തെക്കിന്റെ കാശ്‌മീര്‍ എന്ന പേരില്‍ ഇന്‍ഡ്യക്കകത്തും പുറത്തും പ്രശസ്‌തി നേടിയ മൂന്നാര്‍ വീണ്ടും വാര്‍ത്തകളില്‍ നിറയുന്നു. ലോകത്തെ തന്നെ ഏറെ ശ്രദ്ധിക്കപ്പെടുന്ന വിനോദ സഞ്ചാര കേന്ദ്രങ്ങളിലൊന്നായ മൂന്നാര്‍ ഇന്ന്‌ കയ്യേറ്റങ്ങളുടേയും അതിന്റെ പിന്നിലെ രാഷ്‌ട്രീയ അന്തര്‍ നാടകങ്ങളുടേയും പേരില്‍ കുപ്രസിദ്ധിയാര്‍ജ്ജിച്ചിരിക്കുകയാണ്‌. കണ്ണന്‍ദേവന്‍ഹില്‍ റിസര്‍വ്വ്‌ (കെ.ഡി. എച്ച്‌), പള്ളിവാസല്‍, ചിന്നക്കനാല്‍, മാങ്കുളം തുടങ്ങിയ വില്ലേജുകളിലായി തഴച്ചുവളര്‍ന്ന റിസോര്‍ട്ടുകളും ടൂറിസ്റ്റ്‌ കേന്ദ്രങ്ങളും എന്തും കയ്യേറുവാനുള്ള മനുഷ്യന്റെ അടങ്ങാത്ത അത്യാഗ്രഹത്തിന്റെ പ്രതിഫലനങ്ങളാണ്‌. രണ്ടും മൂന്നും സെന്റ്‌ മുതല്‍ ആയിരം ഏക്കര്‍ വരെ വെട്ടിപിടിച്ച്‌ കാല്‍ചുവട്ടില്‍ വച്ചിരിക്കുന്ന വ്യക്തികളും പതിനായിര കണക്കിന്‌ ഏക്കര്‍ വരെ പിടിച്ചടക്കിയ കോര്‍പ്പറേറ്റുകളും ഈ കയ്യേറ്റങ്ങള്‍ക്ക്‌ പിന്നിലുണ്ട്‌. ഒരു പറ്റം ഉദ്യോഗസ്ഥരും ചില രാഷ്ട്രിയ, മത നേതാക്കളും ഭൂമാഫിയുമാണ്‌ ഹൈ കോടതി നിരീക്ഷിച്ചത്‌ പോലെ മൂന്നാറിനെ കൂട്ടബലാല്‍സംഗത്തിനിരയാക്കിയത്‌.
അച്ചുതാനന്ദന്‍ സര്‍ക്കാരിന്റെ കാലത്ത്‌ ആരംഭിച്ച കയ്യേറ്റം ഒഴിപ്പിക്കല്‍ നടപടികള്‍ എങ്ങും എത്താതെ അവസാനിക്കുകയായിരുന്നു. കയ്യേറ്റ ഭൂമിയില്‍ ബോര്‍ഡ്‌ വച്ച്‌ വിപ്ലവം നടപ്പിലാക്കുവാനും ഏതാനും കെട്ടിടങ്ങള്‍ ഇടിച്ചു നിരത്തുവാനും അച്ചുതാനന്ദന്‍ സര്‍ക്കാരിന്റെ കാലത്ത്‌ സാധിച്ചുവെങ്കിലും തുടര്‍ന്നു വന്ന ഉമ്മന്‍ ചാണ്ടി സര്‍ക്കാരിന്റെ കാലത്ത്‌ കാര്യമായി ഒന്നും നടന്നില്ല. കയ്യേറ്റക്കാര്‍ക്ക്‌ എതിരെ നിയമത്തിന്റെ ബുള്‍ഡോസര്‍ കയറ്റുമെന്ന വാദവുമായി വന്ന യു.ഡി.എഫ്‌ സര്‍ക്കാരിന്റെ കാലത്ത്‌ കയ്യേറ്റങ്ങള്‍ നിര്‍ബാധം തുടരുകയാണ്‌ ചെയ്‌തത്‌. കയ്യേറ്റത്തെ ആരാധനയായും മതമായും കാണുന്ന രാഷ്‌ട്രീയ പാര്‍ട്ടികളുടെയും, നേതാക്കന്‍മാരുടേയും കൈകളിലാണ്‌ ഭരണകൂടത്തിന്റെ കടിഞ്ഞാണ്‍ ഇപ്പോള്‍ എന്നതും ഭൂമിയെ സേനേഹിക്കുന്നവരെ നിരാശയിലാക്കുന്ന കാര്യമാണ്‌.
അച്ചുതാനന്ദന്‍ സര്‍ക്കാരിന്റെ കാലത്ത്‌ മുഖ്യമന്ത്രി കയ്യേറ്റം തിരിച്ച്‌ പിടിച്ച്‌ സ്ഥാപിച്ച സര്‍ക്കാര്‍ ബോര്‍ഡുകള്‍ മേല്‍ക്കൂരയാക്കി, ആ സര്‍ക്കാര്‍ പടിയിറങ്ങുന്നതിന്‌ മുമ്പേ തന്നെ പുതിയ കയ്യേറ്റങ്ങള്‍ നടത്തുവാനും, ഇടിച്ചു നിരത്തിയ സ്ഥാപനങ്ങള്‍ പടുത്തുയര്‍ത്തുവാനും കയ്യേറ്റ മാഫിയക്ക്‌ സാധിച്ചിരുന്നു എന്ന കാര്യവും വിസ്‌മരിച്ചുകൂടാ.
ഈ കയ്യേറ്റങ്ങള്‍ക്കെല്ലാം പിന്നില്‍ വ്യക്തമായ രാഷ്‌ട്രീയ, മത, ഉദ്യോഗസ്ഥകൂട്ടുകെട്ടുകളുണ്ട്‌. അതിനെ വളര്‍ത്തുന്നതിലും പടര്‍ത്തുന്നതിലും മാറി മാറി ഭരിച്ച മുഴുവന്‍ രാഷ്‌ട്രീയ കക്ഷികള്‍ക്കും പങ്കുണ്ട്‌. അച്ചുതാനന്ദന്‍ മൂന്നാര്‍ ദൗത്യവുമായി രംഗത്തു വന്നപ്പേഴും ശക്തമായി അതിനെ പ്രതിരോധിച്ചത്‌ അച്ചുതാനന്ദന്റെ പാര്‍ട്ടിയുടെ ഇടുക്കി ജില്ലാ നേതൃത്വമാണ്‌. ഒഴിപ്പിക്കാന്‍ വരുന്നവരുടെ കാലു വെട്ടുമെന്ന്‌ പരസ്യമായി പ്രഖ്യാപിച്ച്‌ രംഗത്ത്‌ എത്തിയാണ്‌ അന്ന്‌ പാര്‍ട്ടി ജില്ലാ നേതൃത്വം മൂന്നാര്‍ ദൗത്യത്തെ പരാജയപ്പെടുത്തിയത്‌. അതേ ആളുകള്‍ ഇന്ന്‌ ഭരണത്തിന്റെ ചുക്കാന്‍ പിടിക്കുമ്പോള്‍ നമ്മുടെ മണ്ണും മരവും വനവും വെള്ളവും എല്ലാം അന്യാധിനപ്പെട്ടുപോവുകയാണ്‌.
ഇടുക്കി ജില്ലയിലെ കയ്യേറ്റങ്ങളേയും അനധികൃത നിര്‍മ്മാണ പ്രവര്‍ത്തനങ്ങളെ സംബന്ധിച്ച്‌ ഇടുക്കി ജില്ലാ പോലീസ്‌ സൂപ്രണ്ടായിരുന്ന എ.വി.ജോര്‍ജ്ജ്‌ ഐ.പി.എസ്‌. ചിത്രങ്ങള്‍ സഹിതം വിശദമായി നല്‍കിയ റിപ്പോര്‍ട്ടിന്റെയും, നിയമസഭാ പരിസ്ഥിതി സമിതി നടത്തിയ അന്വേഷങ്ങളിലെ കണ്ടെത്തലുകളുടേയും, സംസ്ഥാന ലാന്റ്‌ റവന്യൂ കമ്മീഷണറുടെ റിപ്പോര്‍ട്ടിന്റേയും അടിസ്ഥാനത്തില്‍ ശക്തമായ നടപടികള്‍ സ്വീകരിക്കുവാന്‍ തയ്യാറായ ദേവികുളം സബ്‌ കളക്‌ടര്‍ക്കും ഇടുക്കി ജില്ലാ പോലീസ്‌ സൂപ്രണ്ടായിരുന്ന എ.വി. ജോര്‍ജ്ജിനും ഭരണകൂടത്തിന്റേയും ഭരണത്തിനു നേതൃത്വം നല്‍കുന്ന സി.പി. എം. ന്റേയും ഭാഗത്തു നിന്നുമുണ്ടായിട്ടുള്ള ദുരനുഭങ്ങള്‍ നാടിനെ സ്‌നേഹിക്കുന്ന ഓരോ കേരളീയനേയും ഇരുത്തി ചിന്തിപ്പിക്കേണ്ടതാണ്‌. ജില്ലാ പോലീസ്‌ മേധാവിയെ രായ്‌ക്കുരാമാനം ജില്ലയില്‍ നിന്നും സ്ഥലം മാറ്റി സബ്‌ കളക്‌ടറെ സ്ഥലം മാറ്റാനായി കിണഞ്ഞു ശ്രമിച്ചു കൊണ്ടിരിക്കുന്നു. കൂടാതെ സബ്‌ കളക്‌ടറെ ശാരീരകികവും മാനസികവുമായി പീഢിപ്പിക്കുന്നു. പോലീസ്‌ കാഴ്‌ചക്കാരെ പോലെ നോക്കി നില്‍ക്കുന്നു.
ഇപ്പോള്‍ ദേവികുളം സബ്‌ കളക്‌ടര്‍ക്ക്‌ പിന്തുണ പ്രഖ്യാപിച്ച്‌ സമരത്തിന്‌ ഇറങ്ങിയിരിക്കുന്ന യു.ഡി.എഫ്‌ നേതൃത്വം കഴിഞ്ഞ യു.ഡി.എഫ്‌ ഭരണകാലത്തെ അനുഭവങ്ങള്‍ ഒന്ന്‌ ഓര്‍മ്മിക്കുന്നത്‌ നന്നായിരിക്കും. കഴിഞ്ഞ സര്‍ക്കാരിന്റെ കാലത്ത്‌ ദേവികുളം സബ്‌കളക്‌ടറായിരകുന്ന എം.ജി. രാജമാണിക്ക്യം നടത്തിയ വെളിപ്പെടുത്തലുകള്‍ അവര്‍ മറന്നിട്ടുണ്ടാവില്ല എന്നു കരുതാം. മൂന്നാറിലെ കയ്യേറ്റങ്ങളെക്കുറിച്ച്‌ 150 ല്‍ പരം പരാതികള്‍ പോലീസിനു നല്‍കിയിട്ടും അതിലൊന്നിലും പോലീസ്‌ ഒരു നടപടിയും സ്വീകരിച്ചില്ല എന്നു വെളിപ്പെടുത്തലുകള്‍ ഉണ്ടായതും ഉമ്മന്‍ ചാണ്ടി സര്‍ക്കാരിന്റെ കാലത്തായിരുന്നു.
കുടിയേറ്റങ്ങളേയും കയ്യേറ്റങ്ങളേയും തിരിച്ചറിഞ്ഞ്‌ നിയമങ്ങള്‍ സൃഷ്‌ടിക്കാനും ശക്തമായ നിയമനടപടികള്‍ സ്വീകരിക്കുവാനും ഇശ്ചാശക്തിയുള്ള ഭരണകൂടങ്ങള്‍ ഉണ്ടാവുകയും അത്തരം നീക്കങ്ങളെ പിന്തുണക്കാനും സഹായിക്കാനും ജനങ്ങളും ജുഡീഷ്യറിയും തയ്യാറാവുകയും ചെയ്യാത്തിടത്തോളം കാലം സ്വാധീനവും, പണവും, അധികാരവും ഉള്ളവര്‍ കയ്യേറ്റങ്ങള്‍ തുടര്‍ന്നുകൊണ്ടേയിരിക്കും.
കയറിക്കിടക്കാന്‍ ഒരടി മണ്ണ്‌ പേലും സ്വന്തമായി ഇല്ലാതെ ആയിരങ്ങള്‍ കട തിണ്ണകളിലും പ്ലാസ്റ്റിക്‌ ഷീറ്റുകള്‍ക്കുള്ളിലും അന്തിയുറങ്ങുമ്പോള്‍, നൂറും ആയിരവും ഏക്കര്‍ ഭൂമി വെട്ടിപ്പിടിക്കുന്നവരെ സംരക്ഷിക്കുകയും സഹായിക്കുകയും ചെയ്യുന്ന രാഷ്‌ട്രീയ, മത. ഉദ്യോഗസ്ഥ കയ്യേറ്റ മാഫിയകളെ നിലയ്‌ക്കു നിര്‍ത്തേണ്ട കാലം അതിക്രമിച്ചു.
മൂന്നാറില്‍ നടക്കുന്ന അനധികൃത കയ്യേറ്റങ്ങളും, നിര്‍മ്മാണ പ്രവര്‍ത്തനങ്ങളും ഇനിയും നിയന്ത്രിക്കാന്‍ അധികാരികള്‍ തയ്യാറായില്ലങ്കില്‍ മൂന്നാര്‍ എന്നന്നേക്കുമായി നഷ്‌ടപ്പെടുന്ന കാലം വിദൂരമല്ല. അടിയന്തിരമായ ഒരു ഇടപടല്‍ കേന്ദ്ര സര്‍ക്കാരിന്റേയും, വനം പരിസ്ഥിതി മന്ത്രാലയത്തിന്റേയും, ഭാഗത്തു നിന്നും ഈ വിഷയത്തില്‍ ഉണ്ടാകേണ്ടിയിരിക്കുന്നു.
