ലക്ഷ്യം കേവലം രാഷ്‌ട്രീയ നേട്ടം മാത്രമായിരുന്നു എന്ന്‌ സിപിഎം നേതൃത്വം തന്നെ അവരുടെ പ്രവര്‍ത്തികളിലൂടെ തെളിയിച്ചു കഴിഞ്ഞിരിക്കുന്നു. ഈ കാപട്യത്തിന്റെ പ്രതിഫലനം ഇന്നോ ഇന്നലെയോ തുടങ്ങിയതല്ല. 1995 നവംബര്‍ 25 ന്‌ അന്നത്തെ സഹകരണ മന്ത്രിയായ എം.വി. രാഘവനെ കൂത്തുപറമ്പില്‍ വച്ച്‌ വിദ്യാഭ്യാസ രംഗത്തെ സ്വ കാര്യ വത്‌കരണത്തിനും സ്വാശ്രയ വിദ്യാഭ്യാസ സ്ഥാപനങ്ങള്‍ ആരംഭിക്കാനുള്ള നീക്കത്തിന്‌ എതിരേയും ഡി വൈ എഫ്‌ ഐ പ്രവര്‍ത്തകര്‍ തടയുകയായിരുന്നു. തുടര്‍ന്നുണ്ടായ വെടിവയ്‌പില്‍ വിലപ്പെട്ട അഞ്ച്‌ മനുഷ്യജീവനുകള്‍ നഷ്‌ടമായി. കെ. കെ. രാജീവന്‍, കെ. ഷിബുലാല്‍, സി. സാബു, കെ.വി. റോഷന്‍, വി. മധുസൂദനന്‍, എന്നിവരാണ്‌ വെടിയേറ്റ്‌ മരിച്ചത്‌. തുടര്‍ന്നുണ്ടായ പ്രതിക്ഷേധങ്ങളും അക്രമങ്ങളും സ്വാഭാവികം.
കൂത്തുപറമ്പിലെ സമരത്തില്‍ പിടഞ്ഞു വീണു മരിച്ച വീര സഖാക്കളുടെ ചുടുചോരയാല്‍ നിറം പകര്‍ന്ന ചോര ചെങ്കൊടിയുമേന്തി കേരളത്തിന്റെ സമൂഹ മനസാക്ഷിക്കുമുന്നിലേക്ക്‌ എം. വി. രാഘവനെ കൊലയാളിയായി ചിത്രീകരിച്ച്‌ സ്വാശ്രയ വിരുദ്ധസമരത്തിന്റെ അലയൊലികള്‍ എത്തിക്കുവാന്‍ കാപട്യത്തിന്റെ മുഖംമൂടി അണിഞ്ഞ ഇടതുപക്ഷ യുവജന വിദ്യാര്‍ത്ഥി സമൂഹത്തിന്‌ അന്ന്‌ സാധിച്ചു. അതിന്‌ ഫലവുമുണ്ടായി. പിന്നീട്‌ നടന്ന നിയമസഭാ തെരെഞ്ഞെടുപ്പില്‍ ജനം ഇടതുപക്ഷത്തിന്‌ അനുകൂലമായി വിധി എഴുതി. ഇ.കെ നയനാരുടെ നേതൃത്വത്തിലുള്ള സര്‍ക്കാര്‍ അധികാരമേറ്റതോടെ സാശ്രയ വിദ്യാഭ്യാസ വിഷയത്തില്‍ ശാശ്വതമായ പരിഹാരം ഉണ്ടാകുമെന്ന്‌ ജനം വിശ്വസിച്ചു.
