(സ്റ്റാലിനിസം എന്ന കൊടുംഭീകരതയെ നെഞ്ചിലേറ്റിയ കേരളത്തിലെ സിപിഎംന്റെ ക്രൂരതകള്‍)
സഹോദരസ്ഥാനീയരായ സഹപ്രവര്‍ത്തകരെ പോലും എതിര്‍ശബ്ദത്തിന്റെ പേരില്‍ കൊന്നൊടുക്കിയ സ്റ്റാലിനിസം എന്ന കൊടുംഭീകരതയുടെ പ്രേതമാണ്‌ കേരളത്തിലെ സിപിഎം ഇപ്പോഴും നെഞ്ചിലേറ്റി നടക്കുന്നത്‌. ലോകമെമ്പാടുമുള്ള കമ്യൂണിസ്റ്റുകാര്‍ സ്റ്റാലിന്റെ പ്രേതത്തെ വലിച്ചെറിഞ്ഞുവെങ്കിലും ഇന്ത്യയിലെ സിപിഎം മാത്രാണ്‌ അതിപ്പോഴും പൂജാവിഗ്രഹമായി കൊണ്ടുനടക്കുന്നത്‌.
കേരളം ഇന്ന്‌ ഏറ്റവും കൂടുതല്‍ ചര്‍ച്ച ചെയ്യപ്പെടുന്ന വിഷയമാണല്ലോ രാഷ്ട്രീയ കൊലപാതകങ്ങളും അസഹിഷുണതയുടെ രാഷ്‌ട്രീയവും. പിണറായി വിജയന്റെ നേതൃത്വത്തിലുള്ള മാര്‍ക്‌സിസ്റ്റ്‌ സര്‍ക്കാര്‍ അധികാരത്തിലെത്തി ഏതാനും മാസങ്ങള്‍ പിന്നിട്ടപ്പോഴേക്കും കേരളത്തില്‍ നടന്നിട്ടുള്ള മാര്‍ക്‌സിസ്റ്റ്‌ അക്രമങ്ങള്‍ക്ക്‌ കയ്യും കണക്കുമില്ല. കേരളത്തിലെ പൊതു സമൂഹത്തിനു മുന്നില്‍ ചര്‍ച്ച ചെയ്യപ്പെടുന്നത്‌ കൊലപാതങ്ങള്‍ മാത്രമാണ്‌. എന്നാല്‍ അതിന്റെ എത്രയോ മടങ്ങാണ്‌ വെട്ടും കുത്തും ഏറ്റ്‌ മരിക്കാതെ മരിക്കുന്നവരുടെ എണ്ണം. വീടുകള്‍ക്കും വ്യാപാര സ്ഥാപനങ്ങള്‍ക്കും വാഹനങ്ങള്‍ക്കും, സാംസ്‌കാരിക സ്ഥാപനങ്ങള്‍ക്കും എതിരെയുള്ള അക്രമങ്ങളും നിരവധിയാണ്‌. ഇവയെന്നും ചര്‍ച്ച ചെയ്യപ്പെടുന്നില്ലന്നു മാത്രമല്ല ഭരണകൂടം അക്രമങ്ങളെ വെള്ളപൂശുകയും പ്രോത്സാഹിപ്പിക്കുകയുമാണ്‌ ചെയ്യുന്നത്‌.
മാര്‍ക്‌സിസ്റ്റ്‌ പാര്‍ട്ടി കേരള മണ്ണില്‍ തുടക്കം കുറിച്ച അരുംകൊലകളെ വെറും രാഷ്ട്രീയ കൊലപാതകം�എന്ന ഓമനപേരിട്ട്‌ നിസ്സാര വത്‌കരിക്കാനും വെള്ള പൂശാനുമാണ്‌ കേരളത്തിലെ മാധ്യമങ്ങളും കപട ബുദ്ധി ജീവികളും എന്നും ശ്രമിച്ചിട്ടുള്ളത്‌. അതുകൊണ്ടുതന്നെ മാര്‍ക്‌സിസ്റ്റ്‌ ക്രൂരതയ്‌ക്ക്‌ വിധേയരായവരുടെ ദീനരോദനം ശ്രദ്ധിക്കപ്പെടാതെ പോയി. നിഷ്‌പക്ഷമതികളെന്ന്‌ അഭിമാനിക്കുന്ന ഇക്കൂട്ടര്‍ ഇരയെയും വേട്ടക്കാരനെയും ഒരേ നാണയത്തിന്റെ ഇരുവശങ്ങളായും ചിത്രീകരിച്ചു. ചുരുക്കത്തില്‍ കഴിഞ്ഞ നാലു പതിറ്റാണ്ടിലെ രാഷ്ട്രീയ കൊലപാതക ചര്‍ച്ചകള്‍ വേട്ടക്കാരന്റെ താല്‍പര്യമനുസരിച്ചാണ്‌ നടന്നതെന്ന്‌ സത്യവും നാം വിസ്‌മരിച്ചു കൂടാ.
എന്നൊക്കെ കേരളത്തില്‍ മാര്‍ക്‌സിസ്റ്റു പാര്‍ട്ടി അധികാരത്തില്‍ എത്തിയിട്ടുണ്ടോ അന്നൊക്കെ കേരളത്തെ ചോരക്കളമാക്കി മാറ്റുന്ന പ്രവര്‍ത്തികളാണ്‌ നടത്തിയിട്ടുള്ളത്‌. അത്‌ പിണറായി വിജയനും തുടരുന്നു എന്നു മാത്രം. 1980 ല്‍ നായനാര്‍ അധികാരത്തില്‍ വന്നതോടെയാണ്‌ കൊലപാതകരാഷ്ട്രീയം കണ്ണൂരിന്റേയും മാര്‍ക്‌സിസ്റ്റ്‌ പാര്‍ട്ടിയുടേയും മുഖമുദ്രയായി മാറിയത്‌. അതിനു രാഷ്‌ട്രീയപരമായ പല കാരണങ്ങളും ഉണ്ട്‌. അടിയന്തരാവസ്ഥയ്‌ക്കെതിരായ കാര്യക്ഷമമായി പ്രതികരിക്കാതെ അടവുനയം സ്വീകരിച്ച സി പി എം നടപടി അവര്‍ക്കുള്ളില്‍ തന്നെയുള്ള ഒരു വലിയ വിഭാഗം യുവജനങ്ങളെ മാര്‍ക്‌സിസ്റ്റ്‌ പാര്‍ട്ടിക്ക്‌ എതിരായി ചിന്തിക്കാന്‍ പ്രേരിപ്പിച്ചു. എന്നു മാത്രമല്ല അടിയന്തിരാവസ്ഥക്ക്‌ എതിരെ ആര്‍എസ്‌എസ്‌ നടത്തിയ ധീരമായ പോരാട്ടങ്ങളിലെ ആവേശം ഉള്‍ക്കൊണ്ട്‌ ഒരു വലിയ വിഭാഗം യുവാക്കള്‍ സി.പി.എം. ഉപേക്ഷിച്ച്‌ സംഘപരിവാര്‍ പ്രസ്ഥാനങ്ങളിലേക്ക്‌ കടന്നുവരുവാനും തുടങ്ങി. 1977നുശേഷം സംഘത്തിനുണ്ടായ വളര്‍ച്ചയും കണ്ണൂരിലെ സിപിഎമ്മില്‍നിന്നുള്ള കൊഴിഞ്ഞുപോക്കും കമ്മ്യൂണിസ്റ്റ്‌ അസഹിഷ്‌ണുതയ്‌ക്ക്‌ കാരണമായി. 1980 ല്‍ ഇ.കെ. നായനാര്‍ അധികാരത്തില്‍ വന്നതോടെ കണ്ണൂര്‍ കൊലക്കളമായി. 21 മാസത്തെ നായനാര്‍ ഭരണത്തിന്‍കീഴില്‍ 23 സംഘ പ്രവര്‍ത്തകരാണ്‌ കൊല്ലപ്പെട്ടത്‌. ഇ.കെ. നായനാര്‍ നയിച്ച 1980 – 81, 1987 – 91, 1996- 2001 കാലഘട്ടത്തിലാണ്‌ ഏറ്റവും കൂടുതല്‍ കൊലപാതകങ്ങള്‍ സിപിഎമ്മിന്റെ ഭാഗത്തു നിന്നുണ്ടായത്‌. കണ്ണൂര്‍ ജില്ലയില്‍ വ്യാപകമായി മാര്‍ക്‌സിസ്റ്റുകള്‍ നടത്തിയ സംഘ ഉന്മൂലന സായുധ നീക്കങ്ങള്‍ കാസര്‍കോട്‌ മുതല്‍ നെയ്യാറ്റിന്‍കര വരെ കേരളത്തിലുടനീളം പടര്‍ന്നുപിടിച്ചു. ഇ. കെ. നായനാരുടെ കാലത്തേക്കുള്ള ഒരു തിരിച്ചു പോക്ക്‌ ലക്ഷ്യം വച്ചാണ്‌ പിണറായിയും കണ്ണൂര്‍ ലോബിയും ഇപ്പോള്‍ പ്രവര്‍ത്തന പദ്ധതികള്‍ക്ക്‌ രൂപം നല്‍കിയിട്ടുള്ളത്‌.