മൂന്നാറില്‍ നടക്കുന്ന അനധികൃത നിര്‍മ്മാണ പ്രവര്‍ത്തനങ്ങള്‍ നമ്മെ ഭീതിയോടെ ഓര്‍മ്മപ്പെടുത്തുന്നത്‌, ഏതാനും നാളുകള്‍ക്ക്‌ മുമ്പ്‌ ഉത്തരാഖണ്‌ഡില്‍ ഉണ്ടായ ദുരന്ത സംഭവങ്ങളെയാണ്‌. ദുരന്തങ്ങള്‍ സംഭവിച്ചതിനുശേഷം വിലപിക്കുന്നതില്‍ അര്‍ത്ഥമില്ല. വന്‍ ദുരന്തങ്ങളെ വിളിച്ചു വരുത്താതിരിക്കുവാനാണ്‌ നാം ശ്രമിക്കേണ്ടത്‌. എല്ലാവിധ നിയമങ്ങളും കാറ്റില്‍ പറത്തികൊണ്ട്‌ പണിതുയര്‍ത്തുന്ന ബഹു നില കെട്ടിടങ്ങള്‍ ഇവിടുത്തെ പരിസ്ഥിതിക്ക്‌ മാത്രമല്ല മനുഷ്യരുടെ ജീവനും സ്വത്തിനുംപോലും ഭീഷണി ഉയര്‍ത്തുന്നുണ്ട്‌. ഏതാനും ദിവസങ്ങള്‍ക്ക്‌ മുമ്പ്‌ ഒരു വലിയ പാറ അടര്‍ന്നു വീണ്‌ ഒരു ബഹുനില കെട്ടിടത്തിന്റെ ഭിത്തികള്‍ക്കും മറ്റും നാശനഷ്‌ടങ്ങള്‍ ഉണ്ടായിട്ടുണ്ട്‌. ഏതാനും മീറ്ററുകളുടെ വ്യത്യാസത്തില്‍ സ്ഥലം മാറിയാണ്‌ ആ പാറ അടര്‍ന്നു വന്നതെങ്കില്‍ മൂന്നാറിനെ തന്നെയല്ല കേരളത്തെ ആകെ നടുക്കുന്ന ഒരു ദുരന്തമായി അത്‌ മാറിയേനെ.
മൂന്നാറിലെ കാലാവസ്ഥയാണ്‌ മറ്റ്‌ വിനോദ സഞ്ചാര കേന്ദ്രങ്ങളില്‍ നിന്നും മൂന്നാറിനെ വ്യത്യസ്ഥയാക്കുന്നത്‌. വംശനാശം നേരിടുന്ന വരയാടുകള്‍ക്കു വേണ്ടിയുള്ള ഇരവികുളം ദേശീയ ഉദ്യാനം, പന്ത്രണ്ട്‌ വര്‍ഷത്തിലൊരിക്കല്‍ പൂക്കുന്ന നീലക്കുറിഞ്ഞി, പാമ്പാടും പാറ, മതികെട്ടാന്‍ ചോല ദേശീയ ഉദ്യാനങ്ങള്‍, അനേകായിരം ജീവജാലങ്ങള്‍ എന്നിവയെല്ലാം മൂന്നാറിന്റെ മാത്രം പ്രത്യേകതകളാണ്‌. ഇവയെല്ലാം സംരക്ഷിക്കപ്പെടണമെങ്കില്‍ മൂന്നാറിന്റെ തനത്‌ സൗന്ദര്യവും സംരക്ഷിക്കപ്പെടണം.
മൂന്നാറിലെ പുഴ കയ്യേറ്റങ്ങളും നാം കണ്ടില്ലന്നു നടിക്കുന്നു. മൂന്നാറിന്റെ ഹൃദയമായിരുന്ന മുതിരപുഴയാറും പാമ്പാറും ഇന്ന്‌ നമുക്ക്‌ നഷ്‌ടമായി കൊണ്ടിരിക്കുന്നു. മുതിരപ്പുഴയാര്‍ കയ്യേറി കെട്ടിടങ്ങള്‍ നിര്‍മ്മിക്കുന്നതിനു മുന്നോടിയായി മാലിന്യ കൂമ്പാരങ്ങള്‍ പുഴയിലേക്ക്‌ തള്ളി പുഴയെ തന്നെ ഇല്ലാതാക്കുന്നു.
കണ്ണന്‍ദേവന്‍ കുന്നുകളുടെ സംരക്ഷണത്തിനായി അന്വേഷണ കമ്മീഷന്‍ റിപ്പോര്‍ട്ടുകളും വിദഗ്‌ദസമിതിറിപ്പോര്‍ട്ടുകളും, സര്‍ക്കാര്‍ ഉത്തരവുകളും, നിയമങ്ങളും എല്ലാം ധാരാളം ഉണ്ട്‌. പക്ഷെ ഒന്നും കാര്യക്ഷമമായി നടപ്പിലാക്കാന്‍ യാതൊരു നീക്കങ്ങളും നടക്കുന്നില്ലന്നു മാത്രം. രാജന്‍ മധേക്കര്‍ റിപ്പോര്‍ട്ടും, പി.സി. സനല്‍കുമാര്‍ ഐ.എ.എസിന്റെ നേതൃത്വത്തിലുള്ള സമിതി റിപ്പോര്‍ട്ടും നിവേദിത പി ഹരന്റെ റിപ്പോര്‍ട്ടും ഉള്‍പ്പടെയുള്ള എണ്ണിയാല്‍ ഒടുങ്ങാത്ത റിപ്പോര്‍ട്ടുകള്‍ എല്ലാം സുഖസുഷുപ്‌തിയില്‍ ആണ്ടിരിക്കുകയാണ്‌.
പശ്ചിമ ഘട്ടത്തിന്റ ഭാഗമായ കണ്ണന്‍ദേവന്‍ കുന്നുകള്‍ വനഭൂമിയാണ്‌ എന്ന്‌ നിയമപരമായും ഭൗതികമായും രേഖകളുടെ അടിസ്ഥാനത്തില്‍ തെളിയിച്ചിട്ടുള്ളതാണ്‌. അതുകൊണ്ട്‌ തന്നെ അവയ്‌ക്കുമേല്‍ കേന്ദ്ര സര്‍ക്കാരിന്‌ ഏതു നിലയിലുള്ള നിയന്ത്രണങ്ങളും കൊണ്ടുവരുവാന്‍ ഒരു തടസ്സവുമില്ല. 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമത്തിനു കീഴില്‍ വരുന്ന ഭൂമിയില്‍ കണ്ണന്‍ ദേവന്‍ കമ്പനിക്ക്‌ തേയില കൃഷിക്ക്‌ പാട്ടത്തിന്‌ നല്‍കിയിട്ടുള്ള ഭൂമി കഴിച്ച്‌ ബാക്കിയുള്ള മുഴുവന്‍ പ്രദേശങ്ങളും സംരക്ഷിക്കുന്നതിനും നിര്‍മ്മാണ പ്രവര്‍ത്തനങ്ങള്‍ നിയന്ത്രിക്കുന്നതിനും നടപടികള്‍ സ്വീകരിക്കുവാനും കേന്ദ്രസര്‍ക്കാരിന്‌ അധികാരമുണ്ട്‌. മാത്രവുമല്ല 1980 ലെ കേന്ദ്ര വന നിയമം കണ്ണന്‍ ദേവന്‍ കുന്നുകളിലെ മുഴുവന്‍ ഭൂമിക്കും ബാധകമാണന്നും രേഖകള്‍ വ്യക്തമാക്കുന്നുണ്ട്‌. 12/12/1996 ലെ ബഹുമാനപ്പെട്ട സുപ്രീം കോടതിയുടെ WP (C) 202/95 -ാം നമ്പര്‍ വിധി അനുസരിച്ച്‌ ഇവിടെ വനേതരമായ എന്ത്‌ പ്രവര്‍ത്തനം നടത്തണെങ്കിലും കേന്ദ്ര സര്‍ക്കാരിന്റേയും, കേന്ദ്ര വനം പരിസ്ഥിതി മന്ത്രാലയത്തിന്റേയും മുന്‍കൂര്‍ അനുമതി വേണമെന്ന്‌ വ്യക്തമാക്കുന്നുണ്ട്‌.
യഥാര്‍ഥത്തില്‍ ദേവികുളം താലൂക്കില്‍ പട്ടയം നല്‍കണമെങ്കിലോ ഭൂമി വനമിതര ആവശ്യങ്ങള്‍ക്കായി ഉപയോഗിക്കണമെങ്കിലോ കേന്ദ്ര വനംപരിസ്ഥിതി മന്ത്രാലയത്തിന്‍െറ അനുമതി വേണ്ടതാണ്‌. എന്നാല്‍ ഇക്കാര്യങ്ങള്‍ സംസ്ഥാന സര്‍ക്കാരും ഉദ്യോഗസ്ഥരും മറച്ചുവയ്‌ക്കുകയാണ്‌.
കണ്ണന്‍ ദേവന്‍ കുന്നുകളെ സംബന്ധിച്ച ചോദ്യത്തിന്‌ 1923 എപ്രില്‍ 11 ന്‌ തിരുവിതാംകൂര്‍ നിയമസഭയില്‍ നല്‍കിയ മറുപടി അനുസരിച്ചും 1927 ജൂലൈ 29 ലെ തിരുവിതാംകൂര്‍ നിയമസഭ രേഖകള്‍ പ്രകാരവും, 1971 മാര്‍ച്ച്‌ 30 ന്‌ കേരള നിയമസഭയില്‍ അവതരിപ്പിച്ച 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമം അനുസരിച്ചും, 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമത്തിന്‍െറ തുടര്‍ച്ചയായി ഏറ്റെടുത്ത ഭൂമിയുടെ വിനിയോഗം എങ്ങനെയായിരിക്കണമെന്ന്‌ ശിപാര്‍ശ നല്‍കാന്‍സര്‍ക്കാര്‍ ചുമതലപ്പെടു ത്തിയിയ കമ്മറ്റിയുടെ റിപ്പോര്‍ട്ട്‌ അനുസരിച്ചും , 1974 മാര്‍ച്ച്‌ 29 ലെ ലാന്‍ഡ്‌ ബോര്‍ഡ്‌ അവാര്‍ഡ്‌ അനുസരിച്ചും, കേരള സര്‍ക്കാരിന്റെ 1977 ഫെബ്രുവരി 19 ലെ ജി. ഒ. (എം.എസ്‌) 262/77 -ാം നമ്പര്‍ സര്‍ക്കാര്‍ ഉത്തരവ്‌ പ്രകാരവും, 1996 ഡിസംബര്‍ 12 ലെ സുപ്രിം കോടതി വിധി പ്രകാരം നിയോഗിച്ച വി. ഗോപിനാഥന്‍ കമ്മിറ്റി റിപ്പോര്‍ട്ട്‌ അനുസരിച്ചും, കേരള സര്‍ക്കാര്‍ 2010 ഒക്ടോബറില്‍ 17066.49 ഏക്കര്‍ കണ്ണന്‍ ദേവന്‍ റിസര്‍വായി പ്രഖ്യാപിച്ച്‌ നടത്തി സര്‍ക്കാര്‍ വിഞ്‌ജാപനം അനുസരിച്ചും, മൂന്നാര്‍ ഉള്‍പ്പെടുന്ന പശ്ചിമ ഘട്ടത്തില്‍ വ്യാപകമായ കയ്യേറ്റം നടക്കുന്നുവെന്ന റിപ്പോര്‍ട്ടിന്റെ അടിസ്ഥാനത്തില്‍ വനം പരിസ്ഥിതി മന്ത്രാലയത്തിലെ മേഖലാ സി. സി. എഫ്‌ ഡോ. കെ. എസ്‌ റെഡ്ഡി അദ്ധ്യക്ഷനായി നാലംഗ സമിതിയുടെ അന്വേഷണ റിപ്പോര്‍ട്ട്‌ അനുസരിച്ചും, മൂന്നാറിലെ ഭൂമി കൈയേറ്റവും തടയണ നിര്‍മാണവും ഉള്‍പ്പെടെയുള്ള വിഷയങ്ങള്‍ അന്വേഷിച്ച ഭൂമി കേരളം പ്രോജക്ട്‌ ഡയറക്ടര്‍ ബിജു പ്രഭാകര്‍ ഐ.എ. എസ്‌ നല്‍കിയ റിപ്പോര്‍ട്ട്‌ അനുസരിച്ചും കണ്ണന്‍ ദേവന്‍ കുന്നുകള്‍ വനഭൂമിയാണന്നും 1980 ലെ കേന്ദ്ര വന നിയമം കണ്ണന്‍ ദേവന്‍ കുന്നുകളിലെ മുഴുവന്‍ ഭൂമിക്കും ബാധകമാണന്നും വ്യക്തമാക്കുന്നുണ്ട്‌.
മുന്നാറില്‍ സര്‍ക്കാരിന്‌ വിട്ട്‌ കിട്ടിയ ഭൂമി മാത്രമല്ല സ്ഥാപനങ്ങളടെ ഭുമിയും വന്‍തോതില്‍ അന്യാധീനപ്പെട്ടു. സര്‍ക്കാര്‍ ഭൂമിയില്‍ റിസോര്‍ട്ടുകള്‍ ഉയര്‍ന്നത്‌ കാണാതെ പോയി പലരും. വിദ്യാഭ്യാസ, പൊതുമരാമത്ത്‌, ടൂറിസം വകുപ്പുകള്‍, വൈദ്യുതി ബോര്‍ഡ്‌, കെ. എസ്‌. ആര്‍. ടി. സി എന്നിവര്‍ക്ക്‌ ലാന്‍ഡ്‌ ബോര്‍ഡ്‌ അവാര്‍ഡിലൂടെ കിട്ടിയ ഭൂമിയാണ്‌ സ്വകാര്യ വ്യക്തികള്‍ കയ്യേറിയത്‌.