പക്ഷെ സ്വാശ്രയ കോളേജ്‌ വിഷയത്തിലെ സി പി എം വഞ്ചനയുടെ കഥ ഇവിടെ തുടങ്ങുകയാണ്‌. അത് സ്വകാര്യ യൂണിവേഴ്സിററികളെ അനുവദിക്കുന്നഅവസ്ഥയിലേക്ക് വരെ എത്തി നില്‍ക്കുന്നു. കൂത്തുപറമ്പില്‍ വെടിയേറ്റ്‌ മരിച്ച സഖാക്കളുടെ ചുടുചോരയുടെ ഗന്ധം മാറുന്നതിനു മുമ്പേ നായനാര്‍ സര്‍ക്കാര്‍ കേരളത്തില്‍ രണ്ട്‌ സെല്‍ഫ്‌ ഫിനാന്‍സിംഗ്‌ എഞ്ചിനീയറിംഗ്‌ കോളേജുകള്‍ ആരംഭിച്ചു. തൊടുപുഴയിലും, ചെങ്ങന്നൂരിലും. ഇതോടെ കൂത്ത്‌ പറമ്പ്‌ സമര സഖാക്കളും അവരുയര്‍ത്തിയ മുദ്രാവാക്യങ്ങളും തെരുവില്‍ ഉപേക്ഷിച്ച ഡി വൈ എഫ്‌ ഐ ക്കാര്‍ സ്വാശ്രയകോളേജ്‌ വിഷയത്തില്‍ മൗനികളായി മാറുകയായിരുന്നു. വിധി വൈപര്യം എന്നല്ലാതെ എന്തു പറയാന്‍ പിന്നീട്‌ യുവമോര്‍ച്ചക്കാര്‍ രംഗത്തു വരേണ്ടി വന്നു കുത്തുപറമ്പ്‌ രക്തസാക്ഷികളെക്കുറിച്ച്‌ ഡി വൈ എഫ്‌ ഐ ക്കാരെ ഓര്‍മ്മിപ്പിക്കുവാന്‍. സിപിഎമ്മിന്റെ സ്വാശ്രയ വിരുദ്ധ സമരകാപട്യത്തിന്റെ നിത്യസ്‌മാരകമായി തൊടുപുഴയില്‍ ഇടതുപക്ഷ സര്‍ക്കാര്‍ ആരംഭിച്ച സ്വാശ്രയ എഞ്ചിനീയറിംഗ്‌ കോളേജ്‌ പിടിച്ചെടുത്ത്‌ കൂത്തുപറമ്പ്‌ രക്തസാക്ഷികള്‍ക്ക്‌ സമര്‍പ്പിച്ചുകൊണ്ട്‌ യുവമോര്‍ച്ച നടത്തിയ സമരം സംസ്ഥാനമൊട്ടാകെ ശ്രദ്ധ നേടിയതായിരുന്നു.
പിന്നീട്‌ ഭരണം നഷ്‌ടപ്പെട്ടപ്പോളും അല്ലാത്തപ്പോഴും ഇടതുപക്ഷ യുവജന വിദ്യാര്‍ത്ഥി സംഘടനകള്‍ സമരങ്ങള്‍ പലതു നടത്തിയിട്ടുണ്ടങ്കിലും മറു വശത്തു കൂടി വഞ്ചനയും കാപട്യവും തുടര്‍ന്നുകൊണ്ടിരുന്നു.
കോണ്‍ഗ്രസ്സിലേയും സിപിഎമ്മിന്റേയും ഗ്രൂപ്പ്‌ വഴക്കിന്റെ ഭാഗമായി പരിയാരത്ത് നടന്ന അഴിമതി കഥകള്‍ പുറത്ത്‌ വന്നില്ലായിരുന്നു എങ്കില്‍ ഇത്തരം വഞ്ചനകളും ചതികളും നിര്‍ബാധം തുടരുകയും, ഒരു വശത്ത്‌ സമരവും മറുവശത്തു കൂടി കച്ചവടവും നടത്തി നിരവധി രാജന്‍മാരും പ്രകാശന്‍മാരും പൂച്ചയെപ്പോലെ കണ്ണുമടച്ച്‌ പാല്‌ കട്ടു കുടിച്ചുകൊണ്ടിരുന്നേനെ. മറുവശത്താകട്ടെ കത്തി നില്‍ക്കുന്ന വിളക്കിന്റെ ജ്വാല കണ്ട്‌ അതിലൊളിഞ്ഞിരിക്കുന്ന അപകടങ്ങളെ മനസ്സിലാക്കാതെ പറന്ന്‌ അടുക്കുന്ന ഈയാം പാറ്റകളെ പോലെ ആദര്‍ശ നിഷ്‌ടരായ നിരവധി കുരുന്നു ജീവനുകള്‍ രക്ത സാക്ഷികളായി മാറിയേനെ. പൊതു സമൂഹത്തേയയോ, മാധ്യമങ്ങളേയോ അഭിമുഖീകരിക്കുവാന്‍ പോലും അനുവദിക്കാതെ പാര്‍ട്ടി തടങ്കലുകളില്‍ ജീവിക്കുന്നരക്തസാക്ഷികള്‍ ഇന്നും കൂത്തുപറമ്പില്‍ ഉണ്ടെന്ന കാര്യവും വിസ്‌മരിച്ചുകൂടാ.