മാര്‍ക്‌സിസ്റ്റു പാര്‍ട്ടിയുടെ ഈ പോക്ക്‌ കേരളത്തിന്റെ സമാധാന അന്തരീക്ഷത്തിന്റെ കടയ്‌ക്കല്‍ കത്തിവയ്‌ക്കുവാനാണ്‌. അത്‌ തുടക്കത്തിലെ തടയാന്‍ കഴിയുന്നില്ലങ്കില്‍ സാംസ്‌കാരിക കേരളം വലിയ വിലകൊടുക്കേണ്ടി വരുമെന്ന കാര്യത്തില്‍ സംശയമില്ല. കേരളത്തില്‍ നടക്കുന്നത്‌ കേവലം സിപിഎം ആര്‍എസ്‌എസ്‌ സംഘര്‍ഷങ്ങള്‍ മാത്രമാണോ. അല്ല എന്നു മാത്രമല്ല ഇവിടെ സി.പി.എം എന്ന സംഘടനയുടെ ധാര്‍ഷ്‌ഠ്യത്തിനും അസഹിഷണുതക്കും അക്രമത്തിനും വിധേയമാകാത്ത ഏതെങ്കിലും രാഷ്ട്രീയ പാര്‍ട്ടികള്‍ ഉണ്ടോ, ഏതെങ്കിലും സാംസ്‌കാരിക സ്ഥാപനങ്ങളുണ്ടോ, ഏതെങ്കിലും സാമുദായിക സംഘടനകളുണ്ടോ, എന്തിനേറെ പറയുന്നു ആ പാര്‍ട്ടിക്കുള്ളിലെ വിരുദ്ധ ആശയക്കാരെ വരെ കൈകാര്യം ചെയ്യുന്ന നരാധമന്‍മാരായി ആ പാര്‍ട്ടി മാറിക്കഴിഞ്ഞിരിക്കുന്നു.
ഒരിക്കല്‍ കണ്ണൂരിലെ പിഞ്ചു കുട്ടികളുടെ പരിപാടിക്കിടയില്‍ മനുഷ്യത്വം മരവിച്ച മാര്‍ക്‌സിസ്റ്റുകള്‍ കാട്ടി കൂട്ടിയ അതിക്രമം കണ്ട്‌ മനംനൊന്ത്‌ അതിന്റെ ഉദ്‌ഘാടകനായിരുന്ന സുകുമാര്‍ അഴിക്കോട്‌ മാഷ്‌ പറഞ്ഞ്‌ വാക്കുകള്‍ എത്രയോ ശരിയാണ്‌. മനുഷ്യന്‍ അധപതിച്ചാല്‍ മൃഗമാകും മൃഗം അധപതിച്ചാല്‍ അത്‌ കമ്മ്യൂണിസ്റ്റ്‌ ആകും എന്ന്‌.
ഏതൊരക്രമത്തേയും ന്യായീകരിക്കുവാന്‍ മാര്‍ക്‌സിസ്റ്റ്‌കള്‍ നിരത്തുന്ന വാദഗതിയാണ്‌ ആര്‍.എസ്‌.എസ്‌. ഫാസിസത്തെ പ്രതിരോധിക്കാനാണ്‌ തങ്ങള്‍ ശ്രമിക്കുന്നത്‌ എന്ന്‌ . കണ്ണടച്ച്‌ ഇരുട്ടാക്കുവാനുള്ള ഈ തന്ത്രം മലയാളിയുടെ അടുത്ത്‌ ചിലവാകുകയില്ല എന്ന കാര്യം വിസ്‌മരിക്കരുത്‌. രാഷ്ട്രീയ അന്തത ബാധിച്ച ഒരുപറ്റം മാധ്യമങ്ങളും കപട സാംസ്‌കാരിക നായകന്മാരും എത്ര വെള്ളപൂശാന്‍ ശ്രമിച്ചാലും മാര്‍ക്‌സിസ്‌ററുകളുടെ മുഖംമൂടി അഴിഞ്ഞു വീഴുക തന്നെ ചെയ്യും. ബംഗാളിലെ ജനങ്ങള്‍ എങ്ങിനെ സത്യം തിരിച്ചറിഞ്ഞോ അതേപോലെ കേരള ജനതയും സത്യം തിരിച്ചറിയുന്ന കാലം വിതൂരമല്ല.
കേരളത്തില്‍ സി പി എം ധാര്‍ഷ്‌ഠ്യത്തിനും അസഹിഷ്‌ണക്കും ഇരയാകേണ്ടി വന്നത്‌ സംഘപരിവാര്‍ സംഘടനകള്‍ മാത്രമായിരുന്നില്ല. എന്നു മാത്രമല്ല അവര്‍ ആദ്യം ആക്രമണം അഴിച്ചു വിട്ടത്‌ അവരുടെ തന്നെ രക്തമായ സി.പി.എ. ക്ക്‌ എതിരെയായിരുന്നു. 1964ലെ സിപി എമ്മിന്റെ രൂപീകരണത്തിനു ശേഷം സിപിഎമ്മിന്റെ ക്രിമിനല്‍രാഷ്ട്രീയം ആദ്യം പ്രയോഗിക്കുന്നത്‌ സിപിഐക്കാരോടായിരുന്നു. കാന്തലോട്ട്‌ കുഞ്ഞമ്പുവിനെപോലെ ചുരുക്കം ചില ആളുകള്‍ മാര്‍ക്‌സിസ്റ്റ്‌ ധാര്‍ഷ്‌ഠ്യത്തോട്‌ പൊരുതി നിന്നെങ്കിലും മാന്യരായ പല സി പി ഐ നേതാക്കന്‍മാര്‍ക്കും കേരളത്തില്‍ രാഷ്ട്രീയ പ്രവര്‍ത്തനം തന്നെ ഉപേക്ഷിച്ചു പോകേണ്ടി വന്നിട്ടുണ്ട്‌. സി പിഎം നേതാക്കളെ ഭയന്ന്‌ സി പി ഐക്കാര്‍ക്കു പോലും ഒളിച്ചോടേണ്ട അവസ്ഥയുണ്ടായിട്ടുള്ളത്‌ ആര്‍.എസ്‌.എസ്‌ പ്രവര്‍ത്തനംകൊണ്ടല്ല എന്ന സത്യം അവരും ഓര്‍ക്കുന്നത്‌ നല്ലതാണ്‌.
കണ്ണൂരിലെ മാര്‍ക്‌സിസ്റ്റ്‌ അക്രമ രാഷ്‌ട്രീയത്തിന്റെ പിതാവ്‌ എന്ന്‌ അറിയപ്പെടുന്ന എം.വി. രാഘവന് സി.പി.എം. നല്‍കിയ ഗുരു ദക്ഷിണ എന്തായിരുന്നു എന്ന്‌ നാം വിസ്‌മരിച്ചു കൂടാ. പിണറായിയും കോടിയേരിയും, ജയരാജന്‍മാരും എല്ലാം എം.വി. രാഘവന്റെ ശിക്ഷ്യന്‍മാരായിരുന്നു. രാഘവന് വളര്‍ത്തിയ ആ കണ്ണൂര്‍ ലോബി പില്‍ക്കാലത്ത്‌ എം.വി. രാഘവനെ സിപിഎമ്മില്‍നിന്ന്‌ പുറത്താക്കിയശേഷം രാഘവന്റെ വീടും, പാമ്പുവളര്‍ത്തല്‍ കേന്ദ്രവും ചുട്ടുചാമ്പലാക്കി ഗുരുദക്ഷിണ നല്‍കിയത്‌ കേരള സമൂഹം മറക്കാന്‍ സമയമായിട്ടില്ല. റ്റി പി ചന്ദ്രശേഖരനും തലശ്ശേരിയിലെ ഫസലും, ഷുക്കൂറും എല്ലാം സി പി എം ധാര്‍ഷ്‌ഠ്യത്തിന്റെ ഉദാഹരണങ്ങള്‍ മാത്രമാണ്‌.
റ്റി പി ചന്ദ്രശേഖരന് വധത്തിനപ്പുറം കേരളത്തില്‍ മാര്‍ക്‌സിസ്റ്റ്‌ പാര്‍ട്ടി നടത്തിയിട്ടുള്ള മനുഷ്യക്കുരുതികകളെ വേണ്ടും വിധം ചര്‍ച്ചചെയ്യാന്‍ കേരള സമൂഹം തുനിഞ്ഞിട്ടില്ലന്നതാണ്‌ സത്യം. അല്ലങ്കില്‍ ആടിനെ പട്ടിയാക്കുന്ന സി പി എം നയത്തില്‍ കുടുങ്ങിയ ഇവിടുത്തെ മാധ്യമങ്ങളും സാംസ്‌കാരിക നായകന്മാരും ഇരയുടെ സങ്കടം കാണാതെ വേട്ടക്കാരനെ വെള്ള പൂശാനാണ്‌ ശ്രമിച്ചിട്ടുള്ളത്‌. സാംസ്‌കാരിക ലോകത്തിന്റെ കുറ്റകരമായ മൗനത്തിനും, സിസംഗതയ്‌ക്കും നിരവധി ഉദാഹരണങ്ങള്‍ ചൂണ്ടിക്കാണിക്കാന്‍ കഴിയും. മട്ടന്നൂരില്‍വെച്ച്‌ കെഎസ്‌ആര്‍ടിസി ബസ്‌ യാത്രക്കാരായ അഞ്ചു നിരപരാധികളെ ചുട്ടുകൊന്ന സി പി എം പൈശാചികതയുടെ ചരിത്രം, മുരുക്കുംപുഴയില്‍ യാതൊരു പ്രകോപനവും കൂടാതെ കൗമാരപ്രായക്കാരായ മൂന്നു യുവാക്കളെ കൊന്ന്‌ വയലില്‍ താഴ്‌ത്തിയതും, പരുമലയില്‍ മൂന്നു വിദ്യാര്‍ത്ഥികളെ പുഴയില്‍ തള്ളിയിട്ടശേഷം കല്ല്‌ എറിഞ്ഞുകൊന്നതും, സദാനന്ദന്‍ മാസ്റ്ററുടെ ഇരുകാലുകളും വെട്ടിമാറ്റിയതും, ബി ജെ പി. ജില്ലാ സെക്രട്ടറിയായിരുന്ന പന്ന്യന്നൂര്‍ ചന്ദ്രനെ സ്വന്തം ഭാര്യയുടെ മുന്നിലിട്ട്‌ വെട്ടിനുറുക്കികൊന്നതും, യുവമോര്‍ച്ചയുടെ സംസ്ഥാന ഉപാദ്ധ്യക്ഷനായിരുന്ന ജയകൃഷ്‌ണന്‍ മാസ്റ്ററെ സ്വന്തം ക്ലാസ്‌ മുറിയില്‍ പിഞ്ചുകുട്ടികളുടെ മുന്നിലിട്ട്‌ വെട്ടിനുറുക്കിയതും, തില്ലങ്കേരിയില്‍ ഒരു സ്‌ത്രീയെ ബോംബെറിഞ്ഞ്‌ കൊന്നതും, ഒരു വീട്ടിലെ തന്നെ ആകെയുള്ള രണ്ട്‌ ആണുങ്ങളായ അച്ചനേയും മകനേയും വെട്ടിക്കൊന്നതും എല്ലാം കേരള സമൂഹം അര്‍ഹിക്കുന്ന ഗൗരവത്തോടെ ചര്‍ച്ച ചെയ്‌തിരുന്നുവെങ്കില്‍ യഥാര്‍ത്ഥ കുറ്റക്കാരെ സമൂഹത്തിനു മുന്നിയില്‍ നിര്‍ത്താന്‍ കഴിഞ്ഞിരുന്നെങ്കില്‍ കേരളത്തിലെ ഈ അക്രമ പരമ്പരകള്‍ എന്നേ അവസാനിച്ചേനെ.