മൂന്നാറിലെ കയ്യേറ്റങ്ങളെക്കുറിച്ചും അനധികൃത നിര്‍മ്മാണ പ്രവര്‍ത്തനങ്ങളെക്കുറിച്ചും പഠിക്കാനിറങ്ങുന്ന ഏതൊരാള്‍ക്കും കയ്യില്‍ കിട്ടുന്ന രേഖകള്‍ പരിശോധിച്ച്‌ ബോദ്ധ്യപ്പെടുവാന്‍ കുറഞ്ഞത്‌ ഒരു വര്‍ഷമെങ്കിലും വേണ്ടി വരും വളരെ നിസ്സാരമായി കൈകാര്യം ചെയ്യേണ്ട ഒരു വിഷയത്തെ അത്ര കണ്ട്‌ സങ്കീര്‍ണ്ണമാക്കി മാറ്റുവാന്‍ കാലാകാലങ്ങളിലായി ഭരണം നടത്തിയവര്‍ക്കും അവരുടെ കയ്യാളുകള്‍ക്കും സാധിച്ചിരിക്കുന്നു. എണ്ണിയാല്‍ ഒടുങ്ങാത്ത നടപടിക്രമങ്ങളും സര്‍ക്കാര്‍ ഉത്തരവുകളും, നിയമ നിര്‍മ്മാണങ്ങളും, വ്യക്തികളും, വിദഗ്‌ദ സമിതികളും നടത്തിയ അന്വേഷണ റിപ്പോര്‍ട്ടുകളും, കേന്ദ്ര സംസ്ഥാന സര്‍ക്കാരുകളുടെ ഇടപെടലുകളും, സുപ്രീം കോടതിയുടേയും ഹൈക്കോടതിയുടേയും വിധികളും തുടങ്ങി സാധാരണ മനുഷ്യന്റെ ചിന്തകളേയും വിചാരങ്ങളേയും കടന്നാക്രമിക്കുന്ന ഇടപെടലുകളാണ്‌ മൂന്നാറില്‍ നടന്നിട്ടുള്ളത്‌. കടലിനെ വെല്ലുന്ന ആ അഗാത തലങ്ങളിലേക്ക്‌ ഒന്നു ഊളിയിടുവാനുള്ള ശ്രമമാണ്‌ ഇവിടെ നടത്തുന്നത്‌

കണ്ണന്‍ ദേവന്‍ മലനിരകള്‍ എന്ന സമസ്യ
ഇടുക്കി ജില്ലയില്‍ ദേവികുളം താലൂക്കിലെ മൂന്നാറിന്‌ ചുറ്റുവട്ടത്തായി വരുന്ന പ്രദേശത്തെയാണ്‌ കണ്ണന്‍ദേവന്‍ മലനിരകള്‍ എന്ന പേരില്‍ അറിയപ്പെടുന്നത്‌. പത്തൊന്‍പതാം നൂറ്റാണ്ടില്‍ അവിടത്തെ ഊരു മൂപ്പനായിരുന്ന കണ്ണന്‍ തേവറില്‍ നിന്നുമാണ്‌ ഈ പേര്‌ ലഭ്യമായത്‌ എന്നാണ്‌ പറയപ്പെടുന്നത്‌ . ഇടതൂര്‍ന്ന വനങ്ങളും മുട്ടക്കുന്നുകളുമായി കിടന്നിരുന്ന ഭൂമിയായിരുന്നു ഇത്‌. തിരുവിതാംകൂര്‍ രാജവംശത്തിന്റെ കീഴിലായിരുന്ന ഈ ഭൂമിയുടെ ജന്മാവകാശം പൂഞ്ഞാര്‍ കോവിലകത്തിനായിരുന്നു.
മദിരാശി സംസ്ഥാനവും തിരുവിതാംകൂറും തമ്മില്‍ ഈ പ്രദേശത്തെ ചൊല്ലി നിലനിന്നിരുന്ന തര്‍ക്കം പരിഹരിക്കുന്നതിന്റെ ഭാഗമായാണ്‌ ജോണ്‍ ഡാനിയല്‍ മണ്‍ട്രോ എന്ന ഇംഗ്ലീഷുകാരന്‍ 1870 ല്‍ ആദ്യമായി കണ്ണന്‍ദേവന്‍ കുന്നുകള്‍ സന്ദര്‍ശിക്കുന്നത്‌. ഈ സ്ഥലം കണ്ട സായിപ്പിന്‌ ഇവിടെ കൃഷി ചെയ്യാന്‍ താത്‌പര്യം ഉണ്ടാവുകയും ഈ പ്രദേശത്തിന്റെ ജന്മികളായ പൂഞ്ഞാര്‍ രാജവംശത്തെ ആഗ്രഹം അറിയിക്കുകയും ചെയ്‌തു.
1877 ജൂലൈ 11 ന്‌ ജോണ്‍ ഡാനിയല്‍ മണ്‍ട്രോ എന്ന ഇംഗ്ലീഷുകാരന്‍ പൂഞ്ഞാര്‍ രാജകുടുംബത്തിലെ പൂഞ്ഞാറ്റില്‍ കോയിക്കല്‍ രോഹിണി തിരുനാള്‍ കേരളവര്‍മ്മ വലിയ രാജയില്‍ നിന്നും 227 സ്‌ക്വയര്‍ മൈല്‍ (1,36,600 ഏക്കര്‍) വരുന്ന കണ്ണന്‍ ദേവന്‍ കുന്നുകള്‍ കാപ്പി കൃഷിക്കായി പാട്ടത്തിന്‌ എടുക്കുന്ന തോടെയാണ്‌ മൂന്നാറിന്‍െറ ചരിത്രം ആരംഭിക്കുന്നത്‌. 3,000 രൂപാ വാര്‍ഷിക പാട്ടവും 5,000 രൂപാ സെക്യുരിറ്റി ഡിപ്പോസിറ്റും സമ്മതിച്ച്‌ പാട്ടച്ചീട്ട്‌ എഴുതുകയും ചെയ്‌തു. പ്രദേശത്തിന്റെ വികസനത്തെ ലക്ഷ്യമാക്കി 1878 ല്‍ തിരുവിതാംകൂര്‍ മഹാരാജാവ്‌ ഈ പാട്ട ഉടമ്പടി പുതുക്കി. 1879 ല്‍ നോര്‍ത്ത്‌ ട്രാവന്‍കൂര്‍ അഗ്രികള്‍ച്ചറല്‍ സൊസൈറ്റി എന്ന പേരില്‍ ഒരു സൊസൈറ്റിക്ക്‌ മണ്‍ട്രോ രൂപം നല്‍കി. ആ സൊസൈറ്റിയിലെ അംഗങ്ങള്‍ അവരവരുടേതായി വിവിധ എസ്റ്റേറ്റുകള്‍ക്ക്‌ രൂപം നല്‍കി. വിവിധ തരം കൃഷികള്‍ അവിടെ പരീക്ഷിച്ചെങ്കിലും തേയില കൃഷിക്കാണ്‌ ഇവിടം അനുയോജ്യമെന്ന്‌ കണ്ട്‌ പിന്നീടാണ്‌ തേയില കൃഷിയിലേക്ക്‌ മൂന്നാര്‍ മാറിയത്‌. 1895 ല്‍ ഇതില്‍ ഭൂരിഭാഗം എസ്റ്റേറ്റുകളും ഫിനാലെ മൂര്‍ ആന്റ്‌ കമ്പനി (ജെയിംസ്‌ ഫിന്‍ലെ ആന്റ്‌ കമ്പനി ലിമിറ്റഡ്‌) സ്വന്തമാക്കി. മുപ്പത്തിമൂന്ന്‌ എസ്റ്റേറ്റുകള്‍ ഈനിലയില്‍ കമ്പനി നടത്തിവന്നു. 1897 ല്‍ ഈ എസ്റ്റേറ്റുകളുടെ എല്ലാം നിയന്ത്രണത്തിനായി കണ്ണന്‍ദേവന്‍ ഹില്‍സ്‌ പ്രൊഡ്യൂസിംഗ്‌ കമ്പനി ആരംഭിച്ചു. 1924 ല്‍ കാലാവസ്ഥ വ്യതിയാനത്തെ തുടര്‍ന്ന്‌ പേമാരിയും വെള്ളപ്പൊക്കവും ഉണ്ടാവുകയും മൂന്നാര്‍ പ്രദേശം വെള്ളത്തിനടിയില്‍ ആവുകയും വലിയതോതില്‍ കൃഷിനാശവും സംഭവിക്കുകയും ചെയ്‌തു. മിക്ക എസ്റ്റേറ്റുകളും റീപ്ലാന്റ്‌ ചെയ്യേണ്ടതായും വന്നു.
1976 ല്‍ ആണ്‌ റ്റാറ്റാ രംഗപ്രവേശം ചെയ്യുന്നതും ജെയിംസ്‌ ഫിന്‍ലെ ആന്റ്‌ കമ്പനിയുമായി ചേര്‍ന്നു പ്രവര്‍ത്തിക്കുവാന്‍ തുടങ്ങുന്നതും 1964 ല്‍ റ്റാറ്റാ ഫിനാലെ എന്ന പുതിയ ഗ്രൂപ്പിന്‌ രൂപം നല്‍കി.1983 ആയപ്പോഴേക്കും കമ്പനികള്‍ പൂര്‍ണ്ണമായും റ്റാറ്റായുടെ നിയന്ത്രണത്തില്‍ ആവുകയും റ്റാറ്റാ റ്റീ ലിമിറ്റഡ്‌ എന്ന കമ്പനി രൂപീകരിക്കുകയും എസ്റ്റേറ്റുകള്‍ പൂര്‍ണ്ണമായും റ്റാറ്റായുടെ നിയന്ത്രണത്തിലായി. 2005 ല്‍ ആണ്‌ റ്റാറ്റാ റ്റീ ലിമിറ്റഡ്‌ എന്ന കമ്പനി എസ്റ്റേറ്റുകള്‍ മുഴുവന്‍ കണ്ണന്‍ദേവന്‍ ഹില്‍സ്‌ പ്ലാന്റേഷന്‍ കമ്പനി പ്രൈവറ്റ്‌ ലിമിറ്റഡ്‌ (KDHPC) എന്ന പുതിയ കമ്പനിക്ക്‌ കൈമാറി.
ഇതേസമയം, കണ്ണന്‍ ദേവന്‍ കുന്നുകളിലെ ഭൂമിയുടെ അളവിനെ സംബന്ധിച്ച്‌ സര്‍ക്കാരിനും കൃത്യമായ വിവരങ്ങളുണ്ടായിരുന്നില്ല. 1923 എപ്രില്‍ 11 ന്‌ തിരുവിതാംകൂര്‍ നിയമസഭയില്‍ നല്‍കിയ മറുപടിയില്‍ പറയുന്നത്‌ 1,37,433.6 ഏക്കര്‍ ഭൂമിയുണ്ടെന്നും അതില്‍ 34,422.68 ഏക്കറില്‍ കൃഷിയുണ്ടെന്നുമാണ്‌. 1927 ജൂലൈ 29 ലെ തിരുവിതാംകൂര്‍ നിയമസഭ രേഖകള്‍ പ്രകാരം ആകെ ഭൂമി 1,37,431.89 ഏക്കറാണ്‌. ഇതില്‍ 99,318.57 ഏക്കര്‍ വനമാണെന്നും നിയമസഭയില്‍ അറിയിച്ചു.
സ്വാതന്ത്ര്യാനന്തരം കേരള സംസ്ഥാനം രൂപീകൃതമായതോടെ ഈ ഭൂമിയുടെ മുഴുവന്‍ അവകാശികള്‍ സംസ്ഥാന സര്‍ക്കാരായി മാറി. കണ്ണന്‍ ദേവന്‍ മലനിരകളുടെ അവകാശം പൂര്‍ണ്ണമായും സംസ്ഥാന സര്‍ക്കാരില്‍ നിക്ഷിപ്‌തമാക്കുക എന്ന ലക്ഷ്യത്തോടെയാണ്‌ 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമം വരുന്നത്‌. കണ്ണന്‍ ദേവന്‍ ഹില്‍സിലെ മുഴുവന്‍ ഭൂമിയും സര്‍ക്കാര്‍ തിരിച്ച്‌ എടുക്കുകയും 21-01-1971 മുതല്‍ സര്‍ക്കാര്‍ ഭൂമിയാക്കി മാറ്റുകയും ചെയ്‌തു.
ഇത്തരത്തില്‍ ഭൂമി ഏറ്റെടുത്ത സര്‍ക്കാര്‍ തീരുമാനത്തിന്‌ എതിരെ കണ്ണന്‍ദേവന്‍ കമ്പനി ബഹു. സുപ്രീംകോടതിയില്‍ 1971 ലെ 40 -ാം നമ്പരായി റിട്ട്‌ പെറ്റീഷന്‍ ഫയല്‍ ചെയ്യുയ്‌തെങ്കിലും കമ്പനിയുടെ വാദഗതികള്‍ കോടതി അംഗീകരിച്ചില്ലന്നു മാത്രമല്ല ഹര്‍ജി ബഹു. സുപ്രീംകോടതി തള്ളുകയും ചെയ്‌തു.
കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമം നടപ്പിലായതിനുശേഷമുള്ള വിവിധ വിഷയങ്ങളിലുള്ള തര്‍ക്കങ്ങള്‍ പരിഹരിക്കുന്നതിനായി സര്‍ക്കാര്‍ ഒരു ലാന്റ്‌ബോര്‍ഡിന്‌ രൂപം നല്‍കി. 1974 മാര്‍ച്ച്‌ 29 ന്‌ LBA-2-5227/71 -ാം നമ്പരായി ലാന്‍ഡ്‌ ബോര്‍ഡ്‌ ഉത്തരവ്‌ ഇറക്കുകയും ചെയ്‌തു. 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമ പ്രകാരം ഏറ്റെടുത്ത 1,27,881 ഏക്കറില്‍ 57359 ഏക്കറാണ്‌ കമ്പനിക്ക്‌ പാട്ടത്തിന്‌ തിരിച്ച്‌ നല്‍കിയത്‌. 70522 ഏക്കര്‍ ഭൂമി സര്‍ക്കാരില്‍ നിലനിര്‍ത്തി. ഇതില്‍ മേലാച്ചേരി റിവര്‍ വാലിയിലെ 5000 ഏക്കര്‍ സ്ഥലം ഭൂമി ഇല്ലാത്ത പാവപ്പെട്ടവര്‍ക്ക്‌ പതിച്ചു നല്‍കാന്‍ നിര്‍ദ്ദേശിച്ചെങ്കിലും അവ വാസയോഗ്യമല്ലന്ന്‌ കണ്ടെത്തുകയായിരുന്നു.
1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമ പ്രകാരവും തുടര്‍ന്നു വന്ന ലാന്റ്‌ ബോര്‍ഡ്‌ അവാര്‍ഡും പ്രകാരം സര്‍ക്കാരില്‍ നിക്ഷിപ്‌തമായ 70522 ഏക്കര്‍ ഭൂമി എങ്ങിനെ കൈകാര്യം ചെയ്യണമെന്നതിനെക്കുറിച്ച്‌ പഠിച്ച്‌ റിപ്പോര്‍ട്ട്‌ നല്‍കുന്നതിനായി 1975 ല്‍ ജി.ഒ. (എം.എസ്‌.) 993/75/RD Rev. (N) /02-09-75 -ാം നമ്പര്‍ ഉത്തരവിന്‍ പ്രകാരം സര്‍ക്കാര്‍ വിദഗ്‌ദ സമിതിയെ നിയമിച്ചു. ചീഫ്‌ ഫോറസ്റ്റ്‌ കണ്‍സര്‍വേറ്റര്‍, സര്‍വ്വെ ആന്റ്‌ ലാന്റ്‌ റിക്കാര്‍ഡ്‌സ്‌ ഡയറക്‌ടര്‍, സോയില്‍ കണ്‍സര്‍വേഷന്‍ ഡെപ്യൂട്ടി ഡയറക്‌ടര്‍, ഇടുക്കി ജില്ലാ കളക്‌ടര്‍ എന്നിവരടങ്ങുന്നതായിരുന്നു വിദഗ്‌ദ സമിതി. സര്‍ക്കാരില്‍ നിക്ഷ്‌പ്‌തമായ ഭൂമി ഓരോ ബ്ലോക്കിലും ഏതു രീതിയില്‍ ഉപയോഗിക്കണം എന്നതിനെക്കുറിച്ച്‌ വിശദമായ റിപ്പോര്‍ട്ട്‌ സമര്‍പ്പിച്ചു.