സ്വാശ്രയ മേഖലയില്‍ 50:50 അനുപാതത്തിനു വേണ്ടി സമരം ചെയ്‌ത ഇടതുപക്ഷ യുവജന വിദ്യാര്‍ത്ഥി സംഘടനകള്‍ അന്വേഷിച്ചിട്ടുണ്ടോ കഴിഞ്ഞ ഏതാനും വര്‍ഷക്കാലമായി ഇടതുപക്ഷം ഭരിക്കുന്ന പരിയാരം മെഡിക്കല്‍ കോളേജില്‍ മെറിറ്റ്‌ സീറ്റില്‍ എത്ര സീറ്റുകള്‍ നല്‍കിയിട്ടുണ്ടെന്ന ്‌. 50:50 അനുപാതം പാലിച്ചിട്ടില്ലന്നു മാത്രമല്ല നൂറില്‍ നൂറും വില്‌പനചരക്കാക്കി മാറ്റിയവര്‍ കേവലം ഒരു സീറ്റു മാത്രമാണത്രെ അഞ്ചു വര്‍ഷത്തിനുള്ളില്‍ ഓപ്പണ്‍ മെറിറ്റില്‍ നല്‍കിയത്‌. ഇവരാണ്‌ കേരളത്തിലെ സ്വശ്രയ മാനേജുമെന്റുകള്‍ക്കെതിരെ (അക്കൂട്ടര്‍ ചെയ്യുന്ന പ്രവര്‍ത്തികളെ ന്യായീകരിക്കുന്നില്ല) ആരോപണങ്ങളും സമരങ്ങളുമായി രംഗത്ത്‌ വന്നിരിക്കുന്നത്‌.
ഇവരുയുര്‍ത്തിയ മുദ്രാവാക്യങ്ങള്‍ക്കും ആശയങ്ങള്‍ക്കും എന്തെങ്കിലും വില കല്‌പിച്ചിരുന്നുവെങ്കില്‍ അവസരം ലഭിച്ചപ്പോള്‍ പരിയാരം മെഡിക്കല്‍ കോളേജ്‌ സര്‍ക്കാര്‍ ഏറ്റെടുക്കുകയും നിര്‍ദ്ദനരായ കുട്ടികള്‍ക്ക്‌ പഠിക്കുവാന്‍ അവസരം ഒരുക്കുകയും ചെയ്‌തേനെ. മറിച്ച്‌ ന്യായമായും കൊടുക്കാമായിരുന്ന അവസരം കൂടി നിക്ഷേധിച്ച്‌ അവ കൂടി കവര്‍ന്നെടുത്ത്‌ വില്‌പന ചരക്കാക്കി മാറ്റിയവര്‍ക്കും അവര്‍ക്ക്‌ പിന്തുണ നല്‍കിയ പാര്‍ട്ടിക്കാര്‍ക്കും ഇനിയെന്ത്‌ പറയുവാനുണ്ട്‌. നാല്‌ കാശിനു വേണ്ടി ആദര്‍ശങ്ങളേയും മുദ്രാവാക്യങ്ങളേയും വരെ വില്‌പനചരക്കാക്കി മാറ്റിവരുടെ പൊയ്‌മുഖങ്ങളാണ്‌ ഇവിടെ തകര്‍ന്നു വീഴുന്നത്‌.