കേരളത്തില്‍ അസഹിഷ്‌ണുതയില്‍ നിന്നുയര്‍ന്ന രാഷ്ട്രീയ കൊലപാതകങ്ങള്‍ക്ക്‌്‌ തുടക്കം കുറിച്ചതിന്റെ പിതൃത്വം അവകാശപ്പെടാന്‍ കഴിയുന്നവര്‍ തന്നെയാണ്‌ ഇന്ന്‌ കേരളത്തില്‍ ഭരണത്തിലും പാര്‍ട്ടി തലപ്പത്തും ഇരിക്കുന്നത്‌ എന്ന സത്യവും വിസ്‌മരിച്ചുകൂടാ. കേരളത്തില്‍ സി പി എം പാര്‍ട്ടി രൂപീകൃതമാകുന്നത്‌ 1964 ല്‍ ആണ്‌. ജന്മി, മുതലാളി, നാടുവാഴി, ബൂര്‍ഷ്വാ കൂട്ടുകെട്ടിനെതിരെ സന്ധിയില്ലാ സമരം നടത്തുന്ന ആ പാര്‍ട്ടി കേരളത്തില്‍ കൊല ചെയ്യാന്‍ ആദ്യം തെരഞ്ഞെടുത്തത്‌ പിന്നോക്കസമുദായക്കാരനും തയ്യല്‍ തൊഴിലാളിയുമായ തലശ്ശേരി വാടിക്കല്‍ രാമകൃഷ്‌ണനെയാണ്‌. അയാള്‍ അരേയും നുള്ളി നോവിച്ചിട്ടു പോലുമില്ലാത്ത പാവം ചെറുപ്പക്കാരനായിരുന്നു. അയാള്‍ ചെയ്‌ത കുറ്റം ആര്‍ എസ്‌.എസില്‍ പ്രവര്‍ത്തിച്ചു എന്നതായിരുന്നു. വാടിക്കല്‍ രാമകൃഷ്‌ണന്റെ കൊലപാതകത്തില്‍ പിണറായി വിജയനും കോടിയേരിയും മറ്റും പങ്കെടുത്തിരുന്നു. വര്‍ഷങ്ങള്‍ ഇഴഞ്ഞുനീങ്ങിയ കോടതിനടപടികള്‍ക്കൊടുവില്‍ പിണറായി അടക്കമുള്ളവര്‍ക്ക്‌ രക്ഷപ്പെടാന്‍ കഴിഞ്ഞു. എന്നതുകൊണ്ട്‌ പട്ടാപ്പകല്‍ പരസ്യമായി നാട്ടുകാര്‍ നോക്കി നില്‍ക്കെ തുന്നല്‍ കടയില്‍ നിന്നും വിളിച്ചിറക്കി വെട്ടിക്കൊന്നതിന്റെ പാപത്തില്‍ നിന്നും അവര്‍ക്ക്‌ കൈകഴുകുവാനാകുമോ. അടുത്ത അവരുടെ ഇര പൊന്‍കുന്നത്തെ പി. എസ്‌. ശ്രീധരന്‍നായര്‍ ആയിരുന്നു. 1969 സപ്‌തംബര്‍ 2 ന്‌ പൊന്‍കുന്നത്തിനടുത്ത്‌ എളങ്കുളത്ത്‌ വച്ചാണ്‌ മാര്‍ക്‌സിസ്റ്റ്‌ കൊലയാളികള്‍ അദ്ദേഹത്തിന്റെ വധശിക്ഷ നടപ്പാക്കിയത്‌. മാര്‍ക്‌സിസ്റ്റുപാര്‍ട്ടി മുസ്ലീം ലീഗുമായി സംഖ്യമുണ്ടാക്കിയതില്‍ പ്രതിക്ഷേധിച്ച്‌ നിരവധി ആളുകള്‍ 1967 നു ശേഷം ആ പാര്‍ട്ടിയില്‍ നിന്നും രാജി വയ്‌ക്കുകയും ജനസംഘവുമായി ചേര്‍ന്ന്‌ പ്രവര്‍ത്തിക്കുകയും ചെയ്‌തിരുന്നു. അക്കൂട്ടത്തില്‍ സി പി എം ല്‍ നിന്നും രാജി വച്ച്‌ ജനസംഘത്തില്‍ ചേര്‍ന്നു പ്രവര്‍ത്തിച്ചു എന്നതാണ്‌ ശ്രീധരന്‍ നായര്‍ ചെയ്‌ത കുറ്റം. 1978 സെപ്‌തംബര്‍ 2 ന്‌ മാര്‍ക്‌സിസ്റ്റ്‌ ഗുണ്ടകളുടെ ഒരു വന്‍ സംഘം ശാഖ ആക്രമിച്ചു കൊലപ്പെടുത്തിയ പാനുണ്ട ചന്ദ്രന്‍ ചെയ്‌ത കുറ്റം സി പി എം ലോക്കല്‍ കമ്മറ്റി സെക്രട്ടറിയുടെ മകനായിട്ടും വിദ്യാര്‍ത്ഥി പരിഷത്തിലും ആര്‍ എസ്സ്‌ എസിലും ചേര്‍ന്നു പ്രവര്‍ത്തിച്ചു എന്നതാണ്‌. കേരളത്തില്‍ സ പി എം. നടത്തിയിട്ടുള്ള ഒട്ടു മിക്ക കൊലകള്‍ക്ക്‌ പിന്നിലേയും ചേതോവികാരം സമാനമായിരുന്നു. പാര്‍ട്ടി വച്ചു പുലര്‍ത്തിയിരുന്ന അസഹിഷ്‌ണുത ഒന്നുമാത്രം.
ഈ സംഘര്‍ഷങ്ങള്‍ അവസാനിപ്പിക്കുവാന്‍ യാതൊരു തടസ്സവുമില്ല. കേരളത്തിലെ മറ്റ്‌ സ്ഥലങ്ങളിലെ പോലെ എല്ലാം സംഘടനകള്‍ക്കും ജനാധിപത്യമര്യാദകളോടെ സ്വതന്ത്രമായ പ്രവര്‍ത്തിക്കുവാനുള്ള അവസരം സി പി എം തടസ്സപ്പെടുത്താതിരുന്നാല്‍ തീരുന്ന പ്രശ്‌നങ്ങളെ കേരളത്തില്‍ ഉള്ളൂ. അതിന്‌ സി പി എം തയ്യാറാകത്തിടത്തോളം കാലം സമാധാനം ഉണ്ടാവുകയുമില്ല
ഈ സംഘര്‍ഷത്തിന്‌ അയവു വരുത്തുവാനുള്ള സമാധാന ചര്‍ച്ചകള്‍ക്ക്‌ എന്നും നേതൃത്വം നല്‍കിയിരുന്നത്‌ ആര്‍ എസ്‌.എസ്‌. ഭാഗത്തു നിന്നുമായിരുന്നു. എന്നാല്‍ അവയെ എല്ലാ കാലത്തും തുരങ്കം വച്ചിരുന്നത്‌ മാര്‍ക്‌സിസ്റ്റുകാരായിരുന്നു. സമാധാന കരാറിന്റെ മഷി ഉണങ്ങും മുമ്പ്‌ തന്നെ കൊലക്കത്തി കയ്യിലെടുക്കുന്ന സി പി എം നയം കേരളത്തിന്റെ സമാധാന ശ്രമങ്ങള്‍ക്ക്‌ എന്നും തടസ്സമായിരുന്നു. ഇത്‌ കേരളത്തിലെ സി പി എം നേതൃത്വം പിന്‍തുടര്‍ന്നു വരുന്ന സ്റ്റാലിനിസ്റ്റ്‌ ചിന്താഗതിയുടെ പ്രതിഫലനമാണ്‌. ലോകത്ത്‌ ഭീകരതയുടെ പ്രതീകമായി നാം എന്നും പറയാറുള്ളത്‌ ഹിറ്റ്‌ലറെ ആണങ്കിലും അതിലും വലിയ ഭീകരത കമ്മ്യൂണിസമായിരുന്നുവെന്ന്‌ ചരിത്രം നമ്മെ പഠിപ്പിക്കുന്നു. സഹജീവി സ്‌നേഹമെന്നത്‌ അന്യമായി കരുതി കശാപ്പുകാരന്റെ മനസ്ഥിതിയോടെ കൊടുംക്രൂരതകള്‍ മനുഷ്യന്റെമേല്‍ അടിച്ചേല്‍പ്പിച്ചവരായിരുന്നു സി പി എമ്മിന്റെ മാതൃകാ പുരുഷന്‍മാരായ ലെനിനും, സ്റ്റാലിനും, മാവോയും എല്ലാം.