വിദഗ്‌ദ സമിതിയുടെ ശുപാര്‍ശകള്‍ അംഗീകരിച്ച സര്‍ക്കാര്‍ അവരുടെ നിര്‍ദ്ദേശങ്ങള്‍ അനുസരിച്ച്‌ ഭൂമി ഉപയോഗിക്കേണ്ടതു സംബന്ധിച്ച്‌ 18-04-1980 ല്‍ ജി.ഒ.(എം.എസ്‌.) 379/80/RD -ാം നമ്പരായി സര്‍ക്കാര്‍ ഉത്തരവ്‌ ഇറക്കി. അവസാന കണക്കുകള്‍ അനുസരിച്ച്‌ സര്‍ക്കാരിന്റെ പക്കല്‍ ഉണ്ടായിരുന്ന 70450 ഏക്കറില്‍ 43452.8 ഏക്കര്‍ സ്ഥലം നിലവിലുള്ള അതേ നിലയില്‍ സംരക്ഷിക്കാന്‍ തീരുമാനിച്ചു. 17922 ഏക്കര്‍ സ്ഥലം വനവത്‌കരണത്തിനായി അടിയന്തിരമായി വനം വകുപ്പിന്‌ കൈമാറാന്‍ തീരുമാനിച്ചു. ഇക്കാര്യങ്ങള്‍ അടിയന്തിരമായി നടപ്പിലാക്കുന്നതിനായി ഇടുക്കി ജില്ലാ കളക്‌ടറെ ചുമതലപ്പെടുത്തികൊണ്ട്‌ 02 -11-1988 ല്‍ ജി.ഒ. (എം.എസ്‌.) 787/88/RD -ാം നമ്പരായി സര്‍ക്കാര്‍ ഉത്തരവ്‌ ഇറക്കുകയും ചെയ്‌തു. ഉത്തരവ്‌ ഇറക്കിയപ്പോള്‍ ഒരു ചെറിയ മാറ്റം സംഭവിച്ചു. നിലവിലുള്ള അതേ നിലയില്‍ സംരക്ഷിക്കേണ്ട ഭൂമിയുടെ അളവ്‌ 43244.5 ഏക്കറായി കുറച്ചു. എന്നാല്‍ വനമായി സംരക്ഷിക്കേണ്ട 17922 ഏക്കര്‍ സ്ഥലത്തില്‍ യാതൊരു കുറവും വരുത്തിയില്ല.
ലാന്റ്‌ ബോര്‍ഡ്‌ അവാര്‍ഡ്‌ അനുസരിച്ച്‌ സര്‍ക്കാരില്‍ നിക്ഷിപ്‌തമായ ഭൂമിയില്‍ നിന്നും ക്ഷീര വികസന പദ്ധതികള്‍ക്കായി 1600 ഏക്കറും, കാലിത്തീറ്റക്കായി 300 ഏക്കറും, പച്ചക്കറി തോട്ടങ്ങള്‍ക്കായി രണ്ടിടത്തായി 127.11 ഏക്കറും, പാര്‍പ്പിടങ്ങള്‍ക്കായി 110.21 ഏക്കറും, സ്വന്തമായി വീടില്ലാത്തവര്‍ക്ക്‌ പ്‌ളോട്ടുകളാക്കി വിലക്ക്‌ നല്‍കുന്നതിന്‌ 70.83 ഏക്കറും എന്നിങ്ങനെയാണ്‌ സമിതി നിര്‍ദേശിച്ചത്‌. മാങ്കുളത്തെ 5189.200 ഏക്കര്‍ ഭൂമി പതിച്ച്‌ നല്‍കാന്‍ നിര്‍ദ്ദേശിച്ചു. സര്‍ക്കാര്‍ നിയോഗിച്ച സമിതിയുടെ നിര്‍ദേശങ്ങളില്‍ മാങ്കുളത്തെ മിച്ചഭൂമി പതിച്ച്‌ നല്‍കുന്ന തൊഴിച്ച്‌ മറ്റൊന്നും കാര്യക്ഷമമായി നടപ്പായില്ല.
ലാന്റ്‌ ബോര്‍ഡ്‌ അവാര്‍ഡിന്റേയും സര്‍ക്കാര്‍ ഉത്തരവുകളുടേയും അടിസ്ഥാനത്തില്‍ ഇരവികുളം രാജമല ഏരിയാ 1975 ല്‍ സാന്‍ജോറിയം ആയി പ്രഖ്യാപിച്ചു. 1978 ല്‍ ഇതിനെ ദേശീയ പാര്‍ക്കായി മാറ്റുകയും ചെയ്‌തു. 22253 ഏക്കര്‍ സ്ഥലം 28 – 6 -1980 ല്‍ C4-37166/77 -ാം നമ്പര്‍ ഉത്തരവുപ്രകാരം ഇടുക്കി ജില്ലാ കളക്‌ടര്‍ മാങ്കുളത്തിന്‌ കൈമാറി. പ്രസ്‌തുത സ്ഥലം റിസര്‍വ്‌ ഫോറസ്റ്റായി വിജ്ഞാപനം നടത്തുന്നതിന്‌ 17 -2-2007 ല്‍ ജി.ഒ. (ആര്‍.റ്റി.) 754/07 Rev. -ാം നമ്പരായി സര്‍ക്കാര്‍ തീരുമാനം എടുക്കുകയും 16 -5-2007 ല്‍ ജി.ഒ. (പി.) 25/2007/F &WLD -ാം നമ്പരായി സര്‍ക്കാര്‍ വിജ്ഞാപനം ഇറക്കുകയും ചെയ്‌തു.
12 -12-1996 ല്‍ ബഹുമാനപ്പെട്ട സുപ്രീം കോടതിയില്‍ സമര്‍പ്പിച്ച ജി. 202/1995 -ാം നമ്പര്‍ റിട്ട്‌ പെറ്റീഷന്റെ വിധിന്യായത്തിലൂടെ ഈ പ്രദേശത്തെ വനഭൂമിയെ നിശ്‌ചയിച്ച്‌ റിപ്പോര്‍ട്ട്‌ നല്‍കുന്നതിനായി ഫോറസ്റ്റ്‌ കണ്‍സര്‍വേറ്ററായിരുന്നു വി. ഗോപിനാഥന്‍ ഐ.എഫ്‌. എസിനെ ചെയര്‍മാനായി സുപ്രീം കോടതി ഒരു കമ്മറ്റിയെ നിയോഗിച്ചു.
1999 ല്‍ ഇ.കെ. നയനാര്‍ മുഖ്യമന്ത്രി ആയിരുന്ന കാലത്ത്‌ തൊടുപുഴയില്‍ വച്ച്‌ നടത്തിയ പട്ടയമേളയിലൂടെ ഇടുക്കി ജില്ലയില്‍ കുടിയേറ്റ ഭൂമിക്ക്‌ പട്ടയം നല്‍കാന്‍ തീരുമാനിച്ചു. ആ കൂടെ ദേവികുളം താലൂക്കില്‍ പട്ടയം നല്‍കാന്‍ ചുമതലപ്പെടുത്തിയത്‌ ദേവികുളം അഡീഷണല്‍ തഹസില്‍ദാര്‍ ആയിരുന്ന എം. ഐ. രവീന്ദ്രനെയാണ്‌. 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമ പ്രകാരം കണ്ണന്‍ ദേവന്‍ കുന്നുകളിലെ ഭൂമിക്ക്‌ പട്ടയം നല്‍കാന്‍ അധികാരം ജില്ലാ കളക്‌ടര്‍ക്ക്‌ മാത്രമാണ്‌. ഈ വ്യവസ്ഥ പാലിക്കാതെയാണ്‌ ദേവികുളം താലൂക്കില്‍ 530 പട്ടയങ്ങള്‍ നല്‍കിയത്‌. അതില്‍ 127 ഓളം പട്ടയങ്ങള്‍ കെ.ഡി.എച്ച്‌ വില്ലേജില്‍ പെട്ടവയാണ്‌. ഈ പട്ടയങ്ങളാണ്‌ പിന്നീട്‌ രവീന്ദ്രന്‍ പട്ടയങ്ങള്‍ എന്ന പേരില്‍ കുപ്രസിദ്ധി നേടിയത്‌. ഈ പട്ടയങ്ങള്‍ നിയമ വിരുദ്ധമാണന്ന്‌ കണ്ടെത്തിയതിനെ തുടര്‍ന്ന്‌ 2006 ല്‍ രവീന്ദ്രന്‍ പട്ടയങ്ങളെ ഇടുക്കി ജില്ലാ കളക്‌ടര്‍ അസാധുവായി പ്രഖ്യാപിച്ചു. പിന്നീട്‌ പട്ടയങ്ങളെ അസാധുവാക്കിയ നടപടിയെ കേരള ഹൈക്കോടതിയും ശരിവയ്‌ക്കുകയും ചെയ്‌തു. തൊടുപുഴ സ്വദേശി എന്‍.ജെ. ജോസഫ്‌ എന്നയാള്‍ നല്‍കിയ കേസിന്റെ വിധി പ്രസ്ഥാവത്തിലൂടെയാണ്‌ ബഹുമാനപ്പെട്ട കേരള ഹൈക്കോടതി ജഡ്‌ജി ജസ്റ്റീസ്‌ എ. എം. ഷെരീഫ്‌ രവീന്ദ്രന്‍ പട്ടയങ്ങളെ അസാധുവാക്കിയ നടപടിയെ ശരിവച്ചത്‌.
1977 ലെ സര്‍ക്കാര്‍ വിജ്ഞാപനം അനുസരിച്ച്‌ പട്ടയം നല്‍കുമ്പോള്‍ ആര്‍ക്കൊക്കെയാണ്‌ ഭൂമി പതിച്ചു നല്‍കേണ്ടത്‌ എന്നതിനെ സംബന്ധിച്ച്‌ വ്യക്തമായ മാര്‍ഗ്ഗ നിര്‍ദ്ദേശം നല്‍കിയിരുന്നു. ആകെ പതിച്ചു കൊടുക്കുന്ന ഭൂമിയില്‍ ഇരുപത്തഞ്ച്‌ ശതമാനം പട്ടികജാതി പട്ടിക വര്‍ഗ്ഗക്കാര്‍ക്കും പത്തു ശതമാനം വിമുക്ത ഭടന്‍മാര്‍ക്കുംബാക്കിയുള്ളത്‌ കെ.ഡി.എച്ച്‌ വില്ലേജിലെ സ്ഥിരതാമസക്കാര്‍, ദേവികുളം താലൂക്കില്‍ ഉള്ളവര്‍, ജില്ലയിലുള്ളവര്‍ എന്നീ മുന്‍ഗണനാ ക്രമത്തില്‍ പട്ടയം നല്‍കണമെന്ന നിര്‍ദ്ദേശം ഇവിടെ പാലിക്കപ്പെട്ടില്ല. മാത്രവുമല്ല പന്ത്രണ്ട്‌ വര്‍ഷത്തേക്ക്‌ ഭൂമി കൈമാറ്റം ചെയ്യാന്‍ പാടില്ല, കൃഷി, വീട്‌ നിര്‍മ്മാണം എന്നിവയ്‌ക്കു മാത്രമെ ഭൂമി ഉപയോഗിക്കാന്‍ പാടുള്ളൂ എന്നീ വ്യവസ്ഥകളും പാലിക്കപ്പെട്ടില്ല.
സര്‍ക്കാര്‍ നല്‍കിയ പട്ടയങ്ങള്‍ക്കു പുറമെ ആയിരക്കണക്കിന്‌ വ്യാജ പട്ടയങ്ങളും രവീന്ദ്രന്റെ പേരില്‍ ഒപ്പിട്ടു നല്‍കപ്പെട്ടു എന്നാണ്‌ പല അന്വേഷണ റിപ്പോര്‍ട്ടുകളും പറയുന്നത്‌. രണ്ടായിരമാണ്ടിലേക്ക്‌ കടന്നപ്പോഴേക്കും ഇത്തരം വ്യാജ പട്ടയങ്ങള്‍ ഉപയോഗിച്ചുള്ള കയ്യേറ്റങ്ങളും അനധികൃത കെട്ടിട നിര്‍മ്മാണങ്ങളും സാമന്യ മര്യാദയുടെ എല്ലാ സീമകളും ലംഘിച്ച്‌ അതിന്റെ ഭീകരമായ ഘട്ടത്തിലേക്ക്‌ എത്തി തുടങ്ങിയിരുന്നു. ഇതിനെതിരായ നടപടികള്‍ കാര്യമായൊന്നും അധികാരികളുടെ ഭാഗത്തു നിന്നും ഉണ്ടായിരുന്നില്ലന്നു മാത്രമല്ല കയ്യേറ്റക്കാരെ സഹായിക്കുന്ന നിലപാടുകളുമാണ്‌ ഭൂരിഭാഗം അധികാരികളും സ്വീകരിച്ചു വന്നത്‌.
2003 ല്‍ അന്നത്തെ എ.ഡി.ജി.പി. ആയിരുന്ന രാജന്‍ മഥേക്കര്‍ കയ്യേറ്റങ്ങളേയും അനധികൃത നിര്‍മ്മാണങ്ങളേയും സംബന്ധിച്ച്‌ റിപ്പോര്‍ട്ട്‌ സര്‍ക്കാരിന്‌ കൈമാറുകയുണ്ടായി. ഇതില്‍ അന്‍പതില്‍ താഴെ കയ്യേറ്റങ്ങളാണ്‌ ചൂണ്ടിക്കാട്ടിയിരുന്നത്‌. ഇതേ തുടര്‍ന്നാണ്‌ ഐ.എ.എസ്‌. ഉദ്യോഗസ്ഥനായ പി.സി. സനല്‍കുമാറിന്റെ നേതൃത്വത്തില്‍ വിദഗ്‌ദ സമിതിയെ സര്‍ക്കാര്‍ നിയോഗിച്ചത്‌. അഞ്ഞൂറിനടുത്ത്‌ കയ്യേറ്റങ്ങളാണ്‌ സനല്‍കുമാര്‍ കമ്മറ്റി കണ്ടെത്തി റിപ്പോര്‍ട്ട്‌ നല്‍കിയത്‌. വ്യാജ പട്ടയങ്ങള്‍, വ്യാജ കൈവശ രേഖകള്‍, പട്ടയം സംബന്ധിച്ച്‌ താലൂക്ക്‌ ഓഫീസില്‍ രേഖയില്ലാത്ത സംഭവങ്ങള്‍, ഒരു രേഖയും ഇല്ലാത്ത റിസോര്‍ട്ടുകള്‍, പട്ടയം ഉണ്ടങ്കിലും ഭൂമി ഇല്ലാത്തവര്‍ തുടങ്ങി വളരെ വിശദമായ റിപ്പോര്‍ട്ടാണ്‌ നല്‍കിയിട്ടുള്ളത്‌. ദേവികുളം ആര്‍ ഡി.ഒ. ഓഫീസ്‌ വളപ്പില്‍ രണ്ടു പേര്‍ക്ക്‌ പട്ടയം നല്‍കിയതായും റിപ്പോര്‍ട്ടില്‍ പറയുന്നുണ്ട്‌.