ഈ കടുത്ത യാഥാര്‍ത്ഥ്യങ്ങള്‍ പകല്‍ വെളിച്ചം പോലെ കത്തി നില്‍ക്കുമ്പോള്‍ എം.വി. രാഘവന്‍ വിഷയത്തില്‍ സി.പി.എം. ന്റെ നിലപാടുകളില്‍ അത്ഭുതപ്പെടേണ്ടതില്ല. കാരണം ജനങ്ങളേയും അണികളേയും വഞ്ചിക്കുന്ന നിലപാടുകള്‍ മാത്രമെ എന്നും ആ പാര്‍ട്ടി സ്വീകരിച്ചിരുന്നുള്ളൂ. മുമ്പ്‌ ഇക്കാര്യം എതിര്‍ പാര്‍ട്ടികളും അവരുടെ ശത്രുപക്ഷത്തുള്ളവരും മാത്രമാണ്‌ പരസ്യമായി പറഞ്ഞിരുന്നതെങ്കില്‍ ഇപ്പോള്‍ അവരുടെ സഹയാത്രികരും ഈ സത്യം പരസ്യമായി വിളിച്ചു പറയാന്‍ തയ്യാറായിരിക്കുന്നു. ഇന്ന്‌ ഈ വഞ്ചന ആ പാര്‍ട്ടിക്കാരും അണികളും തിരിച്ചറിഞ്ഞതിന്റെ പ്രതിഫലനം രാജ്യത്താകമാനം പ്രതിഫലിച്ചിരുന്നു. നെഹൃവിന്‌ ശേഷം ഇ.എം.എസ്‌. എന്ന്‌ പ്രചരിപ്പിച്ചവരുടെ ശക്തി ക്ഷയിച്ച്‌ ക്ഷയിച്ച്‌ ഇല്ലാതായി കൊണ്ടിരിക്കുന്നു. കേരളത്തില്‍ അങ്ങോളം ഇങ്ങോളം അണികള്‍ ആ പാര്‍ട്ടിയെ ഉപേക്ഷിച്ച്‌ ദേശീയ മുഖ്യധാരയിലേക്ക്‌ അണിചേര്‍ന്നു കൊണ്ടിരിക്കുന്നു. ആ പാര്‍ട്ടിയുടെ ഇന്നത്തെ യഥാര്‍ത്ഥ അവസ്ഥ പ്രതിഫലിപ്പിക്കുന്ന ഒരു ലോഗോ തന്നെ അതിന്റെ അടുത്ത പാര്‍ട്ടികോണ്‍ഗ്രസ്സിന്റെ ലോഗോ ആയി അവര്‍ കണ്ടോത്തിയിരിക്കുന്നു.
മുങ്ങുന്ന കപ്പലില്‍ നിന്നും ജീവന്‍ രക്ഷിക്കാന്‍ വെമ്പല്‍ കൊള്ളുന്ന അണികളുടെ ചിത്രം ലോഗോ ആയി കണ്ടെത്തിയത്‌ അവസരോചിതമായി. കൂത്തുപറമ്പ്‌ രക്തസാക്ഷ്യത്വത്തിന്റെ ഈ വാര്‍ഷിക ദിനത്തില്‍ ഈ പാര്‍ട്ടിക്കു വേണ്ടി കൊല്ലാനും മരിക്കാനും തുനിയുന്ന യുവ തലമുറ ഒന്നു തിരിഞ്ഞു നോക്കാന്‍ തയ്യാറകണം. ഇന്നകളില്‍ സി.പി.എം. നേതൃത്വം എന്തൊക്കെ പറഞ്ഞിട്ടുണ്ടോ അതിനെല്ലാം ഘടക വിരുദ്ധമായ നിലപാടുകളാണ്‌ ഇപ്പോള്‍ നടപ്പിലാക്കികൊണ്ടിരിക്കുന്നത്‌. മതേതരത്വവും സോഷിലസവും പ്രസംഗിക്കുകയും മതവര്‍ഗീയ ശക്തികളുമായി കൈകോര്‍ക്കുകയും മുലധന ശക്തികള്‍ക്കുമുന്നില്‍ ഓശ്ചാനിച്ചു നില്‍ക്കുകയും ചെയ്യുന്ന വഞ്ചന നിറഞ്ഞ സമീപനങ്ങളെ ഇനിയും നിങ്ങള്‍ കണ്ടില്ലന്നു നടിക്കരുത്‌. വഞ്ചനയുടെ മുഖംമൂടി അണിഞ്ഞ പാര്‍ട്ടി നേതൃത്വത്തിന്റെ കാപട്യങ്ങളില്‍ ഇനിയും പ്ലീനിതരായി മാറാതെ സ്വത്വം തിരിച്ചറിഞ്ഞ്‌ ശരിയുടെ പാതയിലേക്ക്‌ വഴിമാറുവാന്‍ ഈ രക്തസാക്ഷിദിനം വഴിയൊരുക്കട്ടെ എന്നു പ്രാര്‍ത്ഥിക്കുന്നു.
(പഴയ ലേഖനമാണ്)