പ്രൊഫ. ആര്‍.ജെ. റമ്മലിന്റെ Death Goveremetns!! എന്നഗ്രന്ഥത്തെ ആശ്രയിച്ചാല്‍ ലോകചരിത്രത്തിലെ ഏറ്റവും വലിയ കൊലയാളി സ്റ്റാലിനായിരുന്നുവെന്ന്‌ കാര്യകാരണസഹിതം ആര്‍ക്കും ബോദ്ധ്യപ്പെടും. സ്റ്റാലിന്‍ 4.26 കോടി ആളുകളേയും മാവോ ചൈനയില്‍ 3 കോടി ആളുകളേയും , ഹിറ്റ്‌ലര്‍ 2 കോടിയോളം ആളുകളേയും കൊന്നൊടുക്കിയത്രേ. സോവിയറ്റ്‌ റഷ്യയിലെ നരഹത്യയുടെ തീനാമ്പുകള്‍ തുടച്ചുമാറ്റിയ മനുഷ്യാത്മാക്കളുടെ പട്ടികയില്‍ സ്റ്റാലിന്റെ സഹപ്രവര്‍ത്തകരും ആത്മമിത്രങ്ങളും ആവോളമുണ്ടായിരുന്നു. കൊടുംക്രൂരനായിരുന്നു സ്റ്റാലിന്‍ എന്ന സത്യം ആര്‍ക്കും നിഷേധിക്കാനാവില്ല. മുപ്പുതകളിലെ രാഷ്ട്രീയ കൊലപാതകങ്ങളുടെ നിഷ്‌ഠുരതയില്‍ സോവിയറ്റ്‌ കമ്യൂണിസ്റ്റ്‌ പാര്‍ട്ടി കൊന്നൊടുക്കിയ നേതാക്കളുടെ ഏകദേശ ചിത്രം കിട്ടാന്‍ 17-ാം പാര്‍ട്ടി കോണ്‍ഗ്രസ്സിനും 18- ാം പാര്‍ട്ടികോണ്‍ഗ്രസ്സിനുമിടയില്‍ അപ്രത്യക്ഷരായ നേതാക്കളുടെ പട്ടിക പരിശോധിച്ചാല്‍ മതിയാകും.
1934 ല്‍ നടന്ന പാര്‍ട്ടി കോണ്‍ഗ്രസ്സില്‍ പങ്കെടുത്ത കേന്ദ്രകമ്മറ്റി അംഗങ്ങളുടെ എണ്ണം 139 ആയിരുന്നു. എന്നാല്‍ 18 -ാം പാര്‍ട്ടി കോണ്‍ഗ്രസ്‌ ആകുമ്പോഴേക്കും അവരില്‍ 110 പേര്‍ കൊല്ലപ്പെടുകയോ അപ്രത്യക്ഷരാവുകയോ ചെയ്‌തിരുന്നു. 17-ാം പാര്‍ട്ടി കോണ്‍ഗ്രസ്സില്‍ സംബന്ധിച്ച 1966 പ്രതിനിധികളില്‍ 1018 പേരും അടുത്തപാര്‍ട്ടി കോണ്‍ഗ്രസ്സ്‌ ആകുമ്പോഴേക്കും ഭൂമുഖത്തുണ്ടായിരുന്നില്ല. പാര്‍ട്ടിക്കുവേണ്ടിയോ പദവിക്കുവേണ്ടിയോ ഉള്ള നെട്ടോട്ടത്തില്‍ സഹോദരസ്ഥാനീയരായ സഹപ്രവര്‍ത്തകരെ പോലും എതിര്‍ശബ്ദത്തിന്റെ പേരില്‍ കൊന്നൊടുക്കിയ സ്റ്റാലിനിസം എന്ന കൊടുംഭീകരതയുടെ പ്രേതമാണ്‌ കേരളത്തിലെ സിപിഎം ഇപ്പോഴും നെഞ്ചിലേറ്റി നടക്കുന്നത്‌. ലോകമെമ്പാടുമുള്ള കമ്യൂണിസ്റ്റുകാര്‍ സ്റ്റാലിന്റെ പ്രേതത്തെ വലിച്ചെറിഞ്ഞുവെങ്കിലും ഇന്ത്യയിലെ സിപിഎം മാത്രാണ്‌ അതിപ്പോഴും പൂജാവിഗ്രഹമായി കൊണ്ടുനടക്കുന്നത്‌.
ആര്‍. എസ്‌. എസിനെ ഒരു തരത്തിലും പ്രവര്‍ത്തിക്കാന്‍ അനുവദിക്കുകയില്ല എന്ന സ്റ്റാലിനിസ്റ്റ്‌ ചിന്താഗതിക്കാരായ സി പി എംന്റെ ധാര്‍ഷ്‌ഠ്യവും അസഹിഷ്‌ണുതയുമാണ്‌ സംഘര്‍ങ്ങള്‍ക്ക്‌ തുടക്കം കുറിക്കാന്‍ കാരണം. മുഖ്യമന്ത്രിയായിരുന്ന ഇ.കെ. നായനാരും ആഭ്യന്തരമന്ത്രി ടി.കെ. രാമകൃഷ്‌ണനും കേരളത്തില്‍നിന്ന്‌ ആര്‍എസ്‌എസിനെ തുടച്ചുനീക്കുമെന്ന്‌ പ്രഖ്യാപിച്ചു. മറ്റൊരു മന്ത്രി എം.കെ. കൃഷ്‌ണന്‍ ആര്‍എസ്‌എസ്സുകാരെ പേപ്പട്ടിയെന്നപോലെ തല്ലിക്കൊല്ലണമെന്ന്‌ ആഹ്വാനംചെയ്‌തു. എം.വി. രാജഗോപാലന്‍ എംഎല്‍എ മൂന്ന്‌ ദിവസം കൊണ്ട്‌ ആര്‍എസ്‌എസിനെ തന്റെ പാര്‍ട്ടി വകവരുത്തുമെന്നും അതിനായി ആക്ഷന്‍ സ്‌ക്വാഡുകള്‍ രൂപീകരിച്ചിട്ടുണ്ടെന്നും പ്രഖ്യാപിച്ചു. ആര്‍എസ്‌എസ്‌ പ്രവര്‍ത്തനങ്ങള്‍ അവസാനിക്കാത്തിടത്തോളം അക്രമങ്ങളുമുണ്ടാകുമെന്നായിരുന്നു ഇഎംഎസ്‌ തലശ്ശേരിയില്‍ പ്രഖ്യാപിച്ചത്‌. ഇതെല്ലാം കേരളത്തിലെ മാര്‍ക്‌സിറ്റ്‌ നേതാക്കളുടെ അസഹിഷ്‌മുതയുടെ ശബ്‌ദിക്കുന്ന തെളിവുകളാണ്‌. സി പി എം ഭരണം കൂടി വന്നപ്പോഴേക്കും ഈ ധാര്‍ഷ്‌ഠ്യയവും അസഹിഷ്‌ണുതയും വര്‍ദ്ധിച്ചതോടെ പ്രതിരോധിക്കാതെ മുന്നോട്ടു പോകുവാന്‍ കഴിയാത്ത സാഹചര്യം വന്നു പെടുകയായിരുന്നു. സമൂഹ മനസ്സിനെ ചിട്ടപ്പെടുത്തേണ്ട മാധ്യമങ്ങളും സാംസ്‌കാരിക നായകന്മാരും കൊല്ലപ്പെടുന്നത്‌ ആര്‍എസ്‌എസ്‌ കാരനായതുകൊണ്ട്‌ അപലപിക്കേണ്ടതില്ല എന്ന നയമാണ്‌ സ്വീകരിച്ചത്‌. നിഷ്‌പക്ഷമതികളെന്ന്‌ അഭിമാനിക്കുന്ന ചിലര്‍ ഇരയെയും വേട്ടക്കാരനെയും ഒരേ നാണയത്തിന്റെ ഇരുവശങ്ങളായും ചിത്രീകരിച്ചു. ഫലമോ നിരന്തര ആക്രമണത്തിനു വിധേയരായി സംഘ പ്രസ്ഥാനങ്ങള്‍ക്ക്‌ പ്രതിരോധിക്കാതെ നിവൃത്തിയില്ലാതെ വന്നപ്പോള്‍ സംഘര്‍ഷത്തിന്റെ ചരിത്രം മനസിലാക്കാത്തവര്‍ സംഘത്തിനെതിരെ നുണ പ്രചരിപ്പിക്കാനും തുടങ്ങി.