2003 ല്‍ �വണ്‍ എര്‍ത്ത്‌ വണ്‍ ലൈഫ്‌� എന്ന സംഘടന നല്‍കിയ പരാതിയുടെ അടിസ്ഥാനത്തില്‍ ഈ മേഖലയില്‍ ഏലമലകാടുകളില്‍ നടക്കുന്ന കയ്യേറ്റങ്ങളേയും നിയമവിരുദ്ധ പ്രവര്‍ത്തനങ്ങളെക്കുറിച്ച്‌ അന്വേഷിച്ച്‌ റിപ്പോര്‍ട്ട്‌ നല്‍കിയ സമിതിയും ഈ മേഖലയിലെ നിയമവിരുദ്ധ പ്രവര്‍ത്തനങ്ങളെ തുറന്നു കാണിക്കുന്നുണ്ട്‌.
ഈ റിപ്പോര്‍ട്ടുകളുടേയും മറ്റും പശ്ചാത്തലത്തില്‍ മൂന്നാറിലെ കയ്യേറ്റക്കാര്‍ക്ക്‌ എതിരെ നടപടി സ്വീകരിക്കുവാന്‍ 2007 മെയ്‌ മാസം ആദ്യം ദേവികുളം സബ്‌ കളക്‌ടര്‍ രത്തന്‍ ഖേല്‍ക്കര്‍ നടപടി ആരംഭിച്ചിരുന്നു. എം.എം. മണിയുടെ സഹോദരന്റെ ചൊക്രമുടിമലയിലെ കയ്യേറ്റവും മൂന്നാര്‍ ടൗണിലെ പൊതു ശ്‌മശാന കയ്യേറ്റവും സബ്‌കളക്‌ടര്‍ ഒഴുപ്പിച്ചിരുന്നു. അതിനു തൊട്ടു പിന്നാലെയാണ്‌ അച്ചുതാനന്ദന്‍ സര്‍ക്കാര്‍ 2007 മെയ്‌ 13 ന്‌ പ്രത്യേക ദൗത്യ സംഘത്തെ മൂന്നാറിലേക്ക്‌ അയച്ചത്‌. കെ. സുരേഷ്‌കുമാര്‍ ഐ,. എ. എസ്‌., ഐ.ജി. ഋഷിരാജ്‌ സിംഗ്‌. ജില്ലാ കളക്‌ടര്‍ രാജു നാരായണ സ്വാമി എന്നിവരുടെ നേതൃത്വത്തിലുള്ള സംഘത്തെയാണ്‌ അച്ചുതാനന്ദന്‍ മൂന്നാര്‍ ദൗത്യം ഏല്‍പ്പിച്ചത്‌. മൂന്നാര്‍ ടൗണില്‍ നടയാര്‍ റോഡില്‍ നാലു നിലകളിലായി പ്രവര്‍ത്തിച്ചിരുന്ന സമ്മര്‍ കാസില്‍ റിസോര്‍ട്ട്‌ ജെ.സി.ബി. ഉപയോഗിച്ചു പൊളിച്ചു നീക്കികൊണ്ടാണ്‌ മൂന്നാര്‍ ദൗത്യത്തിന്‌ തുടക്കം കറിച്ചത്‌ . മൂന്നാര്‍ ടൗണിലുള്ള സി.പി.ഐ യുടെ ഓഫീസിനു മുന്നില്‍ ജെ.സി.ബി. എത്തിയതോടെ മൂന്നാര്‍ ദൗത്യത്തിന്‌ എതിരെ ശബ്‌ദം ഉയരാന്‍ തുടങ്ങിയിരുന്നു. പിന്നീട്‌ പോതമേട്ടില്‍ ഏലം കുത്തകപ്പാട്ടം ലംഘിച്ച്‌ നിര്‍മ്മാണം നടത്തിയ ബി.സി.ജി. ഗ്രൂപ്പിന്റെ കൈവശമുള്ള 27 ഏക്കര്‍ ഭൂമി ഏറ്റെടുത്ത്‌ നിര്‍മ്മാണത്തിലിരുന്ന 18 കോട്ടേജുകള്‍ ഇടിച്ചു നിരത്തുകയുംചെയ്‌തു. പള്ളിവാസലിലെ മൂന്നാര്‍ വുഡ്‌സ്‌, ലക്ഷ്‌മിയിലെ ഹൈലാന്റ്‌ റിസോര്‍ട്ട്‌, മൂന്നാര്‍ ടൗണിലെ ടീ ഗാര്‍ഡന്‍ ഹോട്ടല്‍ തുടങ്ങിയവയെല്ലാം ദൗത്ത്യത്തിന്റെ ആദ്യ ദിവസങ്ങളില്‍ തന്നെ സംഘം ഇടിച്ചു നിരത്തി. പിന്നീടുള്ള ദിവസങ്ങളില്‍ നിരവധി റിസോര്‍ട്ടുകള്‍ ഇടിച്ചു നിരത്തി ഭൂമികള്‍ സര്‍ക്കാര്‍ ഏറ്റെടുക്കുകയും ചെയ്‌തു. ലക്ഷ്‌മിയില്‍ പ്രവര്‍ത്തിച്ചിരുന്ന ബിസിക്‌സ്‌, നിര്‍മ്മാണത്തിലിരുന്ന അബാദ്‌ ഗ്രൂപ്പ്‌ വക റിസോര്‍ട്ടും, ക്ലൗഡ്‌ നയണ്‍ റിസോര്‍ട്ടും എല്ലാം പൊളിച്ചു നീക്കിയവയില്‍ പെടുന്നതാണ്‌. ശക്തമായ നടപടികളുമായി ദൗത്യം മുന്നോട്ടു നീങ്ങിയപ്പോള്‍ അതുവരെ പരസ്യമായി രംഗത്തു വരാതിരുന്ന സി പിഎം ജില്ലാ ഘടകം പരസ്യമായ എതിര്‍പ്പുമായി രംഗത്ത്‌ എത്തിയതോടെ ദൗത്യ സംഘത്തിന്‌ വഴി മുട്ടി. ജൂണ്‍ 12 ന്‌ ടൗണിലെ ധന്യശ്രീ റിസോര്‍ട്ട്‌ പൊളിക്കുവാനുള്ള ദൗത്യ സംഘത്തിന്റെ ശ്രമത്തിനിടെ പരസ്യമായി ചെറുത്തു നില്‌പുമായി സി പി എം രംഗത്ത്‌ എത്തിയതോടെ ദൗത്യ സംഘത്തിന്‌ അടിതെറ്റുകയായിരുന്നു. ഇതൊടെ ദൗത്യസംഘങ്ങളുടെ ശിഥിലീകരണവും ആരംഭിച്ചു. ആരോഗ്യ കാരണങ്ങള്‍ പറഞ്ഞ്‌ ജൂണ്‍ 17 ന്‌ സുരേഷ്‌കുമാര്‍ ദൗത്യം അവസാനിപ്പിച്ച്‌ മടങ്ങുകയായിരുന്നു. പിന്നീട്‌ ഗോപാലമേനോനും, വി.എം. രാമാനന്ദനും ദൗത്യ സംഘതലവന്‍മാരായി എത്തിയെങ്കിലും അവര്‍ക്ക്‌ കാര്യമായൊന്നും ചെയ്യാനായില്ല. മൂന്നാര്‍ ദൗത്യത്തിന്റെ ഭാഗമായി 11,000 ഏക്കര്‍ കയ്യേറ്റ ഭൂമി തിരിച്ചു പിടിക്കാനായെന്ന്‌ സര്‍ക്കാര്‍ അവകാശപ്പെട്ടെങ്കിലും അവയൊന്നും സംരക്ഷിക്കാതിരുന്നതിനാല്‍ ഭൂരിഭാഗവും അന്യാധീനപ്പെട്ടു.
പശ്ചിമഘട്ടത്തിന്റെ ഭാഗമായ കണ്ണന്‍ദേവന്‍കുന്നുകളില്‍ വ്യാപകമായ കയ്യേറ്റം നടക്കുന്നുവെന്ന്‌ 19 – 02 – 2010 ല്‍ കേരളം സന്ദര്‍ശിച്ച കേന്ദ്ര വനം പരിസ്ഥിതി വകുപ്പ്‌ മന്ത്രി ജയറാം രമേശിന്‌്‌ ലഭിച്ച റിപ്പോര്‍ട്ടിന്റെയും നിവേദനത്തിന്റേയും അടിസ്ഥാനത്തില്‍ F. No.1974/ADG(FC)/2010 -ാം നമ്പര്‍ ഉത്തരവിന്‍ പ്രകാരം വനം പരിസ്ഥിതി മന്ത്രാലയത്തിലെ മേഖലാ സി. സി. എഫ്‌ ഡോ. കെ. എസ്‌ റെഡ്ഡി അദ്ധ്യക്ഷനായി നാലംഗ സമിതിയെ അന്വേഷണത്തിനായി കേന്ദ്രം ചുമതലപ്പെടുത്തി. കെ. എസ്‌ റെഡ്ഡിക്കു പുറമെ കെ. ബി. തമ്പി, ഡോ. ഉല്ലാസ്‌ കാരന്ത്‌, പ്രകൃതി ശ്രീവാസ്‌തവ എന്നിവരായിരുന്നു മറ്റു സംഘാംഗങ്ങള്‍. 2010 ഏപ്രിലില്‍ ഇവര്‍ റിപ്പോര്‍ട്ട്‌ കേന്ദ്ര ഗവര്‍മെന്റിന്‌ സമര്‍പ്പിക്കുകയും ചെയ്‌തു.
ഈ റിപ്പോര്‍ട്ട്‌ അംഗീകരിച്ച കേന്ദ്ര സര്‍ക്കാര്‍ ഈ വിഷയത്തില്‍ അടിയന്തിരമായ നടപടി സ്വീകരിക്കണമെന്നും 17349 ഏക്കര്‍ സ്ഥലം വനഭൂമിയായി പ്രഖ്യാപിക്കണമെന്നും ആവശ്യപ്പെട്ട്‌ കേന്ദ്ര പരിസ്ഥിതി മന്ത്രി ജയറാം രമേശ്‌ 23 – 06 -2010 ല്‍ കേരളാ മുഖ്യ മന്ത്രി വി.എസ്‌. അച്ചുനന്ദന്‌ കത്ത്‌ അയച്ചു.
ഇതിനെ തുടര്‍ന്ന്‌ 08 – 10 -2010 ല്‍ കേരളാ സര്‍ക്കാര്‍ കണ്ണന്‍ ദേവന്‍ മല നിരകളിലെ 17066.49 ഏക്കര്‍ സ്ഥലം വനഭൂമിയായി പ്രഖ്യാപിക്കുകയും കണ്ണന്‍ദേവന്‍ ഹില്‍ റിസേര്‍വ്‌ എന്ന പേരു നല്‍കി ജി.ഒ.(പി.)67/2010/F&WLD.-ാം നമ്പരായി വിജ്ഞാപനം പുറപ്പെടുവിക്കുകയും ചെയ്‌തു.
2010 ല്‍ തന്നെ മൂന്നാര്‍ സ്‌പെഷ്യല്‍ ട്രൈബൂണല്‍ രൂപീകരിക്കുന്നതിനായി ഒരു ബില്ല്‌ കേരളാ നിയമസഭയില്‍ അവതരിപ്പിച്ചു പന്ത്രണ്ടാം നിയമസഭയിലെ 349-ാം നമ്പര്‍ ബില്ലായാണ്‌ ഇത്‌ അവതരിപ്പിച്ചത്‌.
ഇതിനെ തുര്‍ന്ന്‌ 07 – 08 -2010 ല്‍ മൂന്നാര്‍ സ്‌പെഷ്യല്‍ ട്രൈബൂണല്‍ ആക്‌ട്‌ നിലവില്‍ വരികയും ചെയ്‌തു.
മൂന്നാറില്‍ ടൂറിസം സോണ്‍ സൃഷ്ടിക്കുന്നതിനായി 2010 ല്‍ തന്നെ മൂന്നാറിലെ 1072 ഏക്കര്‍ ഭൂമി ഏറ്റെടുക്കുന്നത്‌ സംബന്ധിച്ച ഒരു ബില്ലും കേരളാ നിയമസഭയില്‍ അവതരിപ്പിച്ചു പന്ത്രണ്ടാം നിയമസഭയിലെ 350-ാം നമ്പര്‍ ബില്ലായാണ്‌ ഇത്‌ അവതരിപ്പിച്ചത്‌.
മൂന്നാറിലെ ഭൂമി കൈയേറ്റവും തടയണ നിര്‍മാണവും ഉള്‍പ്പെടെയുള്ള വിഷയങ്ങള്‍ അന്വേഷിച്ച റിപ്പോര്‍ട്ട്‌ നല്‍കുന്നതിനായി 22 – 01 -2010 ല്‍ ജി.ഒ. (ആര്‍ റ്റി) 309/2010/RD -ാം നമ്പര്‍ ഉത്തരവിന്റെ അടിസ്ഥാനത്തില്‍ ഭൂമി കേരളം പ്രോജക്ട്‌ ഡയറക്ടര്‍ ബിജു പ്രഭാകര്‍ എ.എ.എസിനെ സര്‍ക്കാര്‍ അന്വേഷണ കമ്മീഷനായി നിയമിച്ചു. ഈ റിപ്പോര്‍ട്ടിന്റെ അടിസ്ഥാനത്തിലും കാര്യമായ നടപടികള്‍ ഒന്നും ഉണ്ടായില്ല. കന്നുകാലികള്‍ക്ക്‌ മേച്ചിലിനും കമ്പനിക്ക്‌ വിറകാവശ്യത്തിന്‌ മരങ്ങള്‍ നട്ടുവളര്‍ത്താനും ഉള്‍പ്പെടെ നല്‍കിയ ടാറ്റയുടെ കൈവശമുള്ള 28758.27 ഏക്കര്‍ സര്‍ ക്കാര്‍ ഏറ്റെടുക്കണമെന്നായിരുന്നു ശിപാര്‍ശ. അന്നത്തെ കണ്ണന്‍ദേവന്‍ കമ്പനിയില്‍നിന്ന്‌ ഭൂമിയേ റ്റെടുക്കാന്‍ നിയോഗിച്ച ലാന്‍ഡ്‌ ബോര്‍ഡ്‌ അവാര്‍ഡും കണ്ണന്‍ ദേവന്‍ നിയമവും പൊരു ത്തപ്പെടു ന്നതല്ലെന്നും ചൂണ്ടിക്കാട്ടിയിരുന്നു. ജലത്തി ന്റെയും ജല ഉറവിട ത്തിന്റെയും അവകാശം കമ്പനിയുടെ നിയന്ത്രണ ത്തിലാകാന്‍ പാടില്ല. അരുവികള്‍, ചതുപ്പുകള്‍ എന്നീ ഇ നത്തില്‍ ഉള്‍പ്പെടുത്തി കമ്പനിക്ക്‌ നല്‍കിയ 2465.20 ഏക്കറില്‍ 1000 ഏക്കറും കൃഷിയോഗ്യമല്ലാത്ത 6393.59 ഏക്കറും എസ്‌റ്റേറ്റുകള്‍ക്ക്‌ ഇടയിലുള്ള 2000 ഏക്കറും സര്‍ക്കാര്‍ ഏറ്റെടുക്കണം. തേയില കൃഷിക്ക്‌ ആവശ്യമായ ഭൂമി മാത്രം കമ്പനിക്ക്‌ നല്‍കണമെന്നതായിരുന്നു റിപ്പോര്‍ട്ട്‌.