മാര്‍ക്‌സിസ്റ്റ്‌ ഭീകരതക്കെതിരായി പ്രതിരോധത്തിന്റെ ഉരുക്കുമതില്‍ സൃഷ്‌ടിച്ചുകൊണ്ട്‌ സംഘപ്രസ്ഥാനങ്ങള്‍ മുന്നോട്ടു പോയപ്പോള്‍ അവര്‍ക്ക്‌ ഒരു കാര്യം മനസിലായി എതിര്‍ക്കുന്തോറും പതിന്മടങ്ങ്‌ ശക്തിയോടെ സംഘ പ്രവര്‍ത്തനം വര്‍ദ്ധിക്കുകയാണന്ന്‌. അതുവരെ പരസ്യമായി ആര്‍ എസ്‌ എസിനെ ഉന്മൂലനം ചെയ്യുമെന്ന്‌ പ്രഖ്യാപിച്ച്‌ അക്രമം അഴിച്ചു വിട്ടുകൊണ്ടിരുന്നവര്‍ പതുക്കെ പതുക്കെ അടവു മാറ്റി പിടിക്കാന്‍ തുടങ്ങി. 90 കളുടെ അവസാനം വരെ പരസ്യമായ ഉന്മൂല സിദ്ധാന്തവുമായി നടന്നിരുന്നവര്‍ രണ്ടായിരം കടന്നപ്പോഴേക്കും പ്രതിരോധത്തിന്റെ പരിച ഉയര്‍ത്താന്‍ തുടങ്ങി. മാര്‍ക്‌സിസ്റ്റ്‌ അസഹിഷ്‌ണുതയുടേയും ഉന്മൂലനത്തിന്റേയും ചോര പുരണ്ട ഇരുളടഞ്ഞ ഭൂതകാലത്തിന്‌ നുണയുടെ കവചങ്ങള്‍ തീര്‍ത്ത്‌ ആര്‍ എസ്‌ എസിനെ പ്രതിക്കൂട്ടിലാക്കുക എന്ന തന്ത്രമാണ്‌ ആവര്‍ പരീക്ഷിച്ചത്‌. അതിനവര്‍ക്ക്‌ കൂട്ടായി കേരളത്തിലെ സംഘവിരുദ്ധ- ദേശവിരുദ്ധ ആശയഗതിക്കാരായ പ്രസ്ഥാനങ്ങളും മാധ്യമങ്ങളും കൂടി രംഗത്ത്‌ എത്തിയതോടെ അവര്‍ക്ക്‌ കാര്യങ്ങള്‍ എളുപ്പമാവുകയും ചെയ്‌തു. ഫലമോ ഇരയേയും വേട്ടക്കാരനേയും തിരിച്ചറിയാന്‍ കഴിയാത്ത തരത്തില്‍ മരീചിക സൃഷ്‌ടിക്കുന്നതില്‍ ഒരു പരിധി വരെ അവര്‍ വിജയിക്കുകയും ചെയ്‌തു.
പക്ഷെ സത്യം എന്നത്‌ സൂര്യനെ പോലെ തെളിഞ്ഞു നില്‍ക്കുന്നുണ്ട്‌. നുണ എന്ന ഒരു പാഴ്‌മുറം കൊണ്ട്‌ എത്രനാള്‍ അതിനെ മൂടി വയ്‌ക്കാന്‍ കഴിയും. കമ്മ്യൂണിസ്റ്റ്‌ പ്രത്യയശാസ്‌ത്രത്തിന്റെ അടിത്തറ എന്നു പറയുന്നത്‌ തന്നെ നുണയാണ്‌. നുണ പറയാനും അതു പ്രചരിപ്പിക്കുവാനും കുറച്ചു പേരെയെങ്കിലും അതു വിശ്വസിപ്പിക്കുവാനുമുള്ള അവരുടെ കഴിവ്‌ അപാരം തന്നെയാണ്‌. അവര്‍ ശത്രുവായി ഒരാളേയോ, സംഘടനേയോയോ പ്രഖ്യാപിച്ചാല്‍ ആദ്യം അപകീര്‍ത്തിപ്പെടുത്തും പിന്നെ വിചാരണ ചെയ്‌ത്‌ വിധി പ്രഖ്യാപിക്കും. തുടര്‍ന്ന്‌ നാടു മുഴുവന്‍ നുണയുടെ കെട്ടഴിച്ചു വിടും സംസ്ഥാന സെക്രട്ടറി മുതല്‍ ബ്രാഞ്ചു സെക്രട്ടറി വരെ ഒരേ രാഗത്തില്‍ നുണരാഗം പാടി ജനമനസ്സില്‍ വിദ്വേഷത്തിന്റെ വിഷം പടര്‍ത്തും. പിളര്‍പ്പിനു ശേഷം സി പി ഐ നേതാക്കന്‍മാര്‍ക്ക്‌ എതിരേയും , പിന്നീട്‌ ആര്‍ എസ്‌.എസ്‌. ബി.ജെ.പി നേതാക്കള്‍ക്കെതിരേയും, എം.വി.രാഘവനും, ഗൗരി അമ്മക്കും, റ്റി പി ചന്ദ്രശേഖരനും, പാര്‍ട്ടിക്കുള്ളില്‍ കലാപമുയര്‍ത്തിയ ഒട്ടനവധി മറ്റ്‌ വിമത നേതാക്കള്‍ക്കെതിരേയും നടത്തിയിട്ടുള്ള പ്രചാരണങ്ങളുടേയും, വിചാരണകളുടേയും കഥകള്‍ പരിശോധിച്ചാല്‍ ഈ നുണരാഗത്തിന്റെ ആവര്‍ത്തനങ്ങള്‍ നമുക്ക്‌ ശ്രവിക്കാന്‍ കഴിയും
കാലാകാലങ്ങളായി സി പി എം നടത്തികൊണ്ടിരിക്കുന്ന കൊള്ളരുതായ്‌മകളും അക്രമങ്ങളും മറ്റുള്ളവരുടെ തലയില്‍ കെട്ടിവച്ച്‌ മുഖം രക്ഷിക്കുവാനുള്ള നുണയുടെ പ്രത്യയശാസ്‌ത്ര പരീക്ഷണങ്ങള്‍ പല സംഭവങ്ങളിലും നമുക്ക്‌ കാണാന്‍ കഴിയും. അത്‌ അവരുടെ അടവുനയമാണ്‌. അതിന്‌ ഓശാന പാടാന്‍ തയ്യാറായ ഒരു പറ്റം മാധ്യമങ്ങളേയും കപട ബുദ്ധി ജീവികളേയും അവര്‍ ഒരുക്കി നിര്‍ത്തിയിട്ടുണ്ടാവും. പിണറായി വിജയന്‍ കുലംകുത്തിയെന്ന്‌ പ്രഖ്യാപിച്ച്‌ വിചാരണ നടത്തി വധ ശിക്ഷക്കു വിധിച്ച റ്റി പി ചന്ദ്രശേഖരനെ വധിച്ചതിനുശേഷം വണ്ടിയുടെ പുറകില്‍ മാഷാ അള്ളാ എന്ന്‌ എഴുതി വച്ചതിനുശേഷം വധത്തിനു പിന്നില്‍ ഇസ്ലാമിക തീവ്രവാദ സംഘടനകളാണന്നും അവസാനമായി ചന്ദ്രശേഖരന് വന്ന കോള്‍ ഒരു പെണ്ണിന്റേതാണന്നും പ്രചരിപ്പിച്ച്‌ വഴിതിരിച്ചുവിടുവാനുള്ള മാര്‍ക്‌സിസ്റ്റ്‌ തന്ത്രം ഇതേ നുണരാഗത്തിന്റെ ആവര്‍ത്തനം തന്നെയാണ്‌.
ഡി വൈ, എഫ്‌, വൈ പ്രവര്‍ത്തകനായിരുന്ന തലശ്ശേരി സ്വദേശി ഫസല്‍ എന്ന ചെറുപ്പക്കാരന്‍ പാര്‍ട്ടി വിട്ട്‌ എന്‍ ഡി എഫില്‍ ചേര്‍ന്നതിന്റെ പ്രതികാരം തീര്‍ക്കാന്‍ ദേശാഭിമാനി ഏജന്റ്‌ കൂടിയായ ഫസലിനെ സി പി എം നേതാക്കള്‍ ചേര്‍ന്ന്‌ ഗൂഢാലോചന നടത്തി വകവരുത്തി. എന്നിട്ട്‌ ഫസലിന്റെ രക്തം പുരണ്ട തൂവാല ആര്‍.എസ്‌.എസ്‌ പ്രവര്‍ത്തകന്റെ വീടിനു സമീപം ഉപേക്ഷിച്ചു. പിറ്റേന്ന്‌ നുണരാഗം ആലപിക്കാന്‍ ആദ്യം എത്തിയത്‌ അന്നത്തെ ആഭ്യന്തര വകുപ്പ്‌ മന്ത്രി കോടിയേരിയാണ്‌. പോലീസ്‌ അന്വേഷണം ആരംഭിക്കുന്നതിന്‌ മുമ്പു തന്നെ അദ്ദേഹം പ്രഖ്യാപിച്ചു പ്രതികള്‍ ആര്‍.എസ്‌ എസ്‌ കാരാണന്ന്‌. നോമ്പ്‌ കാലത്താണ്‌ സി പി എം ഈ അക്രമം നടത്തിയത്‌. സ്ഥലത്തെത്തിയ സമുന്നതനായ സി പി എം നേതാവ്‌ കാരായി ഒരുപടി കൂടി കടന്ന്‌ നുണരാഗം ആലപിച്ചു. ഈ കോലപാതകം ഇസ്‌മാമിക വിശ്വാസത്തോടുള്ള വെല്ലുവിളിയാണന്ന്‌ വരെ പറഞ്ഞു. അവരുടെ ലക്ഷ്യം അവിടെ ഒരു വര്‍ഗ്ഗീയ സംഘര്‍ഷം സൃഷ്‌ടിക്കുകയായിരുന്നു. അവസാനം ഫസലിനെ കൊന്ന കേസില്‍ അതേ കാരായി അടക്കമുള്ള സി പി എം നേതാക്കള്‍ പ്രതികളായി ജയിലിലാവുകയും ചെയ്‌തു.
തളിപ്പറമ്പ്‌ അരിയില്‍ പ്രദേശത്തെ ലീഗ്‌ പ്രവര്‍ത്തനകനായ ഷുക്കൂര്‍ എന്ന യുവാവിനെ ജയരാജന്റെ കാറിനു നേരെ കല്ലെറിഞ്ഞു എന്ന കുറ്റം ആരോപിച്ച്‌ പാര്‍ട്ടി ഗുണ്ടകള്‍ പിടിച്ചുകൊണ്ടു വന്ന്‌ വയലില്‍ കെട്ടിയിട്ട്‌ പാര്‍ട്ടി കോടതി പരസ്യമായി വിചാരണ ചെയ്‌ത്‌ വധ ശിക്ഷ വിധിച്ചു. എന്നിട്ട്‌ ആ കൊലപാതകം പോപ്പുലര്‍ ഫ്രണ്ടിന്റെ തലയില്‍ കെട്ടി വയ്‌ക്കാന്‍ ശ്രമം നടത്തി. ഒടുവില്‍ സി പി എം നുണക്കഥകളെ അവഗണിച്ച്‌ പോലീസ്‌ സി പി എം നേതാക്കള്‍ക്ക്‌ എതിരെ കേസ്സെടുത്തു.
ഒരവസരത്തില്‍ അച്ചുതാന്ദന്‍ പറഞ്ഞു കമ്മ്യൂണിസ്റ്റുകാര്‍ തള്ളയെ തല്ലുന്നവരല്ല എന്ന്‌. എന്നാല്‍ അവര്‍ തന്തയുടെ തല തല്ലിപ്പൊട്ടിക്കുന്നവരാണന്ന്‌ ആലപ്പുഴയിലെ സഖാക്കള്‍ തെളിയിച്ചു. പാര്‍ട്ടിയിലെ ഗ്രൂപ്പ്‌ വഴക്കിന്റെ ഭാഗമായി ഒരു വിഭാഗം സി പി എം നേതാക്കള്‍ ചേര്‍ന്ന്‌ പാര്‍ട്ടിയുടെ കേരളത്തിലെ ഏറ്റവും പ്രമുഖനായ നേതാവായിരുന്ന പി കൃഷ്‌ണപിള്ളയുടെ പ്രതിമയുടെ തല തല്ലിപ്പൊട്ടിച്ചു, സ്‌മാരകത്തിന്‌ തീയുമിട്ടു. ഉടന്‍ തന്നെ കമ്മ്യൂണിസത്തിന്റെ കുടില ബുദ്ധി ഉണര്‍ന്നു. നുണരാഗത്തിന്റെ ശീലുകള്‍ അവിടെയും മുഴക്കി. സ്‌മാരകം തകര്‍ത്തതിന്റെ പിന്നില്‍ കോണ്‍ഗ്രസ്സുകാരണന്ന്‌ പറഞ്ഞ്‌ പ്രക്ഷോഭവും ഹര്‍ത്താലും ഒക്കെ നടത്തി. ഒടുവില്‍ സമരത്തിനും മറ്റും നേതൃത്വം നല്‍കിയ സി പി എം നേതാവിനെ തന്നെ പ്രതിയാക്കി പോലീസിനു കേസ്സെടുക്കേണ്ടി വന്നു.
കൂത്തുപറമ്പിനടുത്ത വെണ്ടുട്ടായി എന്ന ഗ്രാമത്തില്‍ സിപിഎം ആയ ഉണ്ടായ സംഘര്‍ഷത്തിന്റെ പേരില്‍ ചില വീടുകള്‍ ആക്രമിക്കപ്പെട്ടു. അതില്‍ ഒരു വീട്ടില്‍ ശരീരത്തില്‍ സോഡിയം കുറയുന്ന രോഗത്തിന്‌ ചികിത്സയിലായിരുന്ന ഒരു സരോജിനിയമ്മ യുണ്ടായിരുന്നു. അസുഖം മൂര്‍ച്ഛിച്ച ആ അമ്മയെ പരിയാരം മെഡിക്കല്‍ കോളേജില്‍ പ്രവേശിപ്പിച്ചു. 18ാം ദിവസം അവര്‍ മരിച്ചു. അപ്പോഴേക്കും മാര്‍ക്‌സിസ്റ്റ്‌ പാര്‍ട്ടിയുടെ കുടില ബുദ്ധി ഉണര്‍ന്നു. ഗ്രാമമൊന്നടങ്കം ദുഃഖാകുലമായി കഴിയുന്ന ആ ദിവസം വൈകുന്നേരം നുണരാഗ വിദഗ്‌ദന്‍ ജില്ലാ സെക്രട്ടറി ജയരാജന്‍ അടിയന്തര പത്രസമ്മേളനം നടത്തി. ആര്‍എസ്‌എസ്‌ പ്രവര്‍ത്തകര്‍ ഒരു സ്‌ത്രീയെ ആക്രമിച്ചു കൊലപ്പെടുത്തി എന്ന്‌ മാധ്യമപ്രവര്‍ത്തകര്‍ക്കു മുന്നില്‍ പ്രഖ്യാപിച്ചു. ‘ദേശാഭിമാനി’ ഒഴിച്ചുള്ള ഒരു മാധ്യമവും കേട്ടതായിപ്പോലും ഭാവിച്ചില്ല. സത്യം അറിയാവുന്ന നാട്ടുകാരും പോലീസും നുണരാഗത്തില്‍ വീണതുമില്ല.
നീര്‍ക്കടവ്‌ എന്ന ഗ്രാമത്തില്‍ അരങ്ങേറിയത്‌ വിചിത്രമായ മറ്റൊന്നാണ്‌. അവിടെയുള്ള ഒരു സിപിഎം പ്രവര്‍ത്തകന്‍ ബ്രാഞ്ച്‌ സെക്രട്ടറിയായ വസന്തനുമായി വാക്കുതര്‍ക്കത്തിലേര്‍പ്പെട്ടു. കാര്യം കയ്യാങ്കളിയിലെത്തി. ബ്രാഞ്ച്‌ സെക്രട്ടറി അച്ഛനെ കൈകാര്യം ചെയ്യുന്നതു കണ്ട ഡിവൈഎഫ്‌ഐക്കാരായ മക്കള്‍ ദേഷ്യം തീര്‍ത്തത്‌ പാര്‍ട്ടി ഓഫീസിനോടാണ്‌. ‘ഇവിടെ ഇനി ഈ പാര്‍ട്ടിയും വേണ്ട, പാര്‍ട്ടി ആപ്പീസും വേണ്ട’ എന്നു വിളിച്ചുപറഞ്ഞ്‌ ആപ്പീസിനുള്ളില്‍ പാഞ്ഞുകയറി കണ്ണില്‍ കണ്ടതെല്ലാം തകര്‍ത്തു. പാര്‍ട്ടി അണികളില്‍ നേതൃത്വത്തിനെതിരെ പതഞ്ഞുപൊങ്ങുന്ന രോഷം എങ്ങനെയൊക്കെ പ്രകടമാവും എന്നതിന്റെ ഒരു സാമ്പിള്‍ മാത്രമായിരുന്നു അത്‌ . ഭാവിയില്‍ എന്തൊക്കെ സംഭവിക്കും എന്ന്‌ കണ്ടറിയേണ്ടിയിരിക്കുന്നു. ഈ സംഭവം കാലത്ത്‌ 11 മണിയോടെയാണ്‌. ഉച്ചയോടുകൂടി നുണരാഗ വിദഗ്‌ദര്‍ രംഗത്ത്‌ എത്തി നുണപ്രചാരണം വന്നു, ‘സിപിഎം ആപ്പീസ്‌ ആര്‍എസ്‌എസുകാര്‍ പൊളിച്ചു, പ്രതിഷേധിക്കുക, പ്രതികരിക്കുക�` പ്രതികരണമുണ്ടായി. വൈകുന്നേരത്തോടെ സംഘത്തിന്റെ മണ്ഡല്‍ കാര്യവാഹിനെ ആക്രമിച്ചു. വീട്‌ തകര്‍ത്തു.
ഇത്തരത്തില്‍ സി പി എം നേതൃത്വം നടത്തുന്ന നുണ പ്രചാരണങ്ങളുടെ കെട്ടഴിച്ചു വിടാന്‍ തുടങ്ങിയാല്‍ ഇവിടെയെങ്ങും നില്‍ക്കില്ല അത്രക്കു വരും അവരുടെ നുണക്കഥകള്‍. ഇത്തരം നുണക്കഥകള്‍ നിരത്തി തന്നെയാണ്‌ കാലാകാലങ്ങളായ സി പി എം നേതൃത്വം ആര്‍ എസ്‌ എസിനെതിരെ പച്ചകള്ളങ്ങള്‍ പ്രചരിപ്പിക്കുന്നത്‌ എന്ന പകല്‍ വെളിച്ചം പോലെ വ്യക്തമാണ്‌. പക്ഷെ സത്യം യാത്രയ്‌ക്കായി ചെരുപ്പ്‌ അണിയുമ്പോഴേക്കും നുണ ലോക സഞ്ചാരം പൂര്‍ത്തിയാക്കി കഴിഞ്ഞിരിക്കും എന്നു പറഞ്ഞതുപോലെയാണ്‌ ഇവിടുത്തെ കാര്യങ്ങള്‍. യഥാര്‍ത്ഥ വസ്‌തുതകള്‍ ഇനിയും ജനങ്ങളിലേക്ക്‌ എത്തപ്പെട്ടിട്ടില്ല.