മൂന്നാറില്‍ നടക്കുന്ന ഏതു തരത്തിലുള്ള നിര്‍മ്മാണ പ്രവര്‍ത്തനങ്ങള്‍ക്കും റവന്യു വകുപ്പിന്റെ എന്‍.ഒ. സി വേണമെന്നാണ്‌ വ്യവസ്ഥ. എന്നാല്‍ ഇവ കൃത്യമായി ഒരിക്കലും പാലിക്കപ്പെടുന്നില്ലന്നു മാത്രമല്ല അനധികൃതമായി കെട്ടിട നിര്‍മ്മാണം നിര്‍ബാധം തുടരുകയും ചെയ്യുന്നുണ്ട്‌. റവന്യു വകുപ്പിന്റെ എന്‍.ഒ. സി നിക്ഷേധിക്കപ്പെട്ട ആളുകള്‍ ബഹുമാനപ്പെട്ട ഹൈക്കോടതിയെ സമീപിച്ചപ്പോള്‍ കോടതിയും ഇതേ നിലപാടു തന്നെയാണ്‌ സ്വീകിച്ചത്‌. 21-01-2010 ല്‍ W.P. (C) 1801/2010 -ാം നമ്പര്‍ വിധിന്യായത്തില്‍ റവന്യു വകുപ്പിന്റെ എന്‍.ഒ. സി ഇല്ലാതെ ഒരു നിര്‍മ്മാണ പ്രവര്‍ത്തനവും അനുവദിക്കേണ്ടതില്ല എന്ന കര്‍ശന നിലപാടാണ്‌ ഹൈക്കോടതി സ്വീകരിച്ചിട്ടുള്ളത്‌.
ഭരണം മാറി ഉമ്മന്‍ ചാണ്ടിയുടെ നേതൃത്വത്തിലുള്ള യു.ഡി.എഫ്‌. സര്‍ക്കാര്‍ അധികാരത്തിലെത്തിയതൊടെയാണ്‌ രണ്ടാം മൂന്നാര്‍ ദൗത്യത്തിന്‌ തുടക്കമാകുന്നത്‌. 11- 07 -2011 ല്‍ ആയിരുന്നു റവന്യു വകുപ്പ്‌ മന്ത്രി ആയിരുന്ന തിരുവഞ്ചൂര്‍ രാധാകൃഷ്‌ണന്റെ നേതൃത്വത്തില്‍ രണ്ടാം മൂന്നാര്‍ ദൗത്യത്തിന്‌ തുടക്കമായത്‌ . മന്ത്രിയുടെ സാന്നിദ്ധ്യത്തില്‍ ഇടുക്കി ജില്ലാ കളക്‌ടര്‍ ഇ. ദേവദാസ്‌, ദേവികുളം സബ്‌കളക്‌ടര്‍ എം.ജി. രാജമാണിക്യം എന്നിവരുടെ നേതൃത്വത്തില്‍ തയ്യാറാക്കിയ ലിസ്‌റ്റിന്റെ അടിസ്ഥാനത്തിലായിരുന്നു ഒഴിപ്പിക്കല്‍. മൂന്നാറില്‍ ആറിടങ്ങളിലായി 455.33 ഏക്കര്‍ കൈയേറ്റ ഭൂമി ഒഴിപ്പിച്ചതായി റവന്യൂ മന്ത്രി തിരുവഞ്ചൂര്‍ രാധാകൃഷ്‌ണന്‍ അവകാശപ്പെട്ടു. ചിന്നക്കനാല്‍ ഗ്യാപ്‌ റോഡ്‌്‌, ചിന്നക്കനാല്‍ വിലക്ക്‌, ഡാം കാച്ച്‌മെന്റ്‌ ഏരിയ, പാര്‍വ്വതി മല, സിമന്റ്‌ പാലം എന്നിവടങ്ങളിലെ കൈയേറ്റങ്ങളാണ്‌ ഒഴിപ്പിച്ചതെന്നാണ്‌ മന്ത്രി പറഞ്ഞത്‌. 250 എക്കര്‍ ഭൂമിയില്‍ കേരള സര്‍ക്കാറിന്റെ ബോര്‍ഡ്‌ മന്ത്രി തിരുവഞ്ചൂര്‍ രാധാകൃഷ്‌ണന്‍ നേരിട്ട്‌ സ്ഥാപിച്ചു. മൂന്നാറില്‍ ഇനി കൈയേറ്റം അനുവദിക്കില്ലെന്നും റവന്യൂ മന്ത്രി പ്രഖ്യാപിച്ചു. അതൊടെ യു.ഡി.എഫ്‌ നേതൃത്വത്തിലുള്ള ഒഴിപ്പിക്കലും അവസാനിച്ചു. പ്രഖ്യാപനങ്ങളും ബോര്‍ഡുകളും കയ്യേറ്റക്കാര്‍ തന്നെ സ്വന്തമാക്കി.
നീലക്കുറിഞ്ഞി ദേശീയോദ്യാനം ഉള്‍പ്പെടുന്ന പ്രദേശങ്ങളിലെ വിഷയങ്ങള്‍ അന്വേഷിച്ച റിപ്പോര്‍ട്ട്‌ നല്‍കുന്നതിനായി 3 – 05 -2014 ലെ ജി.ഒ. (എം.എസ്‌) 177/14/RD -ം 21 – 06 -2014 ലെ ജി.ഒ. (എം.എസ്‌) 2647/14/RD -ം നമ്പര്‍ ഉത്തരവുകള്‍ പ്രകാരം അഡീഷണല്‍ ചീഫ്‌ സെക്രട്ടറി നിവേദിത പി ഹരന്റെ നേതൃത്വത്തില്‍ സര്‍ക്കാര്‍ ഒരു പ്രത്യേക അന്വേഷണ സംഘത്തെ ചുമതലപ്പെടുത്തി. അന്വേഷണം പൂര്‍ത്തിയാക്കിയ സംഘം 23 – 10 -2014 ല്‍ സര്‍ക്കാരിന്‌ വിശദമായ റിപ്പോര്‍ട്ട്‌ കൈമാറി. ഈ പ്രദേശങ്ങളില്‍ പൂര്‍ണ്ണമായും നിയമ വാഴ്‌ച തകര്‍ന്നിരിക്കുകയാണന്നാണ്‌ ഈ റിപ്പോര്‍ട്ട്‌ ചൂണ്ടിക്കാട്ടുന്നത്‌.
കെഡിഎച്ച്‌ വില്ലേജില്‍ ദേവികുളം,മൂന്നാര്‍ പഞ്ചായത്തുകളില്‍ സീറോലാന്‍ഡ്‌ലെസ്‌ പദ്ധതി പ്രകാരമുള്ള ഭൂമി വിതരണം 2015 സെപ്‌തംബറില്‍ നടന്നു. മൂന്നാര്‍ ടൗണില്‍ പാര്‍വതി മല, ബ്ലോക്ക്‌ ഓഫീസ്‌ പരിസരം, ചെണ്ടുവര, കുറ്റിയാര്‍ വാലി, പ്രദേശം, വട്ടവട തുടങ്ങിയ പ്രദേശങ്ങളിലാണ്‌ ഭൂമി നല്‍കിയത്‌
2016 ല്‍ ഇടുക്കി ജില്ലയില്‍ പുതുതായി ചാര്‍ജെടുത്ത ജില്ലാ പോലീസ്‌ മേധാവി എ.വി. ജോര്‍ജ്ജ്‌ ഐ. പി. എസ്‌. ഇടുക്കി ജില്ലയിലെ പരിസ്ഥിതി ലോല മേഖലകളില്‍ നടക്കുന്ന അനധികൃത കെട്ടിട നിര്‍മ്മാണം, പാറപൊട്ടിക്കല്‍, ജലമലിനീകരണം, എന്നിവയെക്കുറിച്ച്‌ പഠനം നടത്തുകയും അതിന്റെ അടിസ്ഥാനത്തില്‍ വിശദവും വസ്‌തു നിഷ്‌ഠവുമായ ഒരു സചിത്ര റിപ്പോര്‍ട്ട്‌ തയ്യാറാക്കുകയും ചെയ്‌തു. ഈ റിപ്പോര്‍ട്ട്‌ മേല്‍ നടപടികള്‍ സ്വീകരിക്കുന്നതിനായി 05 – 01 -2017 ല്‍ ദേവികുളം സബ്‌കളക്‌ടര്‍ ഡോ. ശ്രീറാം വെങ്കിട്ടരാമന്‌ സമര്‍പ്പിക്കുകയും ചെയ്‌തു. മേഖലയില്‍ നടക്കുന്ന നാല്‍പ്പതോളം നിര്‍മ്മാണങ്ങളുടെ ചിത്രങ്ങളും സ്ഥലം കൈവശം വച്ചിരിക്കുന്നവരുടെ പേരുവിവരവും ഉള്‍പ്പടെയുള്ള ഈ റിപ്പോര്‍ട്ട്‌ അവസാനിക്കുന്നത്‌ നാല്‌ നിര്‍ദ്ദേശങ്ങള്‍ മുന്നോട്ടു വച്ചുകൊണ്ടാണ്‌. റിപ്പോര്‍ട്ടുകൊണ്ട്‌ വേറെ ഫലം ഒന്നും ഉണ്ടായില്ലങ്കിലും റിപ്പോര്‍ട്ട്‌ സമര്‍പ്പിച്ചതോടെ ജില്ലാ പോലീസ്‌ മേധാവിയെ ജില്ലക്ക്‌ വെളിയിലേക്ക്‌ എടുത്തു മാറ്റികൊണ്ട്‌ സര്‍ക്കാര്‍ കയ്യേറ്റക്കാരോടുള്ള കൂര്‍ പ്രഖ്യാപിച്ചു.
മൂന്നാറില്‍ പരിശോധന നടത്തിയ നിയമസഭാ പരിസ്ഥിതി കമ്മറ്റിയും നിയമങ്ങള്‍ ലംഘിച്ച്‌ നിര്‍മിച്ച മുഴുവന്‍ കെട്ടിടങ്ങള്‍ പൊളിക്കണമെന്ന്‌ ശുപാര്‍ശ ചെയ്‌തു. മുല്ലക്കര രത്‌നാകരന്‍ ചെയര്‍മാനായുള്ള നിയമസഭാ പരിസ്ഥിതി സമിതിയില്‍ കെ. ബാബു (സിപിഎം) പിടിഎ റഹീം (എല്‍ഡിഎഫ്‌ സ്വതന്ത്രന്‍) അനില്‍ അക്കര, എം. വിന്‍സന്റ്‌ (കോണ്‍ഗ്രസ്‌) ഒ.ആര്‍.കേളു (സിപിഎം) എന്നിവരാണ്‌ മറ്റ്‌ അംഗങ്ങള്‍.
കാര്‍ഷികേതര ആവശ്യങ്ങള്‍ക്ക്‌ ഭൂമി ഉപയോഗി ച്ചിട്ടുണ്ടെങ്കില്‍ പട്ടയം റദ്ദാക്കി തിരിച്ചുപിടിക്കണം. നിയമം ലംഘിച്ചുള്ള നിര്‍മാണങ്ങള്‍ നിര്‍ത്തിവയ്‌പ്പിക്കാന്‍ ഉടനടി നടപടി വേണമെന്നും സമിതി നിര്‍ദ്ദേശം നല്‍കി. അനധികൃത കെട്ടിട നിര്‍മാണം തടയുന്നതില്‍ റവന്യൂ വകുപ്പിന്‌ വലിയ വീഴ്‌ച സംഭവിച്ചതായി സമിതി ചൂണ്ടിക്കാട്ടി. മൂന്നാറില്‍ പുതുതായി യൂക്കാലിപ്‌സ്‌ മരങ്ങള്‍ വച്ചുപിടിപ്പിക്കരുത്‌. വിനോദസഞ്ചാര പ്രവര്‍ത്തനങ്ങള്‍ പൂര്‍ണമായും പരിസ്ഥിതി സൗഹൃദമാകണം. സവിശേഷ പരിതസ്ഥിതി പരിഗണിച്ച്‌ മൂന്നാറിന്‌ മാത്രമായി പരിസ്ഥിതി പരിപാലന വികസന അതോറിറ്റി ആറു മാസത്തിനുള്ളില്‍ രൂപീകരിക്കണമെന്ന സുപ്രധാന ശുപാര്‍ശയും റിപ്പോര്‍ട്ടിലുണ്ട്‌. മൂന്നാറിലെ ഗാര്‍ഹികേതര ആവശ്യങ്ങള്‍ക്കുള്ള സ്ഥിരമോ താത്‌കാലികമോ ആയ എല്ലാവിധ കെട്ടിട നിര്‍മാണങ്ങളും ഉടന്‍ നിര്‍ ത്തിവയ്‌ക്കണമെന്നും സമിതി പറയുന്നു.
മൂന്നാറിലെ സ്ഥിതി അതീവ ഗുരുതരമെന്ന്‌ ലാന്‍ഡ്‌ റവന്യു കമ്മീഷണറും സര്‍ക്കാരിന്‌ റിപ്പോര്‍ട്ട്‌ നല്‍കി കഴിഞ്ഞു. അനധികൃത നിര്‍മ്മാണങ്ങളും കൈയ്യേറ്റങ്ങളും മൂന്നാറിനെ നശിപ്പിക്കുന്നുവെന്നാണ്‌ സര്‍ക്കാരിന്‌ സമര്‍പ്പിച്ച റിപ്പോര്‍ട്ടില്‍ ലാന്‍ഡ്‌ റവന്യു കമ്മീഷണര്‍ എ. റ്റി ജയിംസ്‌ പറയുന്നത്‌. നിയമസഭാ പരിസ്ഥി കമ്മറ്റിക്കു നല്‍കിയ റിപ്പോര്‍ട്ടാണ്‌ നടപടി ആവശ്യപ്പെട്ട്‌ കഴിഞ്ഞ്‌ മാസം സര്‍ക്കാരിന്‌ നല്‍കിയിരിക്കുന്നത്‌. മൂന്നാറിലെ കയ്യേറ്റക്കാരുടെ ഭരണ രാഷ്‌ട്രീയ പിന്‍ബലം എത്ര വലുതാണന്ന്‌ തെളിയിക്കുന്ന വിവാദപരമായ ഒരു പരാമര്‍ശവും ഈ റിപ്പോര്‍ട്ടിലുണ്ട്‌. രാഷ്‌ട്രീയ പാര്‍ട്ടികളുടെ പ്രാദേശിക എതിര്‍പ്പു മൂലം പല കയ്യേറ്റങ്ങളും വ്യാജ പട്ടയങ്ങളും പരിശോധിക്കാന്‍ പോലും സാധിക്കുന്നില്ലന്നു പറയുന്നത്‌ കേരളത്തിലെ റവന്യു വകുപ്പിലെ ഉന്നതനായ ഉദ്യോഗസ്ഥനാണ്‌. മൂന്നാറിലെ ഗുരുതരാവസ്ഥ വരച്ചു കാട്ടുന്നതാണ്‌ ഈ റിപ്പോര്‍ട്ടും. കമ്മീഷണറുടെ റിപ്പോര്‍ട്ടില്‍ പറയുന്നത്‌ � മൂന്നാര്‍ ഈസ്‌ എ ലോസ്റ്റ്‌ ലാന്‍ഡ്‌ � എന്നാണ്‌. അതായത്‌ മൂന്നാര്‍ നമുക്ക്‌ നഷ്‌ടപ്പെട്ടു കഴിഞ്ഞു എന്നര്‍ത്ഥം.
ഇടുക്കി ജില്ലാ പോലീസ്‌ മേധാവിയുടേയും, ലാന്‍ഡ്‌ റവന്യു കമ്മീഷണറുടേയും നിയമസഭാ പരിസ്ഥിതി കമ്മറ്റിയുടേയും മറ്റും റിപ്പോര്‍ട്ടിന്റെ അടിസ്ഥാനത്തിലാണ്‌ ഇപ്പോള്‍ ദേവികുളം സബ്‌ കളക്‌ടര്‍ ഡോ. ശ്രീറാം വെങ്കിട്ടരാമന്‍ നടപടികള്‍ ആരംഭിച്ചത്‌ . ഇടുക്കി ജില്ലാ പോലീസ്‌ മേധാവി നല്‍കിയ റിപ്പോര്‍ട്ട്‌ കൂടുതല്‍ പരിശോധനകള്‍ക്ക്‌ ശേഷം സബ്‌ കളക്‌ടര്‍ സംസ്ഥാന സര്‍ക്കാരിന്‌ കൈമാറി. ഈ റിപ്പോര്‍ട്ട്‌ അനുസരിച്ച്‌ അനധികൃതമായി ഇപ്പോള്‍ മൂന്നാറില്‍ നിര്‍മ്മാണം നടന്നുകൊണ്ടിരിക്കുന്നതടക്കം പൊളിച്ചു നീക്കേണ്ട റിസോര്‍ട്ടുകളുടെ എണ്ണം 130 ആണ്‌. വനഭൂമിയിലും, റവന്യു ഭൂമിയിലും, വൈദ്യുതി ബോര്‍ഡിന്റെ സ്ഥലത്തും, വിദ്യാഭ്യാസ സ്ഥാപനത്തിന്റെ സ്ഥലത്തും, ഏലക്കുത്തക പാട്ട ഭൂമിയിലെല്ലാം നിരവധിയായ അനധികൃത കെട്ടിടങ്ങള്‍ ഉയര്‍ന്നു കൊണ്ടിരിക്കുന്നു.
വിവിധ റിപ്പോര്‍ട്ടുകളുടെ അടിസ്ഥാനത്തില്‍ മൂന്നാറില്‍ അനധികൃതമായി നിര്‍മ്മിച്ചിരുക്കുന്നതില്‍ ചില കണക്കുകള്‍ നമുക്ക്‌ പരിശോധിക്കാം.
1. പള്ളിവാസല്‍ വില്ലേജ്‌ രണ്ടാം മൈല്‍ കരയില്‍ സര്‍വ്വെ 19/1, 8/2/1 എന്നീ സര്‍വ്വെ നമ്പരുകളില്‍ പെട്ട കീഴ്‌കാം തൂക്കായി കിടക്കുന്ന സ്ഥലത്ത്‌ പണി നടക്കുന്ന കെട്ടിടം
2. പള്ളിവാസല്‍ വില്ലേജില്‌ഡ പൈപ്പ്‌ ലൈനിനു സമീപം ബ്ലോക്ക്‌ 15 ല്‍ സര്‍വ്വെ 1/14 -ാം നമ്പരില്‍ പെട്ട സ്ഥലത്ത്‌ പത്തു നിലകളിലായി പണി നടക്കുന്ന കെട്ടിടം. ഈ കെട്ടിടത്തിന്‌ ഇടുക്കി ജില്ലാ കളക്‌ടര്‍ C11 – 2573/16 -ാം നമ്പരായി സ്റ്റോപ്പ്‌ മെമ്മോ നല്‍കിയിട്ടുള്ളതാണ്‌. കൂടാതെ ക്രിമിനല്‍ കേസുമുണ്ട്‌.
3. ചിന്നക്കനാല്‍ വില്ലേജ്‌ സൂര്യനെല്ലി കരയില്‍ സര്‍വ്വെ 20/1 -ാം നമ്പരില്‍ പെട്ട സ്ഥലത്ത്‌ പണി നടക്കുന്ന ഒന്‍പത്‌ നിലയുള്ള കെട്ടിടം
4. ചിന്നക്കനാല്‍ വില്ലേജ്‌ സൂര്യനെല്ലി ലോവര്‍ കരയില്‍ സര്‍വ്വെ 56/6 -ാം നമ്പരില്‍ പെട്ട സ്ഥലത്ത്‌ പണി നടക്കുന്ന ബഹുനില കെട്ടിടം
5. പൂപ്പാറ വില്ലേജ്‌ ആനയിറങ്കല്‍ കരയില്‍ സര്‍വ്വെ 12/2 -ാം നമ്പരില്‍ പെട്ട സ്ഥലത്ത്‌ കുത്തനെ മലഞ്ചിരവ്‌ ഇടിച്ചു നിരത്തി പണി നടക്കുന്ന ബഹുനില കെട്ടിടങ്ങള്‍
6. മൂന്നാര്‍ വില്ലേജ്‌ കോളനി റോഡില്‍ നിര്‍മ്മിച്ചിട്ടുള്ള ബഹു നില കെട്ടിടം.
7. പള്ളിവാസല്‍ പഞ്ചായത്തില്‍ പള്ളിവാസല്‍ പൈപ്പ്‌ ലൈനിനു സമീപം സര്‍വ്വെ 1/14, 1/15 എന്നീ സര്‍വ്വെ നമ്പരുകളില്‍ പെട്ട കീഴ്‌കാം തൂക്കായി കിടക്കുന്ന സ്ഥലത്ത്‌ പണി നടക്കുന്ന കെട്ടിടങ്ങള്‍
8. പള്ളിവാസല്‍ വില്ലേജ്‌ രണ്ടാം മൈല്‍ കരയില്‍ സര്‍വ്വെ 35/12,13,14 35/20/1 എന്നീ സര്‍വ്വെ നമ്പരുകളില്‍ പെട്ട സ്ഥലത്ത്‌ കുത്തനെയുള്ള കുന്ന്‌ വന്‍തോതില്‍ ഇടിച്ചു മാറ്റി പണി നടക്കുന്ന കെട്ടിടം.
9. പള്ളിവാസല്‍ വില്ലേജ്‌ രണ്ടാം മൈല്‍ കരയില്‍ സര്‍വ്വെ 216/1/2,216/1/6 എന്നീ സര്‍വ്വെ നമ്പരുകളില്‍ പെട്ട കീഴ്‌കാം തൂക്കായി കിടക്കുന്ന സ്ഥലത്ത്‌ പണി നടക്കുന്ന കെട്ടിടം
10. പള്ളിവാസല്‍ വില്ലേജ്‌ ചിത്തിരപുരം കരയില്‍ സര്‍വ്വെ 216/1,216/1/6 എന്നീ സര്‍വ്വെ നമ്പരുകളില്‍ പെട്ട കീഴ്‌കാം തൂക്കായി കിടക്കുന്ന സ്ഥലത്ത്‌ പണി നടക്കുന്ന കെട്ടിടം.
ഇത്‌ ചില ഉദാഹരണങ്ങള്‍ മാത്രം ഈ രീതിയില്‍ വ്യക്തമായ സര്‍വ്വെ നമ്പരും, ഉടമയുടെ വിലാസവും, ലൊക്കേഷനും ചൂണ്ടിക്കാട്ടി നൂറുകണക്കിന്‌ കെട്ടിടങ്ങളുടെ ലിസ്റ്റാണ്‌ വിവിധ സര്‍ക്കാര്‍ ഉദ്യോഗസ്ഥര്‍ റിപ്പാര്‍ട്ടുകളായി സമര്‍പ്പിച്ചിട്ടുള്ളത്‌. അത്തരം റിപ്പോര്‍ട്ടുകളിലൊന്നും നടപടി ആകുന്നില്ല എന്നതാണ്‌ സത്യം.
ഇത്രയും പ്രതികൂല കാലാവസ്ഥകളെ അതിജീവിച്ച്‌ ഇവിടുത്തെ ഏറ്റവും വലിയ വിരോദാഭാസം ഈ കയ്യേറ്റങ്ങളെ ന്യായീകരിക്കുവാനും ഭൂമാഫിയകളെ വെള്ളപൂശാനും ഒരു പറ്റം രാഷ്‌ട്രീയക്കാരും മത നേതാക്കളും കരുവാക്കിയിരിക്കുന്നത്‌ ഇവിടുത്തെ പാവപ്പെട്ട ജനങ്ങളെയാണ്‌. കുത്തകകള്‍ക്കും ഭൂമാഫിയാകള്‍ക്കും എതിരെ നടക്കുന്ന നിയമനടപടികളെ കാട്ടി ഈ പാവങ്ങളെ ഇവിടെ ബലിയാടുക്കുകയാണ്‌ ഇവിടുത്തെ ഭരണ വര്‍ഗ്ഗം. ഇത്‌ മൂന്നാറിലെ പട്ടിണി പാവങ്ങളെയും ചെറുകിട കച്ചവടക്കാരേയും ആട്ടിപ്പായിക്കുവാനുള്ള നീക്കമാണന്ന്‌ പ്രചരിപ്പിച്ച്‌ തെരുവിലറക്കി വന്‍കിടക്കാരും അവരുടെ ദല്ലാളന്‍മാരായ രാഷ്‌ട്രീയ ഭരണവര്‍ഗ്ഗങ്ങളും രസിക്കുകയാണ്‌. ഈ കാലയളവില്‍ ഇക്കൂട്ടരെല്ലാം ഇവിടെ മാറി മാറി ഭരിച്ചിട്ടും ഈ പാവങ്ങളില്‍ എത്ര പേര്‍ക്ക്‌ പട്ടയം ലഭിച്ചു എന്നു പരിശോധിക്കുമ്പോഴാണ്‌ ഇവിടെ നടക്കുന്ന വഞ്ചനകള്‍ അവര്‍ മനസ്സിലാക്കാന്‍ കഴിയുന്നത്‌.
ദേവികുളം സബ്‌ കളക്‌ടറുടെ വാക്കുകളെ വിശ്വസിക്കാമെങ്കില്‍ സാധാരണക്കാരനും പാവപ്പെട്ടവനും വീടു വയ്‌ക്കാന്‍ അവിടെ യാതൊരു തടസ്സവുമില്ലന്ന്‌ വ്യക്തമാകും. വന്‍കിട റിസോര്‍ട്ടുകളുടെ നിര്‍മ്മാണത്തിന്‌ മാത്രമാണ്‌ സ്റ്റോപ്പ്‌ മെമ്മോ നല്‍കിയിട്ടുള്ളതെന്നാണ്‌ ഔദ്യോഗിക വിശദീകരണം. ഈ കാലയളവില്‍ 125 അപേക്ഷകളാണ്‌ വീടു വയ്‌ക്കുന്നതിനായി ലഭിച്ചിട്ടുള്ളതെന്നും അതില്‍ 115 എണ്ണത്തിനും അനുമതി പത്രം നല്‍കി കഴിഞ്ഞു എന്നുമാണ്‌ വിശദീകരണം.
നല്ലവരായ ഉദ്യോഗസ്ഥര്‍ക്ക്‌ മുന്നോട്ടു പോകണമെങ്കില്‍, മൂന്നാറിനെ മൂന്നാറായി നില നിര്‍ത്തണമെങ്കില്‍ ഭഗീരഥ പ്രയത്‌നം തന്നെ ആവശ്യമാണ്‌. കയ്യേറ്റക്കാരും, രാഷ്‌ട്രീയ, മത ലോബികളും, അഴിമതിക്കാരായ ഉദ്യോഗസ്ഥ വൃന്ദങ്ങളും തീര്‍ക്കുന്ന പത്മവ്യൂഹത്തില്‍ പെട്ട എരിഞ്ഞടങ്ങനാണ്‌ എന്നും നല്ലവരായ ഉദ്യോഗസ്ഥര്‍ക്ക്‌ വിധി. ആ വിധിയെ മറി കടക്കണമെങ്കില്‍ പ്രകൃതിയെ സ്‌നേഹിക്കുന്ന, നാടിനെ സ്‌നേഹിക്കുന്ന നല്ലവരായ പൊതുസമൂഹവും, ഭരണാധികാരികളും, നിയമ നീതിന്യായ സ്ഥപനങ്ങളും ഒരേ മനസ്സോടെ ഇക്കൂട്ടരെ പിന്തുണക്കുവാന്‍ തയ്യാറാകണം.
1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമ പ്രകാരവും തുടര്‍ന്നു വന്ന ലാന്റ്‌ ബോര്‍ഡ്‌ അവാര്‍ഡും പ്രകാരം സര്‍ക്കാരില്‍ നിക്ഷിപ്‌തമായ 70522 ഏക്കര്‍ ഭൂമിക്ക്‌ എന്ത്‌ സംഭവിച്ചുവെന്നും അതിന്റെ ഇപ്പോഴത്തെ അവസ്ഥ എന്തെന്നും സര്‍ക്കാര്‍ ധവള പത്രം ഇറക്കാന്‍ തയ്യാറാകണം.