സി പി എം അതിക്രമങ്ങളുടെ നേര്‍ചിത്രം ജനങ്ങളിലേക്ക്‌ എത്തപ്പെടുന്നതോടെ പശ്ചിമ ബംഗാളിലെ അവസ്ഥയിലേക്ക്‌ കേരളംത്തിലെ സി പി എം പാര്‍ട്ടിയും എത്തിപ്പെടുമെന്ന കാര്യത്തില്‍ ഒരു സംശയവുമില്ല. കൈയൂക്കുകൊണ്ട്‌ കാര്യങ്ങള്‍ വരുതിയിലാക്കുന്ന സിപിഎം ശൈലിയാണ്‌ ഇന്നും സാക്ഷരകേരളം നേരിടുന്ന ഏറ്റവും വലിയ വെല്ലുവിളി. കണ്ണൂര്‍ കാസര്‍കോട്‌ ജില്ലകളിലും മറ്റും ശവസംസ്‌കാര ചടങ്ങുകളില്‍ അനുശോചനമറിയിക്കാന്‍ എത്തുന്ന സമുദായ സംഘടനകളെ അതിനനുവദിക്കില്ലെന്ന്‌ സിപിഎം സംസ്ഥാന സെക്രട്ടേറിയറ്റംഗം ഗോവിന്ദന്‍ മാസ്റ്റര്‍ പരസ്യമായി പ്രസ്‌താവിച്ചിരുന്നു. ഇതിനെതുടര്‍ന്ന്‌ തളിപ്പറമ്പിനടുത്ത്‌ റീത്തുമായെത്തിയ എസ്‌എന്‍ഡിപി പ്രവര്‍ത്തകരെ സിപിഎമ്മുകാര്‍ ബലപ്രയോഗം നടത്തി തുരത്തിയോടിച്ചിരുന്നു.
മട്ടന്നൂരിനടുത്ത്‌ പെരുവയല്‍ക്കരയില്‍ സ്വന്തം കരയോഗത്തില്‍പ്പെട്ട അംഗത്തിന്റെ വീട്ടിലെ മരണത്തില്‍ അനുശോചിക്കാനെത്തിയ എന്‍എസ്‌എസ്‌ പ്രവര്‍ത്തകരെ സിപിഎമ്മുകാര്‍ ആക്രമിച്ചു. അന്തരിച്ച ആളിനെ ആദരിക്കാനായി കൊണ്ടുവന്ന റീത്ത്‌ സിപിഎമ്മുകാര്‍ ബലം പ്രയോഗിച്ച്‌ നശിപ്പിക്കുകയും അവരെ അപമാനിച്ച്‌ ഓടിക്കുകയുമാണുണ്ടായത്‌. ഇതൊന്നും ഒറ്റപ്പെട്ട സംഭവങ്ങള്‍ അല്ല.
മറ്റൊരു പാര്‍ട്ടി പ്രവര്‍ത്തകന്‌്‌ പാര്‍ട്ടി മാടമ്പിമാരില്‍ നിന്ന്‌ നേരിടേണ്ടിവന്ന കയ്‌പേറിയ അനുഭവം പുറംലോകം അധികമറിഞ്ഞിട്ടില്ല. ‘വീര വിപ്ലവ ചരിതം’ പാടുന്ന തില്ലങ്കേരിക്കടുത്ത പുരളിമാല പെരിങ്ങാവ്‌ പാര്‍ട്ടി ഗ്രാമത്തില്‍ ഉണ്ടായ സംഭവം ഇതാണ്‌; കറകളഞ്ഞ പാര്‍ട്ടി അനുഭാവിയും ഈഴവ സമുദായംഗവുമായ ഒരു സാധാരണക്കാരന്‍. മകളുടെ വിവാഹം ആഘോഷമായിത്തന്നെ നടത്താനുറച്ചു. വീട്ടില്‍ വെച്ചു നടത്താന്‍ നിശ്ചയിച്ച വിവാഹത്തിനായി ഒരുക്കിയ കതിര്‍ മണ്ഡപത്തിനടുത്ത്‌ ശ്രീനാരായണ ഗുരുദേവന്റെ വലിയൊരു പടവും അലങ്കരിച്ചുവച്ചു നിലവിളക്കും. വരനും സംഘവും എത്തി. മുഹൂര്‍ത്തമടുക്കാറായി. അപ്പോഴാണ്‌ ബ്രാഞ്ച്‌ സെക്രട്ടറിയും അനുചരന്മാരും ക്രമപ്രശ്‌നവുമായി മുന്നോട്ടുവന്നത്‌. അവര്‍ വധുവിന്റെ അച്ഛനെ സമീപിച്ചു. കതിര്‍ മണ്ഡപത്തിനടുത്തുള്ള ഗുരുദേവന്റെ പടം എടുത്തു മാറ്റാനാവശ്യപ്പെട്ടു. അന്തംവിട്ട വീട്ടുകാര്‍ എന്തുകൊണ്ട്‌ എന്ന്‌ സ്വാഭാവികമായും ചോദിച്ചു. വിവാഹച്ചടങ്ങില്‍ എസ്‌എന്‍ഡിപി സ്വാധീനം പാടില്ലെന്ന പാര്‍ട്ടി നയം ബ്രാഞ്ച്‌ സെക്രട്ടറി വിശദീകരിച്ചു. നിസ്സഹായതയോടെ വീര്‍പ്പുമുട്ടി നിന്ന വധുവിന്റെ അച്ഛനു വേണ്ടി വരന്റെ ബന്ധുക്കളും ഇടപെട്ടു. പക്ഷെ പാര്‍ട്ടി തീരുമാനത്തില്‍ മാറ്റമില്ല. ഗുരുദേവന്റെ പടം മാറ്റിയേ തീരൂ. അനുസരിച്ചില്ലെങ്കിലുണ്ടാകുന്ന ഭവിഷ്യത്ത്‌ ഓര്‍ത്ത്‌ കണ്ണീരോടെ പടം നീക്കം ചെയ്യുന്ന ഗൃഹനാഥനെ നെടുവീര്‍പ്പോടെ നോക്കിനില്‍ക്കേണ്ടി വന്നു എല്ലാവര്‍ക്കും. കാര്യം അവിടെക്കൊണ്ടവസാനിച്ചില്ല. താലികെട്ടല്‍ ചടങ്ങ്‌ കഴിഞ്ഞതോടെ വരന്റെ കാരണവര്‍ മുന്നോട്ടുവന്നു. ഗുരുദേവനെ അപമാനിച്ച ഈ വീട്ടില്‍ നിന്ന്‌ സദ്യയുണ്ണാന്‍ തങ്ങളില്ലെന്ന്‌ പറഞ്ഞ്‌ വധുവിനെയും വിളിച്ചിറക്കി അവര്‍ പോയി. മകളുടെ വിവാഹമെന്ന ജീവിത സ്വപ്‌നം സാക്ഷാത്‌കരിക്കപ്പെടുന്ന അത്യാഹ്ലാദകരമായ മുഹൂര്‍ത്തം നിര്‍വൃതിയോടെ അനുഭവിക്കേണ്ടിയിരുന്ന ഒരച്ഛന്റെ നെഞ്ചില്‍ കനല്‍ കോരിയിട്ടുകൊണ്ട്‌ ‘ഒരു സാമൂഹ്യവിപ്ലവം’ അരങ്ങേറി. ഈ പാര്‍ട്ടി ഇങ്ങനെ ഇനി എത്രകാലം ജീവിക്കും�?
പാര്‍ട്ടി നിര്‍ദേശം ചെവിക്കൊള്ളാത്തതിന്റെ പേരില്‍ ഒരു വിമുക്തഭടന്റെ വീട്ടിലെ വിവാഹം അലങ്കോലപ്പെടുത്താന്‍ റോഡ്‌ തടസപ്പെടുത്തിയതും ഒടുവില്‍ വിവാഹം രാത്രിക്ക്‌ രാത്രി മറ്റൊരു ഹാളിലേക്ക്‌ മാറ്റേണ്ടി വന്നതുമായ സംഭവം ദിനപത്രങ്ങള്‍ പ്രസിദ്ധീകരിച്ചതാണ്‌.
കോവളത്ത്‌ വിദ്യാഭ്യാസ സെമിനാറില്‍ പങ്കെടുക്കാന്‍ എത്തിയ അന്താരാഷ്‌ട്ര പ്രശസ്ഥനായ റ്റി പി. ശ്രീനിവാസനെ പരസ്യമായ പോലിസ്‌ സാന്നിദ്ധ്യത്തില്‍ അടിച്ചു താഴെയിട്ടതും, എറണാകുളം ജില്ലാ ആശുപത്രിയില്‍ ജയരാജനെ ഹാജരാക്കിയപ്പോള്‍ ഫോട്ടോ എടുക്കാന്‍ ശ്രമിച്ച ജനയുഗം ഫോട്ടോഗ്രാഫര്‍ വി എന്‍ കൃഷ്‌ണപ്രസാദിനെ മര്‍ദ്ദിച്ച്‌ ക്യാമറ തകര്‍ത്തതും, പാലക്കാട്‌ കോളേജ്‌ പ്രിന്‍സിപ്പലായ സ്‌ത്രീക്ക്‌ വിരമിക്കുന്ന ദിവസം ശവമഞ്ചമൊരുക്കിയതും, കണ്ണൂരില്‍ ഏഷ്യാനെറ്റ്‌ ലേഖകന്‍ ഷാജഹാനെ സി പി എം ജില്ലാ സെക്രട്ടറി പരസ്യമായി മര്‍ദ്ദിച്ചതും, വിനീത കോട്ടായിയും, നിര്‍മ്മല്‍ മാധവനും. ചിത്രലേഖ എന്ന ദളിത ഓട്ടോ ഡ്രൈവറും അനുഭവിക്കേണ്ടി വന്ന ഊരുവിലക്കുകളും വേണ്ടി വന്നാല്‍ പോലീസ്‌ സ്റ്റേഷനുമുന്നിലും ബോംബ്‌ നിര്‍മ്മിക്കുമെന്നുള്ള കോടിയേരിയുടെ പരസ്യ വെല്ലുവിളിയും എല്ലാം കേരളത്തില്‍ സി പി എം നടത്തുന്ന പ്രാകൃതമായ പ്രവര്‍ത്തനങ്ങളുടെ നേര്‍ചിത്രങ്ങളാണ്‌. അല്‍പമെങ്കിലും മനുഷ്യത്വം വെച്ചു പുലര്‍ത്തുന്നവര്‍ക്ക്‌ ഇതിന്‌ കൂട്ടുനില്‍ക്കാനാവുമോ? പറ്റില്ല.