മുന്‍ അഡീഷണല്‍ ചീഫ്‌ സെക്രട്ടറി നിവേദിത പി. ഹരന്റേയും, നിയമസഭാ പരിസ്ഥിതി കമ്മറ്റിയുടേയും, സംസ്ഥാന ലാന്റ്‌ ബോര്‍ഡ്‌ കമ്മീഷണറുടേയും, മുന്‍ ജില്ലാ പോലീസ്‌ മേധാവി എ. വി. ജോര്‍ജിന്റേയും , ദേവികുളം സബ്‌കളക്‌ടര്‍ ഡോ. ശ്രീറാം വെങ്കിട്ടരാമന്റേയും അന്വേഷണങ്ങളില്‍ കണ്ടെത്തിയിട്ടുള്ള മുഴുവന്‍ അനധികൃത കെട്ടിടങ്ങളും പൊളിച്ചു നീക്കുക.
കണ്ണന്‍ ദേവന്‍ മലനിരകളിലെ ഭൂമിയുടെ അളവിനേയും കൈവശത്തേയും കൃത്യമായി തിരിച്ചറിയുന്നതിനായി സാറ്റലൈറ്റ്‌ സര്‍വ്വെ നടത്തുക.
മൂന്നാര്‍ മേഖലയില്‍ നല്‍കിയിട്ടുള്ള മുഴുവന്‍ പട്ടയങ്ങളെക്കുറിച്ചും, മുഴുവന്‍ കെട്ടിട നിര്‍മ്മാണ അനുമതികളെക്കുറിച്ചും, കൈവശാവകാശ രേഖകളെ സംബന്ധിച്ചും, മൂന്നാര്‍ മേഖലയിലെ കെട്ടിടങ്ങളുടെ ഫയര്‍ എന്‍.ഒ. സി. കളെക്കുറിച്ചും 1990 മുതല്‍ മൂന്നാര്‍ മേഖലയില്‍ ജോലി നോക്കിയിരുന്ന മുഴുവന്‍ റവന്യു, വനം, സര്‍വ്വെ, പോലീസ്‌ തുടങ്ങിയ പ്രധാന ഉദ്യോഗസ്ഥരുടെ സ്വത്തു വിവരത്തെക്കുറിച്ചും സി.ബി.ഐ. അന്വേഷണം നടത്തുക.
മുതിരപ്പുഴയാറിനെ സംരക്ഷിച്ചു പുഴയിലെ കയ്യേറ്റങ്ങള്‍ പൂര്‍ണ്ണമായും ഒഴുപ്പിക്കുക.
മൂന്നാറിലെ ഭൂമി കൈയേറ്റവും തടയണ നിര്‍മാണവും ഉള്‍പ്പെടെയുള്ള വിഷയങ്ങള്‍ അന്വേഷിച്ച ഭൂമി കേരളം പ്രോജക്ട്‌ ഡയറക്ടര്‍ ബിജു പ്രഭാകര്‍ ഐ.എ. എസ്‌ നല്‍കിയ റിപ്പോര്‍ട്ടിന്റെയും മറ്റും അടിസ്ഥാനത്തില്‍ ടാറ്റായുടെ കൈവശം അധികമായുള്ള മുഴുവന്‍ ഭൂമിയും തിരിച്ചു പിടിക്കുക.
കണ്ണന്‍ ദേവന്‍ കമ്പനിക്ക്‌ പാട്ടത്തിന്‌ നല്‍കിയിട്ടുള്ള പ്രദേശത്തെ ജലത്തിന്റെയും ജല ഉറവിടത്തിന്റെയും അവകാശം പൂര്‍ണ്ണമായും സര്‍ക്കാര്‍ ഏറ്റെടുക്കുക.

പരിശോധിക്കപ്പെടേണ്ട രേഖകള്‍

(1) കണ്ണന്‍ ദേവന്‍ കുന്നുകള്‍ പാട്ടത്തിന്‌ എടുക്കുന്നത്‌ സംബന്ധിച്ച്‌ 1877ജൂലൈ 11 ന്‌ ജോണ്‍ ഡാനിയല്‍ മണ്‍ട്രോ എന്ന ഇംഗ്ലീഷുകാരന്‍ പൂഞ്ഞാര്‍ രാജകുടുബവുമായി ഉണ്ടാക്കിയ പാട്ട ഉടമ്പടി
(2) കണ്ണന്‍ ദേവന്‍ കുന്നുകളെ സംബന്ധിച്ച ചോദ്യത്തിന്‌ 1923 എപ്രില്‍ 11 ന്‌ തിരുവിതാംകൂര്‍ നിയമസഭയില്‍ നല്‍കിയ മറുപടി
(3) കണ്ണന്‍ ദേവന്‍ കുന്നുകളെ സംബന്ധിച്ച 1927 ജൂലൈ 29 ലെ തിരുവിതാംകൂര്‍ നിയമസഭ രേഖകള്‍
(4) 1971 മാര്‍ച്ച്‌ 30 ന്‌ കേരള നിയമസഭയില്‍ അവതരിപ്പിച്ച 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമം
(4a) ഭൂമി ഏറ്റെടുത്ത സര്‍ക്കാര്‍ തീരുമാനത്തിന്‌ എതിരെ കണ്ണന്‍ദേവന്‍ കമ്പനി ബഹു. സുപ്രീംകോടതിയില്‍ 1971 ലെ 40 -ാം നമ്പരായി ഫയല്‍ ചെയ്‌ത റിട്ട്‌ പെറ്റീഷന്‍
(5) 1974 മാര്‍ച്ച്‌ 29 ലെ LBA-2-5227/71 -ാം നമ്പര്‍ ലാന്‍ഡ്‌ ബോര്‍ഡ്‌ അവാര്‍ഡ്‌.
(6) 1971 ലെ കണ്ണന്‍ ദേവന്‍ (ഭൂമി ഏറ്റെടുക്കല്‍) നിയമത്തിന്‍െറ തുടര്‍ച്ചയായി ഏറ്റെടുത്ത ഭൂമിയുടെ വിനിയോഗം എങ്ങനെയായിരിക്കണമെന്ന്‌ ശിപാര്‍ശ നല്‍കാന്‍ സര്‍ക്കാര്‍ 1975 ല്‍ ജി.ഒ. (എം.എസ്‌.) 993/75/RD Rev. (N) /02-09-75 -ാം നമ്പര്‍ ഉത്തരവിന്‍ പ്രകാരം ചുമതലപ്പെടുത്തിയിയ കമ്മറ്റിയുടെ റിപ്പോര്‍ട്ട്‌.
(7) വിദഗ്‌ദ സമിതിയുടെ ശുപാര്‍ശ അനുസരിച്ച്‌ സര്‍ക്കാര്‍ ഭൂമി ഉപയോഗിക്കേണ്ടതു സംബന്ധിച്ച്‌ ജി.ഒ. (എം.എസ്‌.) 379/80/RD /18-04-1980-ാം നമ്പരായുള്ള സര്‍ക്കാര്‍ ഉത്തരവ്‌.
(8) കേരള സര്‍ക്കാരിന്റെ 1977 ഫെബ്രുവരി 19 ലെ ജി. ഒ. (എം.എസ്‌) 262/77 -ാം നമ്പര്‍ സര്‍ക്കാര്‍ ഉത്തരവ്‌
(9) ലാന്റ്‌ ബോര്‍ഡ്‌ ഉത്തരവ്‌ നടപ്പിലാക്കാന്‍ ഇടുക്കി ജില്ലാ കളക്‌ടറെ ചുമതലപ്പെടുത്തികൊണ്ട്‌ 02 -11-1988 ല്‍ ജി.ഒ. (എം.എസ്‌.) 787/88/RD -ാം നമ്പരായുള്ള സര്‍ക്കാര്‍ ഉത്തരവ്‌
(10) 22253 ഏക്കര്‍ സ്ഥലം 28 – 6 -1980 ല്‍ C4-37166/77 -ാം നമ്പര്‍ ഉത്തരവുപ്രകാരം ഇടുക്കി ജില്ലാ കളക്‌ടര്‍ മാങ്കുളത്തിന്‌ കൈമാറി.
(11) മാങ്കുളത്തെ ഭൂമി റസര്‍വ്‌ വനമായി 17 -2-2007 ല്‍ ജി.ഒ. (ആര്‍.റ്റി.) 754/07 Rev. -ാം നമ്പരായി സര്‍ക്കാര്‍ തീരുമാനം എടുക്കുകയും 16 -5-2007 ല്‍ ജി.ഒ. (പി.) 25/2007/F &WLD -ാം നമ്പരായി സര്‍ക്കാര്‍ വിജ്ഞാപനം ഇറക്കുകയും ചെയ്‌തു.
(12) 1994 – 95 മുതല്‍ 2003- 04 വരെയുള്ള വര്‍ക്കിംഗ്‌ പ്ലാന്‍
(13) 1996 ഡിസംബര്‍ 12 ലെ സുപ്രിം കോടതിയില്‍ സമര്‍പ്പിച്ച ജി. 202/1995 -ാം നമ്പര്‍ റിട്ട്‌ പെറ്റീഷന്റെ വിധിന്യായത്തിലൂടെ നിയോഗിച്ച വി. ഗോപിനാഥന്‍ കമ്മിറ്റി റിപ്പോര്‍ട്ട്‌
(14) 1999 ല്‍ തൊടുപുഴയില്‍ നടന്ന പട്ടയമേളയില്‍ ദേവികുളം താലൂക്കില്‍ നിന്നും വിതരണം ചെയ്‌ത 530 പട്ടയങ്ങള്‍
(15) 2003 ല്‍ �വണ്‍ എര്‍ത്ത്‌ വണ്‍ ലൈഫ്‌� എന്ന സംഘടന നല്‍കിയ പരാതിയുടെ അടിസ്ഥാനത്തില്‍ ഈ മേഖലയില്‍ ഏലമലകാടുകളില്‍ നടക്കുന്ന കയ്യേറ്റങ്ങളെക്കുറിച്ച്‌ പഠനം നടത്തിയ സമിതിയുടെ റിപ്പോര്‍ട്ട്‌.
(16) മൂന്നാര്‍ ഉള്‍പ്പെടുന്ന പശ്ചിമ ഘട്ടത്തില്‍ വ്യാപകമായ കയ്യേറ്റം നടക്കുന്നുവെന്ന റിപ്പോര്‍ട്ടിന്റെ അടിസ്ഥാനത്തിലാണ്‌ വനം പരിസ്ഥിതി മന്ത്രാലയത്തിലെ മേഖലാ സി. സി. എഫ്‌ ഡോ. കെ. എസ്‌ റെഡ്ഡി അദ്ധ്യക്ഷനായി നാലംഗ സമിതിയുടെ അന്വേഷണ റിപ്പോര്‍ട്ട്‌
(17) കേരള സര്‍ക്കാര്‍ 2010 ഒക്ടോബറില്‍ ജി.ഒ.(പി.)67/2010/F&WLD.-ാം നമ്പര്‍ വിജ്ഞാപനത്തിലൂടെ 17066.49 ഏക്കര്‍ കണ്ണന്‍ ദേവന്‍ റിസര്‍വായി പ്രഖ്യാപിച്ച്‌ നടത്തി സര്‍ക്കാര്‍ വിഞ്‌ജാപനം
(18) 2010 ല്‍ തന്നെ മൂന്നാര്‍ സ്‌പെഷ്യല്‍ ട്രൈബൂണല്‍ രൂപീകരിക്കുന്നതിനായി കേരളാ നിയമസഭയില്‍ അവതരിപ്പിച്ച ബില്ല്‌
(19) പ്രസ്‌തുത ബില്ലിന്റെ അടിസ്ഥാനത്തില്‍ 07 – 08 -2010 ല്‍ നിലവില്‍ വന്ന മൂന്നാര്‍ സ്‌പെഷ്യല്‍ ട്രൈബൂണല്‍ ആക്‌ട്‌
(20) മൂന്നാറില്‍ ടൂറിസം സോണ്‍ സൃഷ്ടിക്കുന്നതിനായി 2010 ല്‍ മൂന്നാറിലെ 1072 ഏക്കര്‍ ഭൂമി ഏറ്റെടുക്കുന്നത്‌ സംബന്ധിച്ച്‌ നിയമസഭയില്‍ അവതരിപ്പിച്ച ബില്ല്‌
(21) മൂന്നാറിലെ ഭൂമി കൈയേറ്റവും തടയണ നിര്‍മാണവും ഉള്‍പ്പെടെയുള്ള വിഷയങ്ങള്‍ അന്വേഷിച്ച ഭൂമി കേരളം പ്രോജക്ട്‌ ഡയറക്ടര്‍ ബിജു പ്രഭാകര്‍ ഐ.എ. എസ്‌ നല്‍കിയ റിപ്പോര്‍ട്ട്‌
(22) 2003 ല്‍ എ.ഡി.ജി.പി രാജന്‍ മഥോക്കര്‍ സമര്‍ച്ചിച്ച റിപ്പോര്‍ട്ട്‌
(23) രാജന്‍ മഥോക്കര്‍ സമര്‍ച്ചിച്ച റിപ്പോര്‍ട്ടിന്റെ അടിസ്ഥാനത്തില്‍ നിയോഗിച്ച പി സി സനല്‍കുമാറിന്റെ നേതൃത്വത്തിലുള്ള വിദഗ്‌ദസമിതി യുടെ റിപ്പോര്‍ട്ട
(24) ബഹു. കേരള ഹൈക്കോടതിയുടെ 1-01-2010 ലെ W.P. (C) 1801/2010 -ാം നമ്പര്‍ ഉത്തരവ്‌്‌
(25) കേരളാ ഫോറസ്റ്റ്‌ ആക്‌ട്‌ അനുസരിച്ച്‌ വനം വകുപ്പിന്റെ നോട്ടിഫിക്കേഷനുള്ള ശുപാശ
(26) തിരുവനന്തപുരം യൂണിവേഴ്‌സിറ്റി കോളേജിലെ സുവോളജി വിഭാഗം ഹെഡ്ഡ്‌ പ്രൊഫ. ഇ. കുഞ്ഞികൃഷ്‌ണന്‍ നടത്തിയ പഠന റിപ്പോര്‍ട്ട്‌
(27) നീലക്കുറിഞ്ഞി ദേശീയോദ്യാനം ഉള്‍പ്പെടുന്ന പ്രദേശങ്ങളിലെ വിഷയങ്ങള്‍ അന്വേഷിച്ച റിപ്പോര്‍ട്ട്‌ നല്‍കുന്നതിനായി 3 – 05 -2014 ലെ ജി.ഒ. (എം.എസ്‌) 177/14/RD -ം 21 – 06 -2014 ലെ ജി.ഒ. (എം.എസ്‌) 2647/14/RD -ം നമ്പര്‍ ഉത്തരവുകള്‍ പ്രകാരം അഡീഷണല്‍ ചീഫ്‌ സെക്രട്ടറി നിവേദിത പി ഹരന്റെ നേതൃത്വത്തില്‍ നടന്ന അന്വേഷത്തിന്റെ റിപ്പോര്‍ട്ട്‌