സിപിഎം നേതൃത്വം സര്‍വ്വ മേഖലകളിലും അപജയം നേരിടുകയാണ്‌. മൂന്നാറില്‍ സ്വന്തം യൂണിയനില്‍ പെട്ട പ്രവര്‍ത്തകര്‍ തന്നെ നേതാക്കളെ പരസ്യമായി ആട്ടിയോടിക്കുന്നു. പാര്‍ട്ടി ലോക്കല്‍ സെക്രട്ടറി കമ്പിപ്പാരയുമായി കവര്‍ച്ചാശ്രമത്തിനിടെ പിടിയിലാകുന്നു. ഡിവൈഎഫ്‌ വൈ പ്രവര്‍ത്തകര്‍ സ്‌ത്രീകളുടെ കുളിക്കടവില്‍ ഒളിക്യാമറ സ്ഥാപിച്ചതിന്റെ പേരില്‍ തമ്മിലടി നടക്കുന്നു. പാര്‍ട്ടി പ്രവര്‍ത്തകരെ മറന്ന്‌ അനര്‍ഹമായി ബന്ധുക്കളെ സര്‍ക്കാര്‍ പോസ്റ്റുകളില്‍ തിരുകി കയറ്റുന്നതിന്റെ പേരില്‍ മന്ത്രി വരെ രാജി വയ്‌ക്കുന്നു, ഇങ്ങനെ അപചയത്തില്‍ ആകുന്ന പാര്‍ട്ടി വികൃതമായ മുഖം ജനങ്ങള്‍ കാണാതിരിക്കുവാനാണ്‌ ഇപ്പോള്‍ അക്രമവുമായി രംഗത്ത്‌ എത്തിയിട്ടുള്ളത്‌.
ഈ പാര്‍ട്ടി കേരളത്തിലെ ആര്‍ എസ്‌ എസ്‌ പ്രവര്‍ത്തകര്‍ക്കു മാത്രമല്ല ഭീഷണി പൊതു സമൂഹത്തിന്റെ സൌര്യ വിഹാരത്തിന്‌ ആകമാനം ഭീഷണിയാണ്‌. അതില്‍ നിന്ന്‌ സ്‌ത്രീകളോ, കുട്ടികളോ, ദളിതരോ, ഉദ്യോഗസ്ഥരോ, സഖ്യ കക്ഷി നേതാക്കളോ, പ്രവര്‍ത്തകരോ എന്തിനേറെ പറയുന്നു സ്വന്തം പാര്‍ട്ടി അണികളും നേതാക്കളും പോലും മുക്തരല്ല. ഈരാറ്റുപേട്ട പത്താഴപ്പടി കുന്നുംപുറത്ത്‌ നസീര്‍ എന്ന സി പി എം ബ്രാഞ്ച്‌ സെക്രട്ടറിയെ കൊലപ്പെടുത്തിയ കേസില്‍ സി പി എം ന്റെ മുതിര്‍ന്ന ആറു നേതാക്കളാണ്‌ പ്രതികള്‍. സിപിഎം പ്രവര്‍ത്തകനായ പെരിഞ്ഞനം നവാസ്‌ കൊലക്കേസില്‍ ലോക്കല്‍ സെക്രട്ടറിയടക്കം പത്ത്‌ സി പി എം പ്രവര്‍ത്തകര്‍ക്കാണ്‌ കോടതി ജീവപര്യന്തം ശിക്ഷ നല്‍കിയിരിക്കുന്നത്‌. ഇതെല്ലാം നമ്മെ ഓര്‍മ്മപ്പെടുത്തുന്നത്‌ സിപിഎമ്മിന്റെ വികൃതമായ ഫാസിസ്റ്റ്‌ മുഖമാണ്‌.
ഈ മണ്ണില്‍ ജനിച്ചുവീഴുന്ന ഓരോ മനുഷ്യനും അന്തസ്സോടെയും അഭിമാ നത്തോടെയും ജീവിക്കാനുള്ള അവകാശമുണ്ട്‌. അതാണ്‌ മനുഷ്യാവകാശം. കൊടും ഭീകരനായ യാക്കൂബ്‌ മേമനെ തൂക്കിലേറ്റുന്നതിനെതിരെ എത്ര ഉച്ചത്തിലാണ്‌ സിപിഎം നേതാക്കള്‍ സംസാരിച്ചത്‌? മനുഷ്യാവകാശത്തിന്റെ പേരിലും വധശിക്ഷ, പുരോഗമന സമൂഹത്തിന്‌ ചേര്‍ന്നതല്ലെന്ന്‌ വാദിച്ചുകൊണ്ടുമായിരുന്നല്ലോ മേമനുവേണ്ടി വിലാപഗീതങ്ങള്‍ രചിച്ചത്‌. ഈ മനുഷ്യസ്‌നേഹമെന്തുകൊണ്ട്‌ സ്വന്തം നാട്ടുകാരോടും സഹജരോടും തോന്നാത്തത്‌? എന്നാല്‍ സുഖലോലുപരും അസഹിഷ്‌ണുക്കളുമായ ഇന്നത്തെ നേതാക്കള്‍ പ്രതിയോഗികളെ അടിച്ചമര്‍ത്താന്‍ ഈ സ്വാധീനം ധിക്കാരപൂര്‍വ്വം ദുരുപയോഗം ചെയ്യുന്നു. എതിര്‍ശബ്ദം പുറപ്പെടുവിക്കുന്ന പാര്‍ട്ടി അണികള്‍ക്കുപോലും ജീവഭയംകൂടാതെ കഴിഞ്ഞുകൂടാനാകുന്നില്ല. മാര്‍ക്‌സിസത്തിന്റെ അപജയത്തേയും ഫാസിസത്തേയും തുറന്നു കാണിക്കുന്ന ലെഫ്‌റ്റ്‌ റൈറ്റ്‌ ലെഫ്‌റ്റ്‌, എന്ന സിനിമക്കും ടി.പി. ചന്ദ്രശേഖരന്റെ സ്‌മരണയുണര്‍ത്തുന്ന സിനിമക്കും അകാലമൃത്യു വാണ്‌ വിധിച്ചത്‌. സംഘടനാസ്വാതന്ത്ര്യം തങ്ങള്‍ക്കും തങ്ങളുടെ ആജ്ഞാനുവര്‍ത്തികള്‍ക്കും മാത്രം എന്നതാണ്‌ ജനമറിയുന്ന സിപിഎം നിലപാട്‌. ഇഷ്ടമുള്ള ദര്‍ശനത്തിലും സംഘടനയിലും വിശ്വസിച്ച്‌ ജീവിക്കാ നാഗ്രഹിക്കുന്നവര്‍ക്ക്‌ നിരന്തരം ഭീഷണി നേരിടേണ്ടിവരുന്നു. സൈ്വര്യം നഷ്ടപ്പെടുന്നു. സിപിഎം ആധിപത്യപ്രദേശങ്ങളില്‍ രണ്ടാംതരക്കാരായി മറ്റുള്ളവര്‍ അടങ്ങിയൊതുങ്ങിക്കഴിയേണ്ട സ്ഥിതിയാണ്‌. വിവാഹച്ചടങ്ങും, എന്തിന്‌ മരണാനന്തരച്ചടങ്ങുപോലും പാര്‍ട്ടിനേതാക്കളുടെ ഇംഗിതമനുസരിച്ചേ ആകാവൂ എന്നാണ്‌ കല്‍പ്പന. ഈ സാഹചര്യം നാടിന്‌ ശാന്തിയേകുന്നതാണോ? വരും തലമുറയെങ്കിലും ഭയാശങ്കകള്‍ കൂടാതെ വളര്‍ന്നുവരേണ്ടതുണ്ട്‌. അതിന്‌ നാട്ടില്‍ സമാധാനമുണ്ടായേ തീരൂ. അതിന്‌ ആദ്യ ചുവടുവയ്‌ക്കേണ്ടത്‌ സിപിഎം തന്നെയാണ്‌.
(ഇത്‌ പൂര്‍ണ്ണമായും മൗലികമായ രചന അല്ല പി.നാരായണന്‍, പി.എസ്‌. ശ്രീധരന്‍ പിള്ള, ക.ഭ. സുരേന്ദ്രന്‍, ഡോ. ജയപ്രസാദ്‌, സദാനന്ദന്‍ മാസ്റ്റര്‍ എന്നിവര്‍ പലപ്പോഴായി എഴുതിയിട്ടുള്ള പല ലേഖനങ്ങളില്‍ നിന്നും ഞാന്‍ കുറിച്ചു വച്ചിരുന്ന ഭാഗങ്ങളോ ആശയങ്ങളോ കൂടി ഇതില്‍ ഉള്‍പ്പെടുത്തിയിട്ടുണ്ട്‌.)